Krista Sipaiṭha Ravi Zacharias kha
(1946-2020)
(1946-2020)
Johny Laldinthar F. Tusing,
YLS, IQC | East Wing, Room-X,
June 13, 2020.
Ṭhalaihai tamtakhai Krista ringna kawnga mûtchawktu le rawngbawl hlâwk êm êmtu 21st century a Ravi Zacharias ang hi evangelist le apologetics ropui an um naw ti ding hiel khawpa Pathien bêlruot le hmang a nih.
May 19, 2020 khan Bone Cancer Sarcoma leiin Vân kona dawnin kum 74 mi niin ropuina ramah a lo fe kai tah. Covid-19 leiin kan sûngkuo khawm inring hman lék lovin May 19 in Pune kan suoksan ding thu kan hriet thuta, a mi barakhai hlé. Ravi thi thu khawm ûksak hman der lovin Ccpur tieng kan hung inthawk suoka, lampuia fâk le dâwn ding thua harsatna namênlo kan tuoka, rêl in nî 4 zet a mi nawt zêk a, lampuia nî 5 kan thang leiin lungril ka pêk theinaw leiin pawi ka ti hlê. Ama hrietzingna dingin inhnu fûtin ka la hung zîek hrâm a nih.
March 26, 1946, khan Frederick Antony Ravi Kumar Zacharias hi Madras khawpui (Chennai), Tamil Nadu, South India ah a pienga. Ravi Zacharias hi Isabella and Oscar Zacharias hai nau 5 laia a pathumna a nih. A seilienna ruok chu Delhi a nih.
A pu Oscar Zacharias (apa le hming inang) hi India mi English Professor dinga British haiin anruot hmasatak a ni nghe nghe. A puhai hi Kerela a lo chèng an nih. Kerela, Tamil Nadu le Delhi hai hi lungthu pathum anga a hringnun keiṭhuoitu le nasataka ṭhangpuitu an nih.
Zacharias' thlatu hai chu NAMBUDIRIS- Hindu puithiem laia ansângtak an nih. A pu puhai an'thawk German-Swiss missionaries fethlenga Kristiena lo inlet tah an ni. Kristien-a an inlet dân hi dangdai ve tak a nih. Tulai Quarantine anlâr hlea, hi hunah Pathien le inpawlnaa hmang le Krista tadinga inpe thar anlo um ve ngei ring a um. 1858 khan Basel Mission, German-Swiss Missionaries hai leh lo inhrie ṭan an nia, Zacharias' pi hin an thuhril hin a hne hlèa, sienkhawm hindu thiempu sûngkuo anni leiin natàkin an zila, an inṭhi bawka, missionary hai leh inhmu ngai talo dinga zil a ni leiin chu thu chu hril dingin (Ravi pi kum 103 chen damin a hrildân chun) Basel Mission ah a va fea, a um laitak chun vângneithlâk tâkin cholera hripui anleng thut leiin tûkhawm suokdawk loa inkhumhran, atuma um (Qurantined) dingin thu a hung tlunga, mission centre a a um hunah hin Krista Lal le Sandamtu in a pawma. Hi taka inthawk hin an sûngkuo Kristien an hung ta a nih. (Ravi Zacharias, Walking from East to West: God in the Shadow)
Qurantined hi mi tamtak tadinga sirbi pawimaw inchiktlâk hmun pawimaw a ni hlak. Mi ṭha tamtak sersuokna khawm a lo nih. Eini laia Quarantine Centre a ruok chu khawvél hlimhlawpna chêna nunkhuo phám ei tam. Quarantine sûnga Tûkhawm lut mei mei antheinaw a, doctor hai takngiel khawm PPE boa lut thienglo an ni leiin remchanga la antam hlé. Ṭhenkhat lem chu nun pawrche taka khawsa nuhmei pasal thua inzâkna um derloa hun hmang. Noah hun laia mihriem rîtlona kha danglamna a um tanaw hielin ka hmuh. Umdân an suksiet zo ta a, inpâwngnêknain a sip zo tah. Sodom le Gomorra suolna rapthlâk tak kha ei suolna le hin angkhat a ni el ta naw maw?
Ravi Zacharias' a pieng huna ruok hin chu an ringna a det tanawa Hindu le Muslim karah chêng anni ta leiin ringtu satlie (nominal Anglical members) chau an ni tah. Lekha inchûkna tienga hlawsam rawp hlak, nun beidawng le hringna suktawi nuom hiela chawlawl ve a ni leiin kum 17 mi chau a niin a hringna lâk nuom hielin poison a dawna, Lalpa'n thina varuom a hraw lai khawmin a sansuoka. Hospital ah Fred David, Director, Youth for Christ in a hung kan hlau ela, Bible a nu a pèk chu keuin Johan 14:19 'kei ka hring leiin nangni khawm hring in tih' ti hin a lungril a sunkawia; Thoma ang bawka zawna tamtak nei hlak a ni ang hrimin hringnaa a buoina chu a hrietsuok taa. Hi taka inthawk hin Krista Sipaiṭha hung ni ta pei a nih.
A dam hun sûng khan lekhabu ṭhatak tak 33 bàka midang le ziekkawp DVD narration hai le lem chu 50 chuong suksuoktu a nih. Lectures, Vedios le Youtube a rawngbawlna a màksan râwn hlê. Khawvêl hmun hran hran a Evangelical thuring khéksuokpuitu, humhimtu le ṭhalai lekhathiem tamtak ringna sukfietu a nih. Christian and Missionary Alliance chun 1980 khan ordination a pék a, 1984 khan Ravi Zacharias International Ministries (RZIM) andin a, 2017 khan Apologetics School a lo hâwng a nih. Evangelical Christian Publishers Association (ECPA) in a buotsai Gold Medallion Book Award khawm lekhabu pahni zet dawngtu le Christian Bestsellers Author nina hautu a nih.
Ama hrietzingna programme Passion City Church, Atlanta, Georgia ah US Vice President, Mike Pence chun hieng hin a hril, ' Ka ruolṭha, hunbi (season) popo a hmangtlâk, 19th century a mi dâwnril Sir Thomas Moore anga theina insângtak nei, 20th century ah rawngbawltu ṭha Billy Graham ang bawka 21st Century a Christian Apologetics ropuitak chu Ravi Zacharias hi a nih' a ti hiel. Tim Tebow chun a ngaisâng thu inzawtin 'Hero' a ni a ti hiel. Michael Ramsden President of RZIM chun, Ravi Zacharias anngaitlawm dân le Servant Leader ropui a nizie a tarlang bawk.
Alister McGrath, scholar le theologian chun 'Ravi Zacharias in rohlûtak a mi maksan pèkna a ziekna chun, 'apolegetics khawvêla inchiktlâk ropuitak a mi màksan pèka, ama ang hi vàngkhat te ei ni' a ti hiel.
A thi tawma Ravi Zacharias hril chuh, 'Keiin ka hringna lamtluong hi kum 17 chau dingin kan ngaia, sienkhawm Lalpa'n kum 57 dang a mi la keisei pêk hi ka lawm bék bêk' a tih.
Ravi Zacharias hringnun a hin inchûk ding a ṭhahnem hlê. Ziek sêng naw mei nih. Ṭhalaihai hin Krista hnungzuina kawnga hin insanmar a ṭhanglak a ṭul hle. Ravi Zacharias hmun ruok suksiptu ding ṭhalai hung zuongtho ṭeu hai sien nuom a um bêk bêk.
.jpg)
