ISU KRISTA KHA A THI NGEIA; THINA HNEIN ROPUITAKIN A THONAWK NGEI A NIH.

ISU KRISTA KHA A THI NGEIA; THINA HNEIN ROPUITAKIN A THONAWK NGEI A NIH.

(Evidences beyond Bible- Ei Thuring andik zie)

Johny Laldinthar F. Tusing

10^th April, 2019.

Thuhâwngna

Isu Krista THONAWKNA hi ringtuhai thuring bulpui pawimâwtak a nih. Ṭhalâihai tiem nuom zawng deu in “Isu Krista kha a thi ngêi a; thina hnê in a thonâwk ngêi a nih” ti hi Bible mi’nchûktirna khêltienga inthawkin a sukchiengna le Apologetics deuin ei ziek ding a nih.

Khawvêl technology hi an’sâng ta a, awlsam takin Youtube le Google a hai nuom
nuom hmet dawk thei ang hielin ei um tah. Bible thua inchûktirna khawm hi ṭhangtharhai lâi hin mak tak taka ‘skeptics le atheists’ hai thuring vawrsuoka umhai hrilmâwitu le a hretu ei um pei taa. Bible sêlkal chu ni sîlo; ringhlâna nei ang zâwnga um ang deua lungril put khawm ei um pei ta khawm (Mizoram ngirhmun ênin) niin an’lang tah. Chuleiin, Apologetics hi ṭhangtharhai lâi hin ei la mamâw pei ding niin an’lang. Hieng ang course inchûkna hi Bible Seminary le College-a hai khawm inchuonsa vat vat hi a ṭul ta hlê. Hi thusep hi a kamkeuna chau a ni a, a ziektu ngêi khawm hi hrietna ramah an’hnuoi hlê leiin introductory ang chaua ngâi ding a nih.

1. Isu kha krawsah a thi ngei a nih

Isu thonâwkna hrietchiengna ding a pawimâwtak chu “Isu kha Krawsah khan a thi
ngêi a nih” ti pawm hmasa a ṭul. “A thi ngêi a nih” ti ei hrietchieng nâw chun a thonâwkna iengtin am hrechieng in pawm thei ei ta?

Kraws a inhemdêna hi Rom sawrkâr-in mi inhnuoilem (lower class) hai, suokhai dâm, sipai ringumlo dâm, tharum hmanga hel hlakhai dâm, phatsantuhai dâm an lo khâihlum hlak. Hemde (crucified) hrim hrim thi loin an maksan ngâi bawk nâw. Isu thi hnung A.D. 70 lâi khawm khan Roman sipaihai in Juda mi tamtak nghatdân dâng dâng (a ṭhen a letling zawng, a ṭhen a khang zawng dâm) in anla khâihlum pei thu Josephus (Judahai Historian) chun a hril.

Kraws a inhemdêna hi inthatna/thina râpthlâktak a nih. Cicero thuzieknaah chun
“Inhemdêna hi ‘inhremna râpthlâk’ (horrendous torture) a nih”, a lo tih. Romhai historian Tacitus chun, “Hremna tâwpkhâwk/vawrtâwp (extreme penalty),” tiin a lo ziek bawk a nih. Isu hemdê-a a um thu le a thi thu hi Chanchinṭha palihai hin an ziek seng a nih. Bible puotienga inziekna (non-christian source) khawvêl historian le ziektu ropui hmasahai; hieng Josephus, Tacitus, Lician of Samosata (Greek mi ziektu ropui), Mara Bar-Serapion (Stoic philosopher le Syriac ziektu ropui) hai hin Isu hemdê a nina thu an lo ziek seng. Talmud (Judahia lêkhabu pawimâw)-ah khawm ‘Yeshu (Isu) hemdê a nizie’ târlang a nih. Bible el ni lo, khawvêla mî ringtlâk le ziektu ropuihai in Isu hemdê a ni thu le a thina hi an lo namdet (attested) le pawm (claimed) seng a nih.

2. Thina hnêin a thonâwk ngêi a nih

Isu thonâwkna hi Chanchinha palihai bâkah Tirko Paula in a thonâwkna thu hi a ziek nasa hlê. Vawisûn ni ang hin Isu thi hun le a thonawk lai khan technology lo um ta sien chuh; Isu thina le thonâwkna hi ei sopui nasa hlê ding a nih. Youtube po po hluosip a’ta; Instagram, Whatsapp, Facebook le Twitter-hai tiem sênglo le hmû ding a bit/an’tîng el ding a nih. News reporter haiin ground report pe dingin Jerusalem-ah hluobit mup an’ta, a soin ei so chêl chûl ring a um. Skeptics (ringhlâtuhai) hai chun Bible-a inziekhai hi an ring thei ngâi nawh. A mak ngawt el! Isu kha an’chûtirhai po po le nuhmei iemani zât bulah anlâr a, Tirko Paula le unâu zâ nga nêka tam lâi anlâr bawk a nih. Hienghai hmutû le hretuhai chu Apostolic Fathers (Tirko puipahai), A.D. 80-180 inkâra Tirkohai thlâktu le ringtuhai/kohran hmasahai lo keiṭhuoitu hai khan an lo ziek ve vawng a nih.

 
Clement of Rome (Bishop) [c. 30-100] hi Tirko Paula in Phil.4:3 a Clement ti
hming a ziek kha Kohran puipa hieng Origen of Alexandria (AD 185-284) le Eusebius of Caesarea (AD 260-340) hai chun “Clement of Rome hi a nih” an tih. Clement hin tirkohai kha a hmu hman bâkah inpâwlna thienghlim (fellowship) a khawm lo ṭhangphâk a nih. Isu inchûktir Peter leh lem chun an inhnai bîk hlê niin Irenaeus (AD 130-202) le Tertulian (c. 145/155-240) hai chun an hril. Clement hin “Isu a thonâwk ngêi a ni thu le mit-a hmutuhai (eye-witness) hai ngêi khawm a lo inpâwlpui hlak thu” a lo ziek.

Polycarp [c. 69-155] khawm hi tirkohai hmûphâk le an inchûktirnahai hrephâk vê, Isu mit ngêia hmutuhai lo inpâwlpui hman a nih. Ama hi Tirko Johan a inchûktir le a hnungzuitu a ni bâkah Kohran puipa Irenaeus a hotupa a nih. Tertullian chun “Isu ṭhuoihruoi Johan-in Smyrna a Bishop dingin a namdet” a lo tih. Polycarp hin Tirko Paula ang bawkin Isu Thonawkna hi a hril uor hlê.

Ignitius [c.35-108/110] hi Polycarp le inruolṭha le a sinthâwpui Antioch-ah Bishop a nih. Ignitius khawm hi tirkohai hmu hmantu le inpâwlpui hmantu le an inchûktir a nih. Ignitius hi Irenaeus le Origen hai khawmin a thuziekhai hi an ngâihlu hlê. Polycarp khawmin Ignitius hin Isu inchûktir Johan khawm an hmûpui bâkah an’chûktirnaah khawm a ṭhang vê ngêi thu a lo ziek. Ignitius hin Isu thonâwkna thuah, “Tirkohai khan Thonâwk tah ei Lalpa Isu Krista an hmû leiin sukhrâtin an um a, ṭitna neilo hringnun neiin an Pu (master) ang in thina an ngâinêp a nih” tiin a lo ziek.

Apostolic Fathers hai zo a Kohran Puipa (Church Fathers) hai hin ringtlâk thuziek
tamtak an lo mâksan- Dionysius of Corinth (AD 170 vêl-a a thuziekhai), Tertullian le Clement of Alexandria (AD 200 lâia an thuziek), Origen (AD 230-250 vêl-a a thuziek), Eusebius in Ecclesiastical History (AD 325 lâi bâwr-a a ziekhai) le a chung a Historian le ziektu ropuihai thuziekah hin Isu thina le thonâwkna chieng takin an lo ziek seng a nih.

Patristic Quotations (Kohran puipahai, Kohran hmasahai thuhril le ziekhai lâksâwng) hi Pathuma ṭhe thei a nih: Greek, Latin le Syriac. Hienga thu lâksâwng- citations le quotations hi Greekah ringawt khawm 5 lakhs chuong a um a nih. Hienghai po po-ah hin ei Bible hi an’dikzie le ringtlâk a nizie hrietthei a nih. Apologetics-hai chun Isu thonâwkna thuah a sukchiengna (evidences) a an hmang hlak an lâktâwi chu POW (Paul, Oral tradition, Written tradition) ti hi a nih.  Tirko Paula Testimony le a thuziek le an’chûktirna bâkah mit-a hmutuhai thuhrilsâwng (Oral traditions) hai hin a sukchieng hlê. Tirko Paula in 1 Kor.15 ah “Krista Thonâwkna” thua Ringna/Thuring innghatna (Creed) alo zieksuokna le an’chûktirna hin a a umzie le pawimawna a hrilfie hlê. Scholars-hai chun hi Creed hi Isu hemdê a ni zo kum nga hnunga Paula’n a zieksuok angin an hril. Written traditions (Chanchinṭha ziekhai, Thilthâwhai, Apostolic Fathers hai thuziek) hai hin an ringna leia tuor, chân, thi an inhuomzie hin Isu thonâwkna hi a sukchieng hlê bawk.

Tradition ei tihai hi ‘ziek amani ṭawngbaua inchûktirna inpêksawnga um’ a nih. Theology thawna/inchûk dinga hnârlakna (source) dinga pawimaw palihai chu Pathienthu (Scripture), thurosie (Tradition) thu inpêksawng, lungril ngaituona fîmtak le hrietna (Reason) le mani tawnhriet (Experience) hai hi an nih. Chuleiin, tradition ei hung hril hi a pawimaw hlê a, ngaihlut ding a ni bawk a nih. Tirko Paula chun, “chuongchun, unauhai, ngîr det unla, thurosiehai chu, thu hrilin amanih, kan lekhathawnin amanih kan inchûktir cheu kha, pawm tlat ro,” a tih. (2 Thes.2:15)

Thukharna

Isu Krista kha kraws a khan a thi takzet a, thlânah phum a nih. A Thonâwkna hin Pathien a nizie a sukchieng a. Thina hnêin ropuitakin a thonâwk a nih. Krista kha keithoin umnâw sien chu ei iâwi le ei ring chu iengkhawm ni nâw nih a; ei suolnaah chun ei la um zing ni’ng a tih. Krista chu mithi lâi a inthawkin keithoin a um takzet a nih; a inhai tho hmathuoitu a lo ni tah. Tirko Paula in Thonâwkna Thuring a zieknaah a hril hi nîtin a mi ṭhuoitu ni mawl râw seh. Isu thonâwk hnunga inchûktirhai le ringtuhai huoisenna le Krista ta dinga mi hrât khawkhêng an ni ang hin nîtin el hin Krista thilthâwtheina hin mi ṭhuoi pei raw seh! Peter le Johan haiin a hmaa an iṭisim lê ṭi zawr zawr-a anlo um hlakna-hai Thiempuhai, Biekin ah hotuhai, Sadukâihai hmabulah ngêi khawm Isu thonâwk hnung lê Thlarau Thienghlim a tlung hnung zet chun “Keini chu thil kan hmû le kan hriethai kha hril loin kan um thei nawh” an ti ngam ang khan nîtin el hin sêltakin fê pei ei tiu.

Tiemtu dittakhai, dettakin, sukchâng ruolloin Lalpa sin ṭhahnemngâitaka thaw rawpin um ei tiu; “Ei inrimna chu Lalpaah chun a thlâwn ngâi nawh”, ti ei hriet sih a. "Hnênain thina a lem zo tah”, A hril ang ngêiin a THONAWK TAH.

Halleuiah! Amen!