Pasal nâkru a inthawka nuhmei siem a nih.
Johny Laldinthar F.Tusing
UBS, Pune, 06th
November, 2019.
 |
| Woman created from Adamah' rib |
Pathienin
pasal (Adam) le nuhmei (Evi) a siem dân hi mak danglâm tak el chu a nih. Siem
dana hin a chunghnunglem le a hnuoihnunglem ruok chu a um naw, amiruokchu umzie
inthûktak neia danglamna chu a um ngei a ni ti chu hmu thei a nih. Hi lai
thu tak el hi, ei thusep thlûr tum chu a
nih.
Gen.2:7
a chun, ‘LALPA Pathienin hnuoia pilvutin mihriem a siem a, a hnâra chun hringna
thuok chu ân thuok lût a; chuongchun, mihriem chu mi hring a hung ni tah a’ ti
hi pasal (Adam) siema a um dan chu a
nih. Gen. 2:22 a ruok chun, ‘LALPA
Pathien chun mihriema inthawka a lâk nâkru chu nuhmeiah a siem a,’ ti hi nuhmei
(Evi) siem a nî dân chu a nih. Nuhmei le Pasal chuh Pathien angpuia siem ei ni
si chun iengleia siem dan danglam ve ve ei ni am ana? Pathienin pasal le nuhmei
a siem dana hin pawimawna (significance) a um nîng a tî?
Tienami: Tirko Paula’n, ‘tienami mei mei…ngaisaklo dingin kawk dingin’ ti
de sienkhawm ei thuchai le inzuol a ni leiin hei suklang zuou ei tih. Sumerian
(Mesopotamia mihai) hai chun tienami mak danglamtak el ‘Dilmun Poem’ a
inthawka laksûok an neia. Pasal nâkru a nuhmei siem chungchang tienami a nih.
Sumerian ṭawng chun nâkru hi ‘tî’ ti a ni, a umzie chu ‘sukhring amani hringna
inneitir’ ti a nih. An tui pathien Enki chu a nâkru ṭhangsa-in taksa
bung 8 zet el a sie leiin, natakin a damnawa, Sumerian hai pathiennu Ninhursag
chun Enki nâkru sukdamna dingin Ninti chu Enki nâkru a inthawkin a
siema, chuleiin ‘nâkru a inthawka indin nuhmei’ ti a nih, ‘sukhringtu
nuhmei’ tia hriet khawm a nih. Enki le Ninti hai chu hlimtakin an khawsa
taa, tiin Sumerian hai chun tienami anlo nei. Enki chu Ninti leia damna hmu in
Ninti chu a sukhringtu a nih.
Biblical Exegesis:
Nâkru ti hi Hebrai ṭawng chun צֵלָע (tsela) a ni a,
Brown-Driver-Briggs Hebrew Lexicon (BDB) in a hrilfie dân chun ‘Genesis a
‘tsela’ hi Bible a vawi 39 a hmangnaa hi thu chara hin nâkru tia inlet a nih, vawi
19 lai chu temple (biekin) bawlna le inzawma a sirtieng hrilnaa hmang a
nih. Chuleiin, Adam nâkru hi a sîrtienga inthawkin ti thei a nih.
New American Commentary in a hrilfie
naa chun, ‘Pathienin Adam nâkru kher ahmangna a hin תַּרְדֵּמָ֛ה (tardema)
inhniktakin ân intir a ti hi, Jonah 1:5-6 a ‘tuisuorieta thlipui nasatak ân
hrângtir laia lawng sûngril taka a ininnghil (tardema)’ a hmangna char kha ani a, det taka in-na (deep sleep)a
nih. Hi lai tak hin Pathienin pasal nâkru a lakdawk (surgical act of God) chu a
nih. A pawimawtak chu danglam taka siem/induong ei ni ti hi a nih. Hi nâkru hin
nuhmei chu pasal ang chara taksa nei, anṭanna (source) thuhmun a ni leiin Adam
in, ‘Hi zet hi chu ka ru ang ru neia, ka taksa ang taksa nei ngei chu a
nih,’ a tih. Protestant Reformers hai chun, ‘Nuhmei chu pasal ke-a inthawka
laksuok a ni nawa, pasal lu-a inthawka lâk a ni bawk nawh, pasal sirtieng nâkru
a inthawka laksuok le danglam taka Pathienin pasal sîrtienga inthawka a siem a
ni leiin a chunghnung bîk le anhnuoi bîk um loa angkhat, thuhmun an ni zie a
suklang,’ an tih. Thilsiemhai popo laia Adam le Evi (pasal le nuhmei)
chauin inpawlna (fellowship/companionship) an nei theia, inangna (commonality)
le thawtlang theina (partnership) annei theina hi Thilsiem dân (Creation order)
danglamna a nih. Pasal le nuhmei inlaichinna inhnaizie, tarlangna dingin
Pathienin pasal sîrtienga nâkru kher a hmangna san chuh, Pasal sîrtienga nâkru hmanga
mihriem bawk siem chu thil la tlung ngailo, thiltlung hmasatak a hung ni
a, hringna a hung neia, nuhmei ti a hung ni tah. Hieng ang hi tlung ta ngawi
bawk naw nih.
Gen.2:18 hin lungthu pathum pawimawtak tak
a hril- (i) Mihriem ama khât baka a
um hi a ṭha nawh ie; (ii) ama ṭhangpuitu
ding; (iii) ân kawppui ding âwm mî siempêk ka tih ie tihai hi an nih. Hi taka ṭhangpuitu ti tak el hi hei suimet ei tih. Adam ṭhangpuitu (עֵ֖זֶר-
ezer) ding a ti hin taksa (physical), a ruola (midang lê) khawsa
thei (social), lungril ngaituona (psychological) le thlarua (spiritual) tienga ṭhangpuina a huom vâwng a nih. Hebrai ṭawnga ‘ezer’ hi Eben-ezer- ‘ṭhangpuitu lung’ ti hung suokna a
nih. Thuthlung Hluia ‘ezer’ ṭhangpuitu hmangna hi Pathien ti a ni deu vawnga, chuleiin nuhmei hi ‘ṭhangpuitu’ thumal hmang leia siehnuoina/inhnuoilem
a ngaina ei nei chun Pathien ṭhangpuitu hi anhnuoi lem ning a ti? ti hi zawna
pawimawtak a nih. Ṭhangpui ngai leia ṭhangpuina pe ding lem an nih. Amiruokchu ṭhangpuitu an nina â, an mawphurna le ân thaw ding (functional role) chu tamtak
a um a, Tirko Paula in Gen.1-3 a hrilna thua ‘Pasal hi nuhmei ta dinga siem
a ni bawk nawh a, nuhmei ruok chu pasal ta dinga siem a ni lem’ le dang
danghai hi hriet ṭha hlêng a tih. (Tirko Paula le nuhmei hai ngirhmun hi hun
danga la ziek tum ei tih) LXX Septuagint (Thuthlung Hlui Greek ṭawnga
inlet) chun βοηθοσ-boêthos tiin an inlet, vawi 45 hmangnaa 42
zet el chu ‘a hrat lemin a hrâtlo lem ngirhmun det lema a um theina dinga ṭhangpuina in a hmang.’ Ânle Pasal chuh a hrâtnaw lem ning a ti? Ni lo e, achunga lungthu pathum anga pawimawtak tak suklanga umhai khi enin, an kawppui
ding ama angpui ṭhangpuina pe theitu ding siempek lem el chau a nih. Chuleiin ṭhangpuitu (ezer) hin inangna (equality) a kawka, hrâtnawlem/inhnuoilem
(inferior) nêk hmanin ‘chalânglemna a kâwk’ niin ṭhengkhat chun anhril hiel.
Interpret (inlet) suol thei a ni leiin fîmkhur chu a ṭha, Feminist hai fesuolna
tak khawm a nih. Makhâta
chaua khawsawt taka um kha a kawppui (companionship) le ṭhangpuitu dinga siem
a nih.
Hebrai Bible a chun ṭhangpuitu chau a ti nawa, כְּנֶגְדּֽוֹ׃ עֵ֖זֶר (ezer kenegdow) ṭhangpuitu inmil/ṭha/ditum (suitable
partner) a ti kher. ‘Kenegdow’ chu ‘inkungkaina/inlaichinna nei’
ti thei khawm a nih (BSI a hin chieng fawkin a hmang nawh) Chuleiin, Evi hi
sukfamkimtu a ni a, eltu/ eptu (competitor) a ni naw ti hi, a ṭawngbul hin a
sukchieng hlê.
Medical tukver a inthawk thlîrin, mihriem nâkru
hin insiemṭhatnawk theina (regenerative power) maktak el a neia, nâkru lâkhmang
(ribs graft surgery) hi mûr (tissue) inzawmna (perichondrium) a sukse naw
chun sawtnawte in a hung mawng/ṭo nawk el thei bawk. Chuleiin, Adam nâkru
inhmang hi sawtnawte (temporary) a ding a ni a, a ru-le-châng kimloa invakvai
ding a ni nawh. Evi hi hmangruo dang mei meia siem ni loin, Adam (Hebrai ṭawngin ‘ha-adamah’ -the human- mihriem tina a ni a, ‘adamah’ chu
‘pil, hnuoi’ tina a nih) mûr (tissue) um tasaa siem a nina hin Pathien
angpui ngeia siem a ni zie le taksa thuhmun/inang puta induong an nih a
tarlang.
Thukharna: Ei lo ziek sei deu ta leiin, hieng hin
tlângkâwmna siem el ei tih. Pasal hai thuhne tumna dâm, pasal laka thuneina kengkaw tum dâm,
pasal hai inzanawna le iengmaloa ngaina, nupa ni tasi-a pasalhai hriet loa
thurûk nei sum le paia dâm anlo um pal chun, siema a umna san a ṭhel letder a
nih. Khingtienga nuhmei hmusitna, hrâtlo lem, hrietna tlawm, mâwl lema ngaina,
nuhmei diriemna, ngainêpna, siehnuoina le inhnuoi lema sie tumna lungril ei
put chun Pathien thilsiem a ei chiengnaw a nih. Hieng ang fepuia ngaidân
khermei tak neitu chu fesuolna (fallacy) a nih. Nuhmeihai
hi ezer (ṭhangpuitu) hlutak el ei nih. Hi dinga Adam nâkru-a
inthawka siem ei nih. Hi hlutna, hratna, thilthawtheina hmangin insûng, Kohrân,
khawtlâng le ei sinthawna hmuna hai suklangtu, kawkhmutu le hmangtu nî rawp
dingin tiemtuhai eiin ngên a nih.
Lekhabu râwnhai:
Kostenberger, Andreas J. God, Marriage and
Family: Rebuilding the Biblical Foundation. Wheaton; IL: Crossway Books,
2004.
Freedman,
R. David. Woman, a Power Equal to a Man. Biblical Archaeology Review 9 [1983]:
56–58)
Kaiser,
Walter C. Jr., Hard Saying of the Bible. Illinois: Intervarsity Press, 1996
Towns,
Elmer L. Bible answers for almost all your questions. Nashville: Thomas Nelson Publisher,
2003.
Mathews, Kenneth A. Genesis 1-11:26. The New American Commentary. Vol 1A.
Nashville: Broadman & Holman Publishers, 1996.
Wenham, Gordon J. Genesis 1-15. Vol 1.
Word Biblical Commentary. Dallas: Word books Publisher, 1987.
Brown, Francis, S. R. Driver, and Charles A.
Briggs. A Hebrew and English Lexicon of the Old Testament. Oxford:
Clarendon, 1907
.jpg)
.jpg)