Spiritual Famine (Thlaraua Ṭamna)

‘Bible-a Rapture Thuring le Hrillâwkna Bêbâwm’  lekhabu 2025 a ka ziek Bung 9na- Khawvêl Khaw Tieng Am A Pan Pei A? tia inthawka lâksuok a nih.

Spiritual Famine (Thlaraua Ṭamna)- A Spiritual Prophecy

Lalpa PATHIEN chun, “Ngai ta u, nihai chu a hung tlung mêk a nih, chuong nihaia chun rama chun ṭâm tir ka ta, bua ṭâmna ni loin, tuia ṭâmna ni loin, LALPA thu hrietnaa ṭâmna lem chu (Amos 8:11)

The Great Chinese Famine (1959-1961) kha khawvêl record-a chu ṭâmna râpthlâk tak nia hriet a nih. "Three Years of Great Famine" tia hriet nisenkhawm hming dang pahni a nei sa: "Three Years of Natural Disasters" ti le June 1981 khan "Three Years of Difficulty"  tiin an thlâk a nih. Mihriem 15 to 55 million vêlin an thipui a nih. A tuorhla tak biel hai chu; Anhui (18%), Chongqing (15%), Sichuan (13%), Guizhou (11%) and Hunan (8%) an nih. Bracket sûnga percent zât hi mihriem um zât a inthawk 100 peia an thipui zât a nih. [1]

Fâk le dâwn a ṭâmna  leiin mi tamtakin an thipui hlak. Amiruokchu, Ṭâmna  po poa ṭiumtak chu Thlaraua Ṭâmna  hi a nih. Zâwlnei Amos chun huoisen takin bung 4:12 a, ‘I Pathien tuok dingin insiem zo rawh’ tiin Israel chu vauna khirtak a pêk a. Zâwlnei Mika khawmin vauna a lo pêk, “Chuleiin, inlârna in nei naw hielna dingin in kuomah zân hung tlung a ta, ai in sân thei nawna khawpin in kuomah inthimna hung tlung a tih; zâwlneihai ta ding chun nisa liem a ta, sûn khawm an chunga chun khaw inthim nîng a tih” (Mika 3:6). Thuthlung Thar a, Tirko Paula in hieng hin a tih, “Chun, hi hi hre rawh, ni nuhnungahai chun hun khirtakhai hung um a tih… inchûk rawp sia thutak hre phâk ngai naw an nih” (2 Tim.3:1, 7b). Hieng ang hi ei khawvêl pal mêk a hin hmu ding a um ta zing annaw maw? Hei enta u, hei ngha vêl inla, ei hmu phâk chin a dâm, chanchin ei hriet le dawng dân hai hin ṭâmna  chi dâng dâng hin a mi’n huol vêl an ta. Khawpna dingin ei inhûk rak rak a, ei tlan zawr zawr a chu khawpna tak tak hmu si lovin, lungawina tluontling, hadamna hmu lovin ei inlap inlap a ni deu tak. A pawimawtak thutak inkhêl theilo Pathien Thua ṭâmna  le châkna ei inhmang si hin chu buoi rawp ei tih.

Psalm ziektu in “Kan inchiknahai chu kan hmu ta nawh a, Zâwlnei hrim hrim an um ta nawh a, a sâwt dingzie hre hrim hrim khawm keini lai an um nawh” (Ps.74:9) a lo tih. Hmu ding tak hmu lova inlap rak rak chu umzie a um nawh. Khawvêl a lekhabu sutsuok râwntak chu Bible a nih. Bible print dawk zât char hi hriet thei a ni ta nawh, tamtak a nih. Sienkhawm, British and Foreign Bible Society chun 2021 khan Bible sutsuok zât hi  5 - 7 billion copies ni ta-in an hril. United Bible Society chun hi sutsuok zât hrila um hi a lo pawm nghet bawk a nih. British and Foreign Bible Society (founded in 1804) sût dân chun 1815-1975 sûng ringawt khan 2,458,000,000 copies sutsuok a ni an tih. Guinness World Records chun Bible hi khawvêl a lekhabu zawr dawk râwn tak record siemtu a ni a tih. [2] Wycliffe Global Alliance in a hril dân chun khawvêl ah ṭawng 7, 396 a um a, mihriem 8.2 billion ei um a, Summer Institute of Linguistics (SIL), Ethnologue dungzuiin mihriem 7.45 billion in ṭawng hmang bîk ei nei an tih. Bible pumpui (Thuthlung Hlui le Thar) nei ṭawng hi 756 ei um a, Thuthlung Thar Bible nei 1, 726 ei um a, Thuthlung Thar a rêng ni lova inlêt bîk nei hi ṭawng 1, 274 ei um a, Bible a rêng a ni naw khawmin ṭhenkhat bêk Bible tiem thei ṭawng nei hi 3, 756 ei um tah, chu umzie chu 7.3 billion (98% khawvêl mihriem pumpui) in Bible tiem thei an um tah tina a nih. [3] A hnuoia data hi Wycliffe Global Alliance hai resource a mi ei belkai a nih.

Technology hmasâwntak a hin Internet fe thlenga Bible ṭawng dang danga tiem theina khawvêla um ei ni ta leiin a ropui ta hlê. Zâwlnei Amos khan bua ṭâmna ni loin, tuia ṭâmna ni loin, LALPA thu hrietnaa ṭâmna lem chu a ti sia, Bible hlak chu tiem senglo le tiem thei tam tak a um ta bawk sia, ṭâmna  iengtin am ni thei a ta? Ṭâmna  hrim hrim chu mamaw tak umnaw lei a ni hlak si a. Hi ṭâmna hi ‘Mimal thil (self-inflicted) ṭâmna’  a nih. A.W. Tozer chun, “Bible-a mi ropui hai leh Kristien chanchina mi ropui hai hin Pathien thua dangchârna le phîngṭâmna  nasatak an nei a, an beisei angtakin Lalpan a nghâk in khawpna a pêk hlak, tu ruok hin chu mi tamtak Lalpan a nghâk dawk zo lo, nghâka ṭangkaina nei lo ei tam bêk bêk” tiin Pathien Thua dangchârna le ṭâmna  neia Pathien pan nachâng hre lo ei tam hlê thu a hril.[4] Hudson Taylor khan hieng hin a ti, “Ka hmua, ka zawng hlak, ka dit êm leiin ka nei bawk a nih” tiin Pathien le a thutak a ngainat zie a hril. Khawvêl a missionary ropui a ni ang bawkin Pathien Thu le Thlaraua dangchârna le ṭâmna  neia Pathien a thlathlam naw zie ei hmu thei.

Bible a hin Pathien ngai ngawi ngawi a, Thlaraua ṭâmna  neia zawng ding ei ni zie tamtak a um:

LALPA kuomah thil pakhat ka hnih a, chu mawl chu zawng ka tih, LALPA mawizie hmu ding le a biekina thu indawn dingin, Ka dam sûng poa LALPA ina ka um zing theina ding chu (Ps.27:4).

Sakhi vadungte tui châka ân thuok hlawp hlawp angin, Aw Pathien, ka hringna hi nangma châkin ân thuok hlawp hlawp a nih. Ka hringna hi, Pathien châkin, Pathien hring châkin a dangchâr a nih: Iengtik am Pathien hma tlung ka ta, inlang ka tih aw? (Ps.42:1-2).

Aw Pathien, nang chu ka Pathien i na, zîngkâr zawng ka ti che; Ram ṭâwl chautak, tui um nawna hmuna hin, Ka hringna hi nangma ngaiin a dangchâr a, ka tisa hin a ngai che a nih. Chuong ang bawkin hmun inthienga chun ka en zing che kha, I thilthawtheina le i ropuina hmu dingin (Ps.63:102)

Sherwood Eliot Wirt chun, “thlarau ṭâmna  le taksaa ṭâmna  hi danglam le kâr hla tak a ni, taksa ṭâmna  chu fâkin ei châkna a sukrea phîngṭâmna  a sukbo hlak, thlaraua ṭâmna  ruok chu thlarau bu ei fâk râwn po leh ei ṭâmna  a nasa deu deu hlak; Pathien hmangaina ei hriet râwn po leh… ei hmu râwn po leh a nêka tam, a nêka thlum hriet ei nuom a, khawp tâwk nei thei a ni nawh” a tih. [5] D.A. Carson chun, “Mi tamtak hai hi thienghlimna, ṭawngṭaina, thuawina tienga Pathien Thua le Ringnaa hîp-in ei um ngai naw a, inchalrempuina tieng a mi lên phât ‘tuortheina (dawtheina)’ ei tia, thuawinawna tieng lên hmangin ei um phât ‘zalênna’ ei ti nâwka, thilmak tak tak a hîp-in ei uma chu chu ‘ringna’ ei ti nâwk hlak. Mani inthunun theilo khawp hiela nun ei ngaihlutna hi ‘hadamna’ ei ti a, ṭawngṭai inthladana neiin Krista awiawtu ei hril vûm raka, Pathien ngaisaknawna neiin ei zalênna ei hmang suol a nih” a tih.[6]

Ei khawvêl hi Thlarau-a ṭâmna  a nasa deu deu a, zawng nachâng hre si lo, hmu tuma ṭhangkhaw um si lo, khawvêl tieng thila khawpna zawng dawp dawp, thlarau tieng thil ruok chu uksak lo ei pung deu deu a nih. Thlaraua bu ṭha hun tâwk dawng pha lo leia thlaraua piengsuol, inṭhang theilo ei tam tah. A hming mei meia Kristien (nominal), a tak taka Krista hnungzui pei si lo, Pathien Thu tiem pei derlova thabona suol in a khuopdet, ṭawngṭaina ngaipawimaw ta der lova Kohran ṭhuoitu nihai dâm, Kristien sûngkuoa seilien ni sia Lalpa Ṭawngṭaina chau hril tah Kristien an um pei.

The Barna Group hmusuoktu George Barna chun, “Evangelical Kohran sûng a ngei khawm hin, mi tamtak ringna indiklo Bible le inhme angna nei, inkal si, fepui tu ei um pei tah” a tih. A hrilpeina chun, “Bible hi inkhêl theilo, Pathien Thlarau inthuokkhum a ni ti chu ei pawm dân a ni, sienkhawm, mi tamtak in mani dit dân a keihêm le sukdanglamin an hrilfie a, mihriem lekha ziek ang el a ngai le pawmtu (liberal) ei pung deu deu” a tih. Hi tak hi ‘A ṭha naw zâwnga Siemtharna a thar (a new reformation) hung suok a nih” a tih. [7]

Ei ramah ngei khawm Sâwma Pakhat hrilhnuol-a Prosperity Gospel le thuhmun-a ngai pâwl ei um tah. Sâwma Pakhat hi indawivêtnaa ngaia Thuthlung Hlui dân a ni tia ziektu le ngaidân nei tamtak ei hung suok mêk. Krista chau hi lampui ni lo dinga pawmtu Kristien hai lai ngeia khawm ei hung um peia (Pluralism). Ṭhalai lekhathiem tak tak khawpuia umhai in nun zalên taka an um thei na dingin Secular Culture an ngaizâwng a, Kristienna chu inkhuopna, mani nuom dân a um thei nawna chikhat (New Colonialism) inawpdênaa ngaiin tisa tieng ei tlân lem tah. Ei ramah Kristien hai laia Research ṭhatak in thaw inla chu Bible tiem hlak hi mi 10a 3 ei tling diem aw!!!. Bible ringhlatu khawm ei lo inkatnuk el thei bawk. 

Covid-19 a’nlang dân (symptom) kha rim hrietna (smell) le an hnik le an hniknaw dân (taste) hrietnaw kha a nih. Pathien Thu le Thlarau tieng thil rim hrim hrim hriet thei naw le a thlum dân chen khawm hre thei taloa suol natna in a mi mande ei ni rawi el ta am? Covid lai khan mi pakhat chu rim hrietna a nei, an hnik le hniknaw hrietna khawm a la nei, amiruokchu, thil fâk châkna hrim hrim a nei der nawh (lost of appetite). Hme inhnik tak tak rim hrie si, sa tuihnai taka siem hmu bawk, a rim hrie bawk sia fâk châkna nei derlo chu, a vângduoi thlâk hlê. Hieng ang hin Pathien Thu ṭhatna khawm hrie êm êm si, Bible tiem châkna le peina nei derlo, ṭawngṭai thafânna nei bawk lo, Inkhâwm phurna le thathona khawm nei ta lo kut le ke zawi el tah ei ni chun ṭhanghar a hun a ni hriet a ṭha.

Thlaraua ṭâmna  hun a hin, hrisêl taka ei um theina ding chun Tirko Paula in “ringna le inchûktirna ṭha tu chena i la zâwm thuah châwm i ni ang khan” (1 Tim.4:6) a ti angin ringna le inchûktirna ṭhaa châwm (nourished) tlat ei ni chun chau el lovin um ei tih. Pathien Thu hi ei innghatna bulpui nisien, thlarau ta dinga bu, lungril ta dinga khuoizu anga thlum, thahrui ta dinga hrâtna, hrietna dinga varna a nih. Ei ke ta dinga khawnvar, ei lampuia dinga var a ni a, khawlâi hmunah khawm chawi thei, naupang la puitling lohai ta dinga khawma hrietthiem thei khawp a awlsam taka man thei, mi var le mi thiem ta dinga inril le inthûk êm êm nisi a nih. Hieng po po nêka hlu lem chu ‘Chatuon Hringna Lekhabu’ a nih. Chu chu nang le kei a ta ding khawmin iengtiklai khawm hmu thei a nih. Isu’n “Mihriem hi bei chauin hring naw ni hai a, Pathien baua thu tin suokin hring lem an tih” (Mt.4:4) a tih.

Peter in “Chuleiin, chuong thil chu hrein, thutak in kuoma uma chun in det dea chu chuong thil chu inhrietthartir cheu ka tum zing hlak a…Anih, ka fe suok hnunga chuong thil chu in hriet zing rawp theina dingin..” (2 Pet. 1:12,15) tiin Peter hin khawvêl lo suoksan ding ni sienkhawm, thutak hi um zing sien, hieng thil hi hrezing hai sien a nuompui a nih. Chanchinṭha hi inzau pei sien, khawvêl hmun tina hrilin um sien, thlaraua ṭâmna  hi dangkîr le dodâlin  um sien, thlaraua khawp le tlaia um hi a nuom tak pa a nih. Ei khawvêl pal mêk a hin, hi lungril inṭawmpuitu kristien le kohran ei ni pei hi a pawimaw.

Thlaraua ṭâmna  huna hin phurrik a neia, invawina inthûktak ei nei a pawimaw. Peter hin anvawina le phurrika nei in, Pathien ngaisak nawhai umna khawvêl tui suklêtin a um thu hrilin, Noa mi fel le mi dang pasari leh sandam an ni thu a hrila, Sodom le Gomorra khuohai chu Pathien ngaisak naw la hung um dinghai in entirna dingin a hmang a, vuta inchangtirin, sukbohmangin thiemnaw ân changtir thu le Lota mi fel, mi suolhai umdân hurtak leia lungngai bêk bêk chu a sandam tah tiin Sandam ei ni ve theina ding le Noa hun lai le Sodom le Gomorra khuo hai anga hurna suol le Pathien ngaisaknawna leia an bohmang ang kha ei tuok naw na dingin a mi lo infui a nih. (ref. 2 Pet.2:7-8)

Peter ang bawkin Paula ngei khawmin, Pathien ngaisaknawna hi lungril invawina a nei zie chu Athen khuoah a um lai khan a chieng hlê. Paulain Atheniah an ni chu a lo nghâk laiin, khuo chu pathien lima sipin a hmuh a, a lungril a lunginzîng ta hlê a (Tt.17:16). Isu ngeiin Jerusalem anvawi êm leiin a ṭapkhum a, “Aw Jerusalem, Jerusalem! zâwlneihai thattu, i kuoma an hung tirhai lunga lo dêng hlumtu, ârpuiin a têhai a thla hnuoia a awp khâwm angin, i nauhai vawi iengzât am awp khâwm ka tum a! Nisienlakhawm, in nuom si nawh” (Mt.23:37) ti ei hmu.

Thlaraua ṭâmna  hi invawina le phurrik a, ei nei naw chun sukkieng nêkin zuol tieng a pan pei ding a nih. Bob (Robert) Pierce kha Youth for Christ a rawngbâwltu (evangelist) a ni lai khan China ramah 1947 khan rawngbâwl nuomna le invawina nasatak a nei a. Kha lai huna khan Honolulu (Hawaii) chen chau tlung theina ticket man ding a nei. Phurrik taka a nei leiin China chen fe theiin Lalpan rem a ruot pêk a, sâng tamtak (China mi ) Krista kebula an hung pan kha a hringnuna inchiktlâk tak niin a hril. Hi nêka a lungril them êm êm tu chu, thlân hmun pakhat a sirnaa chun, hi hmunah thi tamtak naupang ṭhangsa-in fâk ding neiloa an thipui thu thuziek; ‘Phîngṭâmin saruokin ṭhangpuitu nei lova thiin, naute nene nelai hrisêl tak tak chenin an thipui’ ti a hmuin a sungril meichawk anga hlieutu um ang elin a kawinawi a. Hi ni a inthawk hin khawvêl ah fâk ding nei lova phîngṭâm el ni lovin thlarau ṭâmna  nasatak leia bohmanghai sansuok le ṭhuoisuoka an um theina dingin World Vision le Samaritan’s Purse rawngbâwlna ropui tak a hung hmusuok (indin) pha a nih.[8] Ei khawvêl sietak a hin ‘Krista hmangaina chun keini a mi tirlui a nih’ ei ti thei ve hi a ṭul hlê. Samari miṭha anga mi dang ṭhangpui ngaihai taksa le thlaraua ei ṭhangpui ve ngei theina dinga ṭhang laa, inmûtchawktuo ei ṭul hlê.

Charles Swindoll chun, “Ṭâmna  hi thil pawimaw um naw tawp ni lovin mamaw tâwk um naw lei a nih. Thlaraua ṭâmna  hi thlarau châwm thei ding tâwk ei hringnuna hin tlâksam a nei lei a ni, mimal insûnga khawm bâksam leia mamaw hun tâwk um naw lei a ni hlak. Tulai (khawvêl) hin thlarau bu tâk tling si lo, a puopa fast food anga thlarau bu hrisêllo tam taluo lei hin mi tamtak a fâksiet a, Youtube, Facebook le Social Media dang dang fethlenga ‘fast food spiritual snacks’ hai lei kuhin thlaraua thau ṭhalo in a mi bâwm leiin ṭhalai tamtak a suksiet tah. Ei pawimaw tak chu hringna thlâkdanglam thei khawpa thutak bu ṭha Pathien Thu a nih” a tih.[9]

Lalpa Pathienin ei ta dinga bu ṭhatak fâk châkna mi pe sien, ei khawvêl pal mêk danglam tak a hin a hmangruo ni a, thlaraua ṭawlna le ṭâmna , sûngtieng kuruokna sukbittu le sukhrâttu in mi hmang thar raw seh!

---

[1] https://alphahistory.com/chineserevolution/great-chinese-famine/, accessed on 10 July, 2025 at 2:10 PM.

[2] https://www.guinnessworldrecords.com/world-records/best-selling-book-of-non-fiction, accessed on 10 July, 2025 at 2:20 PM.

[3] https://www.wycliffe.net/resources/statistics/, accessed on 10 July, 2025 at 2:30 PM.

[4] A.W. Tozer, The Pursuit of God (Harrisburg, PA: Christian Publication, Inc., 1948), 17.

[5] Sherwood Eliot Wirt, A Thirst for God (Minneapolis, MN: Worl Wide Publication, 1989), 29.

[6] D.A.Carson, For the Love of God, Vol.2 (Wheaton, IL: Crossway Books, 2006), January 23 devotion.

[7] https://churchleaders.com/news/383605-george-barna-another-reformation.html#:~:text=A%20new%20report%20released%20Tuesday%20by%20the%20Cultural,George%20Barna%2C%20Director%20of%20Research%20at%20the%20CRC., accessed on 10 July, 2025 at 3:30 PM.

[8] https://www.worldvision.org/christian-faith-news-stories/women-inspired-bob-pierce, accessed on 12 July, 2025 at 2:50 PM.

[9] Charles R. Swindoll, Good Morning Lord, Can We Talk? (Carol Streal, IL: Tyndale House, 2018), 13.