The Church Of Almighty God/ Eastern Lightning/Christ Of The Last Days

The Church Of Almighty God/ Eastern Lightning/Christ Of The Last Days

Johny Laldinthar F. Tusing,

Saikawt, Churachandpur, 02^nd July, 2020.

Thuhâwngna

Tulai Internet khawvêl hmang ṭangkai in Social Media a hai Church Of Almighty God hai hin ram nasa takin anlak mêk. Ei ni lai ngei khawm ṭhalai tamtakhai laia Pathien Thu ni si an thuring inthûk taka hriet el thei si loin ram an hung lak ṭan mek niin anlang. Mi tamtakin whatsapp le messenger a hai chen anlo in chat pui ta hlaka, eini lai ngei khawm an thuziek hi Hmarṭawnga inlet a thedar ei um nuol niin ei hriet. Chuleiin hi thusep hi ziek makmaw a ngaiin ka hung ziek ve hrâm a nih.

Anṭan dân

The Church Of Almighty God (China ṭawngin Quannengshen ti a nih) inti hai hi China ramah 1991 khan a bul anlo ṭan tah (https://www.holyspiritspeaks.org/about-us-03/). Eastern Lightning tia hrietlar an ni bawk. Mat. 24:27, “Kâwl saktieng a hung inlep a, thlangtieng chen khawmin ân lang hlak. Mihriem Naupa hung nâwkna chu chuong ang chu a ni ding a ni sih a” hi an inghatna a nih. An website ka tiema ṭi a um hlê. CCP (Chinese Communist Party) in China ramah ringtuhai sukdudana le sukrinumna nasatak an’tlungtir chu remchanga la in Chinese House Church an’thawk hi inchûktirna hin bu a hung khuor ṭan a nih. Nuhmei pakhat Yang Xiangbin in abul a ṭana a hnunga Zhao Weishan chu an hotu lusa pawltak a ni bawk.

Yang Xiangbing hi China Saktieng ramah sûngkuo pângngai tak insûng an’thawk 1973 khan a hung pieng a. Thuthlung Thara Isu Krista ang bawkin Hun Tawp (The Last Days) tieng tuta hun ei hmang mêk a hin Yang Xiangbing  hi a hung pieng niin an ngai leiin ‘Christ of the Last Days’ amanih ‘Almighty God’ ti a nih. Mihriemhai anga hung insiengin a hung puitlinga, inchûkna mâksana House Church member pawimawtak a hung ni a nih antih. Mihriem pângngai nina a neia, Pathien tienga ruok chun Pathien nina famkim nei angin an ngai. Feb., 1991 khan Thlarau Thienghlim chuh danglam taka dawngin thu a sâksuok hlaka, a changin nikhata pakhat dâm, a changin ni hni dana pakhat dâm. Chuong thu a hrilhai lei chun kohranhai laia hlimna le lawmna antlun a; hieng thuhai hi Thlarau Thienghlim an’thawka thutin suok a nih antih. Hieng thu hrila umhai hi ‘The Word Appears in the Flesh” tiin Pathien thilthaw ngei le hun thara mihriemhai pawimaw hrilna anga an ngai leiin an tading chun Pathien Lekhabu Bible a nih. Hi lei hin The Words of the Holy Spirit to the Churches in the Last Days (Hun nuhnunga Kohranhai laia Thlarau Thienghlim Thuhai) lekhabu a hin Part-8 chen a uma, Bung dang danga ṭhe a nih.

Kum 2000 khan Zhao Weishan le Yang Xiangbin hai chu America ram tieng an pan a, New York khawpui an’thawk hi thuring hi ankhekpui ṭan a nih. Mormon hai le khawm in angnatak an nei. Bible hi huntawkin an hrietnaw (insufficiency of the Scriptures) leiin Utterances of God or Christ of the Last Day besanin anfepui nasa hlê. China ah inṭan in New York ah hmunpui neiin ram anlak pei a nih. Inchûktirna indiknaw ṭibaiumtak a nih.

An Thuring indiknaw ṭhenkhat

(1) Unitarian an nih. Trinity hi an ringnaw bur. Modalism (Pathien-a mi pathum a um theinaw a pakhat chau a nih; a hun izirin mi pathum-a anchang tia pawmtu) an nih.

Response: Eini ruok chun, ‘Pathien pakhata mi pathum, chatuon mi, Pa, Naupa le Thlarau Inthieng ei ring. Ropuina le Thilthawtheinaah inang seng an nih ti ei ring bawk.’

(2) Sandamna thua khawm an inchûktirna dangdai hle. Lunginsietna Hunah khan Pathienin ei suolhai a ngaidam ngeia, sienkhawm sandamna a la famkim naw a, mihriem suolna chu a la um zing leiin Christ of the Last Day or Church of Almighty God inchûktirna hmangin sandamna famkim ei chang thei chau tiin an inchûktir.

Response: Krista hringna, thina le thonâwkna lei chauvin lunginsietna leia sandam chatuona  hringna a um ti ei ring.

(3) Isu Krista chu Thuhtlung Thar hunah anlang taa, tuta Hun Tawp a hin Yang Xiangbin hi ‘Christ of the Last Days’ a nih an tih.

Response: Isu Krista hi Pathien Naupa khat neisun a ni ngei a, Nunghâk inthieng Mari sûngah (kum 2000 liem ta khan) Thlarau Inthieng thilthawtheina’n mihriemah a hung insienga, suol hrim neilo a nih ti ei ring.

(4) Church (kohran) -The Church of the Almighty God (Eastern Lightning) hai official website a chun, an Kohran indintu hieng ang hin anziek, “Pathien Iengkim Thawthei (Almighty God) ama ngeiin andin, ama keiṭhuoi le enkawl kohran a nih. Mihriem satlie hmanga indin a ni nawh; Tuta Lalram hunah hin Lalṭhungpha Vâr Lientak chu Pathienin a phursuok a nih; Kristien Kohran tum tumhai laia Thlarau Thienghlim an inhmang (loss) ta leiin Thlarau thienghlim thilthawtheina chu The Church of Almighty God ah annghat a nih” tiin.

Response: Khawvêlhuop Kohran thienghlim, mi thienghlimhai inpâwlkhâwm a um chu ei ring. Chu kohran chu Krista phun, Krista taksa, chatuon hringna Chanchinṭha puongdartu dinga mâwphurna pêk a nih ti ei ring.

(5) The Church of Almighty God hin Bible bâka The Word Appears in the Flesh (Holy Bible The Kingdom Age anti kher), The Words of the Holy Spirit to the Churches in the Last Days, Gospel Books (Testimonies for Christ of the Last Days, God’s Three-Stage Work, New Believers Essentials, Listen to the Voice of God, Gospel of the Kingdom), Judgment of The Last Day, Utterance of Christ, Books on Life Entry tihai hi Bible ang tluka anpawm a nih.

Response: Bible pumpui Genesis-a inthawka Thuphuongsuo, bu 66 hi Pathienthu, Pathien Thuokkhum le inkhêltheilo, Pathien Thlarau Inthiengin tienlaia miinthienghai kuoma a pêk a nih ti ei ring. Chuongchu a ni leiin ringna le rawngbâwlna dinga thuneitu insângtak a nih.

(6) Pathien hi hun thumah inlang a nih. Thuthlung Hlui hunah khan Jehovah a na, Thuthlung Thar hunah Isu Krista a nih. Hun Tawp hunah ruok chu ‘Pathein Iengkim thawthei’ (Yang Xianbin) hi a nih antih.

Response: Iengkimthawthei Pathien, hnuoi le vân le a sûnga thil iengkim siemtu le enkawltu ei ringa, Ama naw chu Pathien dang hrim an um nawh ti ei ring bawk. Pathien pakhata mi pathum, chatuonmi, Nina thuhmun, Pa, Naupa le Thlarau Inthieng ei ring.

(Hienghai bâka hin tamtak ziek ding a la um)

An hmalak Dân

Ringnawtu hai lai ramlak nêkin ringtuhai laia nasatakin beipui anthlâk a (sheep-stealing heretical group); an target le objectives chu ringtu-denomination dang danghai laia damte-a an thuring inhmin a, an pawla keilut an tum ni takin anlang. Ṭhalai inchûklai (students) hai lai a maka mak in Pathien Thutak hi hmaikawra hmangin ankhekpui. Khawpui hieng Hong Kong, New York, San Francisco, Seoul, South East Asian Countries hai hi an target bîk. A phutin biek inhawi deu, ringtu ṭhatak anga insal in damte in mi lungril hne antuma, a tawpa Yang Xianbin hi Pathien taksaa hung insieng angin an hril hlak. Tharum chen hmanga midang thuhne tumin hma anlo lâk ta hrim a nih- 2002 khan China Gospel Fellowship member-hai mi 34 zet an man a thlahni zet ancheltang. 2012 khan khâwvêl a tawp ding tiin an tlanginsampui nasa hlê. 2013, August thla khan pasal tleirawl Guo Bin chu a mit ankheldawk pêk. 2014 August thla khan nuhmei pakhat Wu Shuoyan chuh an pawla inṭhangluitir antum leiin Church of Almighty God member 5 haiin anvuokhlum der leiin Yantai, Shandong ah anreng hin thiemnaw an inchangtira, Feb., 2015 khan mi 2 chu China sawrkar in a lo sukhlum der el tah.

Social media hi an hmang nasa êm êm a, an website a facebook messenger a in chat pui el thei dingin technology an hmang ṭangkai a, online chat an nei zing bawk. An thuring hi whatsapp a hai a tamthei ang tak anthawn dar a, twitter a khawm tweets an nei zing. Gospel Movie clip hi ṭhahnem tak thiem taka inchangna hi an hau hlê. Facebook le Youtube a Pathien Thu le inzawma China hmêl put hai hi anni deu vawng a nih ti inla suol kher naw nih. An thuziek chu mani ṭawnga inlet a a tam thei angtak thawndar hi anlo thaw ta hrim a nih. Pathien Thu thiem taka hril si in, ei boruok tawng covid-19 hripui leia harsatna, lunginhangna le beidawngna hai hi ei khawvêl pal mêk le inhme êm êm in, mî hnê ngei tumin an thlêm hlak.

Thukhârna

Tirko Paula in Tirko Tehlêmhai  a hrilna 2 Kor.11 13-15, ‘Mi chuong ang mi chu, Krista tirkoa insiem fâwm, tirko tehlêmhai, sinthawtu mi hlêm hmanghai an ni sih a. Chu chu a mak nawh, Setan meu khawm var tirkoah ân siem fâwm hlak sih a. Chuleiin, a rawngbâwltuhai khawm chu felna tirkoah insiem fâwm hai sien khawm a mak a ni nawh, chuonghai tâwpna chu an thil thaw ang pei nîng a tih.’ hi ei hriet zing nuom a um. Isu ngeiin zawlnei/ inchûktirtu tehlêm hai an’thawka fîmkhur dingin hieng hin a lo hril, “"Zâwlnei tehlêmhai lai chun fîmkhur ro; chuonghai chu berâm vun silin in kuomah an hung hlak a; an sûng tienga ruok chu satene hnukinrawltakhai an ni sih a. (Mt. 7:15).

Walter Ralston Martin, “Father of Christian Cult Apologetics” chun ‘The Kingdom of the Cults’ ti lekhabu a ziekna a chun, ‘Ringtuhai hin zawlnei tehlêm le inchûktirna indiknaw hai thuhril thlitfîm harsa anti hun a la hung tlung ngei ding a nih, hienghai(cultic) hin kristienhai thumal (terminologies) hmang le an inchuktirna hmang siin hung hril antah, conservative evangelical hai chen khawm hlêmin la um ei tih...chuleiin cult apologists hi ngaipawimaw ding a nih” tiin a hril. Ei tulai khawvêl pal mêk a hin fîmkhur taka ringna kal ei chawi nuom a um takzet. Thu ṭha le sie thlitfîm, ṭheṭhawp thiem khâwpa mitvarna nei, andiknaw hai hnawl thei ding khawpa mani-a lo inbuotsai ei ṭul ta hlê. Hrietchienglo chu a hrie lemhai bierawna indawn vat vat hi ei him dân ding tak a nih.