"Nuhmei, en ta, i naupa kha!"... "En ta, i nu kha!"

"Nuhmei, en ta, i naupa kha!"... "En ta, i nu kha!"

(Kross ler a Isu ṭawngbau pathumna- hrilfiena le inchûk ding)

Johny Laldinthar F. Tusing,

9^th April 2020, UBS, Pune

Thuhâwngna

Ṭhenkhatin Isu ṭawngbau pasari hai hi hieng hin an laktawi-   Ngaidamna, Sandamna, Hmangaina, Intlanna, Tuorna, Hnena le Himna tiin. Ei thuthlûr nuom hi a pathumna- "Nuhmei, en ta, i naupa kha!"... "En ta, i nu kha!" ti hi a nih. Hi ṭawngbau hi hril-hlawlo tak laia mi a nih. Hi thu hi Hmangaina ṭawngbau a inthawka hung suok a ni ti hriet thei a nih.

Krista Tuorna

Lungngaina/tuorna hapta ei lo tlung nawk der el tah. Isu Krista kha mihriemhai intlan ei ni theina ding lê ei suolhai ngaidam a ni theina dingin kross ler ah muolpho taka khaikangin a um a; a mi hmangaina leia kross ah a thina ngei chun damna ei chang a nih.

Thuhriltu ropui Billy Graham chun, “Kross hin suol umzie inthûktakin an entir a, chu chau ni loin Pathien hmangaina inkhiruollo a tarlang; Krista khaikang a nina, a thisen suokna le a thina hin Pathienin Khawvêl kuomah Ka Hmangai che a tina anih” a lo tih.

Ei Lalpa Isu Krista kha deusaw le hmusitin a uma, vuok thidukin a um, sukrinumin a um a, nêksawrin a um a, ei natna le lungngaina phur in, a thisen thienghlim ngei chun intlan ei nia; Kross a ngei chun ei damna dingin a thlarau anthla ta a nih. Hieng tuorna tawpkhawk a tuor laia ṭawngbau inchiktlâk pasarihai hin vawisun ni chena ei nuna thu a la hril rawp a nih. 

Kross ler a Isu ṭawngbau pasarihai

Kross ler a Isu ṭawngbau pasarihai chu-

(a) "Pa, anni hi ngaidam rawh, an thilthaw hi an hriet naw a ni hi," (Lk. 23:34)

(b) "Titakzetin ka hril che hi, vawisûn hin ka kuomah Paradisah um vêng i tih," (Lk. 23:43)

(c) Isu'n a nu kuomah, "Nuhmei, en ta, i naupa kha!" a ta. Chun, inchûktir kuoma (Johan) khawm chun, "En ta, i nu kha!". (Jn 19:26-27)

(d) "Eli, Eli lama sabakthanih?" "Ka Pathien, ka Pathien, iengdinga i mi mâksan?" (Mat. 27:46; Mk. 15:34)

(e) "Ka dang a char ie," (Jn. 19:28)

(f) "A kin tah," (Jn. 19:30)

(g) "Pa, i kutah ka thlarau kân kawltir," (Lk. 23:46)

I. A thu Hrilfiena

"Nuhmei, en ta, i naupa kha!" tia hin ‘Nuhmei’ hei ti tawp el chu; a hmusit ṭawngkam deu de aw! ti thei  a nih. Ei hnam sûnga ngat lem chu ‘nuhmei tê tê’ ‘nuhmei var in varâl a kai nawh’ tihai dâm ṭawngchânglakna taka hmang hlaktu ei ni leiin hi thu hi hrietbuoi le ngaimak thei a ni tlat. Inlet indiknaw lei ning a ti? Ni lo e. A ṭawngbul tienga chun ‘gunai’ (Greek) ti a nia, ‘Nuhmei’- Woman ti a nih. Greek ṭawnga ‘gunai’ hin ‘nuhmei’ ti thumal el nêkin inkungkaina le inzawmna tieng a kawk leiin ‘nuhmei dittak’ amanih ‘nu inzaum’ tia inlet thei a nih. Nuhmei ti ringawt hin chun ṭawng mawilo a nina a um a, inzaumna neilo, indiriemna le inhmusitna khawm a kawk thei bawk. Koine Greek (Greek ṭawng hmang tlanglawn) a chun ṭawngmawi le inzaumtak in lekhazuol (papyri) a hai inchûklai naupangin a nu le pa bulah ṭhangpuina a ngen huna ‘gunai’ ti hi anlo hmang hlak . (Eugene A. Nida, Fascinated by Languages). Isu’n ‘gunai’ a hmang hun a hin nuhmei hai diriemna ni loin nuhmeihai ṭawngbau ṭhaa a biekna a ni vawng hlak. Hi taka Isu’n ‘gunai’ a hmang nasan hi umzie inthûktak nei a nih- ‘hmangai Johan le a nu Mary hai ‘Nufa’ inlaichinna an nei thar thu’ a khekpui a nih. (BDAG, ‘γυνή). Isu thilmak thaw hmasatakna Jn. 2:4 a ‘Uoiin sukpung’ a khan  "Nuhmei, nanga mi lo hrietpêk ding ieng am a um a? ka hun a la tlung nawh,"  ti â, a nu Mary a biekna angchar kha a hmang nâwk a nih. A chungah ei hril ta ang khin Bible translation thar hieng NLT, TNIV hai chun ‘nu’ tiin ansie lem a nih.

Isu’n "Nuhmei, en ta, i naupa kha!" a ti hun lai hin Mary hi hmeithai (Josef a thi tah) niin anlanga, kum 50 vêl ni tah; sum hmuna ding le makhatah fâkzawng harsa ti tah a ni leiin a naupasal upatak Isu ah innghat el nita in anlang.  (Andreas J. Köstenberger, BECNT).

"Nuhmei, en ta, i naupa kha!"... "En ta, i nu kha!" hin Testamentary Formula-thi tawma thucha or thu ro-chung (Thurosie kalhmang) le Legal Adoption Formula (Nau dinga pawmna dân) a hrilna a nih (D. A. Carson, PNTC). Kross ler Isu’n tuorna tawpkhawk a tuor lai ngei khawma a nu ngirhmun a hrietchieng leiin Isu’n a chungah mawphurna a nei kha a hrietzing leiin, a um tanaw hnunga khawm a inchûktir hmangai Johan kha a nu (Mary) naupa hung ni taa, Johan ngei khawm Mary kha a nu a ni tah lem thu a hrilna a nih (William Barclay, The Gospel of John).

Juda sûngkuo fe dâna chun sûngkhata pâtak a um tanaw hunah; a upatak in nu enkawlna sin mawphurna a lak el hlak. Chun, nu le pa enkawl, chawimawi le inza hi Judahai hin an lak ursun hlê (1 Sam. 22:3). Isu hin nau upatak a nina angin a thawding tak a thaw a ni hrim a nih (Craig S. Keener, IVP Bible Background Commentary). Ânle Isu unauhai kha an um zing sia, iengleia Johan a kuomah mawphurna a pêk el am ning a ta? A unauhai chun ama an ring si nawh a (7:5), ama ringtu(Mary)chu la ring ve naw tuhai enkawl dingin tuna’m pe nuom a ta? (Leon Morris, NICNT).

Chu chena inthawk chun (From that hour), inchûktir chun amanu chu a inah a ṭhuoi tah a (Jn. 19:27). Johan hin a hun a zieklang kher nasan chu Isu hril ang ngeiin anu Mary hi a enkawl ngei zie a suklanga, hriet dana chun (traditions) Johan le Mary hi Ephesi a fe in an pahni hin hi taka hin anphum veve niin an hril (George R. Beasley-Murray, WBC Vol.36).

II. Inchûk ding

1. Mi chawilientu ei nu le pa hai inza, chawimawi le enkawltu ding ei nih.

Kross ler a Isu ṭawngbau pathumna a hril nuomtak chu hmangaina ṭawngbau ngeiin ama chawilientu a nu Mary enkawl le a himna ding thu a nih.  Tulai ṭhangthar hai lai nu le pa inzanawna le uksak nawna a hluor ta hlê. Sin ṭha le detindo tak nei hnunga nu le pa uksak ta der lo dâm, an kum a hung tama thaw thei an hung nei tlawma, inphalam dawr dawr a hun hmangral el tah hriet ding an inkatnuk bawk. Ei hrietzing ding chuh, ei Lalpa Isu Krista khan a nu kha a ngaipawimaw hlê â, a thi tawma a inchuktir Johan kawla a rochung chu a nu enkawl kha a nih.

Ei Bible chun nu le pa thu zâwm chu thil indik le Lalpaa lawmna a ni a, nu le pa chawimawi chu thupêk tiem nei hmasa tak a nih el khelah damsawtna khawm a chaiwsa nghal thu ei hmuh. Dân sawmpêk a ṭhang ngat a ni bawk. Köstenberger chun, “Isu hin nu le pa chawimawi rawh- Exo.20:15; Deut. 5:16  ti hi a hrietzinga a hrang a chat tawm ṭep-in a nu tadingin ruohmangna ṭhatak a siem a nih,’ a tih. A mi chawilientu hai hi ieng ang ngirhmunah khawm hmangaiin enkawl tlat ding ei nih.

2. Inhmangaituo ding ei nih.

Hi thu hin inlaichinna pawimawzie a sunvar. Sûngkuo inlaichinna le midang le inlaichinna hrim hrim a hin theitawpsuo in inhmangaituo ding ei nih.

Isu ṭawngbau pathumnaa ‘inchûktir’ a ti hi Hmangai Johan a ni a. Johan hin chanchinṭha a zieknaa hin Isu’n Hmangaina thua anchûktirna le hmangaina a hrilnaa thu pawimawtak tak hai a zieklang a nih- ‘Mihriemin a ruol ta dinga a hringna a pêk nêka hmangaina nasa lem tukhawmin an nei nawh’ ti le ‘Pathienin khawvêl a hmangai bêk bêk a, chuongchun, a Naupa khât nei sun chu a pêk a, ama chu tûkhawm a ring taphawt chu an bohmang nawh a, chatuona hringna an nei lemna dingin’ (Jn.15:13; 3:16).

Chanchinṭha Johan hin chanchinṭha dang pathumhai belkhawm nêkin hmangaina hi a hmang râwn lem. Hmangaina thumal hi vawi sawmnga nêka tam a hmang a nih. Amiruokchu Marka angin i vênghai i hmangai ding a ni (Mk. 12:31) a ti ve naw a, hmelhma hmangai dingin Matthai (5:44) le Luka (6:27) ziekhai angin a ti ve bawk nawh. A tinzawn tak le a fepui tak nia inlang chu inhmangaituo ding- ringtu hmangainaa inhmangai intuo ding tieng hin a awn lem a nih (13:34–35; 15:12, 17). Isu’n anchûktirhai kuomah  "Thupêk thar ka pêk cheu hi, inhmangai tuo unla; keiin ka hmangai ang cheu hin, nangni khawm inhmangai tuo ro. In inhmangaituo chun mi po poin ka închûktirhai in ni ti chutaka chun hrieng an tih," a ti a nih.

Ringtuhai hin hmangaina kawnga mihriem chanvo le mawphurna (ethic) – ‘keiin ka hmangai ang cheu hin, nangni khawm inhmangai tuo ro’ ti hi ei chângchawi tak laia mi a nih. Chanchinṭha a chau ni loin Johan lekhathawn 1 & 2  khawm hi hmangaina thu hi Johan in a la hrilzau ta pei a nih ((1 John 3:11–18; 4:7–21; 2 John 5–6). Isu ṭawngbau pathumna hin inhmangai tuo dinga thucha a mi pêk a nih.

Isu khan hmangaina in lungrila lungriem ithlâkhai le beidawnghai lai rawng a bawl a. Isu kross ler a khaikang a ni chen khan, chûh hmangaina chu a la puongsuok ta rawp a nih. Covid-19 leiin mi tuelkhawmin harsatna ei tuok senga, ṭhenkhat chu khawser leiin suonginsam khawm an um ngei ring a um. A harsa zuol deu nitina fâkfawm zawng hlak sinthawna ding hmu talo dâm, hmeithai le fahra hai dâm, upat hnunga mani khata khawsa hai dam an pawimaw le ṭul phurrûk pêk hi Kross lera Isu ṭawngbau sukdikna a nih. Hi ṭawngbau hin ‘inhmangaituo ro’ tinaw sienkhawm a hrilna ang tlukpui a nih. Chuleiin sawmdawl ṭulhai sawmdawlin hmangaina hruihruolin mi khuop tlat raw seh.

3. Kross a chun indaidanna ṭhiet a nih.

Kross a khan indaidanna popo ṭhiet a ni zie a suklanga, chu Kross a chun anhnuoi bîk le ansang bîk, nuhmei le pasal, Juda le Grik mi um loin angkhat rawnga Isu hmangaihai le sandamhai ei nih. Isu a thi tawm ṭepa a tawngbau hai hi lungril a va them thei ngei de! Pathien ṭawngsie inphura, mawsiettu, diriemtu le hemdetu hai ngei khawm "Pa, anni hi ngaidam rawh, an thilthaw hi an hriet naw a ni hi," tiin ngaidamna thu a la’n zawt a. Misuol (Lk.), suomhmang (Mt. le Mk.) [rûkru el ni lo suomhmang leia thi dinga hemde ding chu pawi lientak antawk ngei a ni a suklang] khawm suol neilo (Isu) le ankar daidanna ṭhiet a nih. Suomhmang insirpa (penitent thief) kha Isu’n "Titakzetin ka hril che hi, vawisûn hin ka kuomah Paradisah um vêng i tih," tiin ngaidamna thu a la hril ta rawp.

Suol ngaidam theilo Pathienin a nei naw, insira ama pantuhai chun damna hmung antih.  A hun tawp el ding anta leiin a ṭawngbau pathumna hin nuhmei le pasal indaidanna khawm a ṭhiet saa, Kristaa chun pumkhat ei ni ti a suklang. Kristaa chun inthlierhranna le indaidanna a um ta nawh; ringna thuhmun Krista Isua chun ei rêngin pumkhat ei ni lem ta a nih.

Thukharna

Kross ler a Isu tawngbau langsar naw pawltak a inthawk hin Krista hmangaina le inhmangtuo ding ei ni zie hi hrie thar seng inla. Krista Isua chun pumkhat niin indaidanna ngei khawm ṭhiet a ni ti hi chiengzuol inla ei nuom takzet. Kross chu ringtuhai ei symbol pawimawtak a ni a; Krista tuorna an entir a chu Kross a chun damna ei hmuh a nih. Hun khirh le hun rinuma khawm nitina kross puta Isu zui dinghai ei nih. A. W. Pink chun, “Nitina Kross put ti hi rinum pawisa loa mani hringna Pathien tadinga inpêkna a nih” a lo tih. Watchman Nee chun, “Hnena tlo le detindo ei ti chuh det taka Kross bulṭhuta ngirna a nih” a tih.

AMEN.