LALPA ṬAWNGṬAINA

 

Lalpa Ṭawngṭaina (Mt. 6:9-13; Lk.11:2-4)

Johny Laldinthar F. Tusing, 3KM, Garampani, Assam, 3^rd July, 2021.

 

Lalpa ṭawngṭaina hi thuhlawm tlâwmte thumal 70 vêl chau second 30 vêla hrilzo thei ni si Ropuitaka induong a nih. Khawvêl thlâkdanglam khawp hiel
ṭawngṭaina a nih. Disciples’ Prayer (Zirtirhai ṭawngṭaina) tia hrietlar a ni bawk. Kohran puipa Tertulian (160-220 AD) chun, “breviarium totius Evangelii” (chanchinṭha lâktâwina bu le nitin ṭawngṭaina bu) a lo tih. Thuthlung Thar tienga mithiem NT Wright chun, “Indikna, nitin mamaw, ngaidamna le sansuokna dinga khêksuokna a nih” a tih. Pa Pathien kuomah inhnaitêa inbiekna in anṭan a, a ropuizie le thilthawtheina namdetin, hnîna in a zuia, a ram hung tlung dinga ngênna ṭawngṭaina a nih. Ṭhenkhat chun Hnina Pasari (Seven Petition) a ṭhe in Doxology in ansuktawp.

 

Kohran in ei ngaipawimaw leiin Inkhawmna hunah vêl tam ei hril taa, ei sunzawmpei ding a nih. Ei hril ngun leiin hril satlie mei mei, a umzie ngaituo chiengloa ei zo el a tam hlê. Lungril inthûk takin ei sui chun Lalpa Ṭawngṭaina ropuizie le hlutzie ei hriet thei. Mithiem tamtakin a lekhabu hiel siemin hrilfiena a kip a kawiin anziek a. Thusep pakhat chau a ngîl-a-ngâna hrilfie ruol ni naw nih. Chieng lema biechieng nuomtuhai chun hieng lekhabu-

 

R.T. Kendall- “The Lord’s Prayer”; N. T. Wright, “The Lord and His Prayer”; Timothy Keller, “Prayer”; Stanley J. Grenz, “Prayer: The Cry for the Kingdom”; C. Clifton Black, “The Lord’s Prayer”, R. Albert Mohler, “The Prayer that turn the world Upside Down”; Gary Millar, “Calling on the Name of the Lord: A Biblical Theology of Prayer”  le commentary dang dang tiem ding a nih.

 

Mi tamtakin ei suksuol rawp chu mimal hamṭhatna ding, mimal dingchangna ding, mimal mamaw chau thlîr in ei ṭawngṭai hlak. Isu Krista mi’n chûktir ‘Lalpa Ṭawngṭaina’ ruok hin chu- mimal hrilna bîk (singular pronouns) a ṭhang der nawh, pakhat nêka tam (plural) hrilna vawng a nih.  Kan Pa...Kan fâkkhawpin...Kan chungah...Kan ngaidam...Thlêmnaa chun mi (us) thuoilut...misuol lakah chun mi (us) sanhim... (emphasis added). Mani mimal suolna le mamaw hril lo ding tina ni lovin. Isu khan ‘Ka Ka Ka’ nêkin midang ṭhangsa (inclusive) dingin a tih.

 

A lâktawi

1. Pathien inpâk a ṭan (ding) a nih. (Kan Pa vâna mi)

2. Inzâna pêk (I hming inza um raw seh)

3. Pathien Lalram beiseina (I ram hung tlung raw seh)

4. Pathien ditzawng hnina a nih (Vânah I ditzawng thaw a ni angin, hnuoia khawm thaw ni raw se)

5. Nitina mimal mamaw ngênna (Nitin kan fâk khawp in bu mi pe la)

6. Thlarau thil ngenna- ngaidamna (kan thil suksuolhai mi ngaidam la)

7. Hratnawna leia thlemna an’thawk sanhim dinga ngenna suol laka sanhim ding)

 

Pathien le ei inlaichinna an’thawkin hieng hin hrilfie thei a nih.

Kan Pa – Pa le nau inlaichinna

I hming inza um raw seh  - Pathien le chibai bûktu

I ram hung tlung raw seh – Thuneitu le a hnuoia um

I ditzawng – pu le suok

Nitin kan fâkkhawp bu mi pe la- sawmdâwltu le hamṭhatna dawngtu

Kan suksuolhai mi ngaidam rawh – Sandamtu le misuol

Thlêmnaa chun mi thuoilut naw la - ṭhuoitu le ṭhuoia um (khuolfe)

 

Lungril Indik le Thlarau ram thlîrna an’thawkin

 

Kan – Mani hmasiel lo

Pa – Pa mi hmangaitu leh Family Devotion

I hming inza – inzana insângtak pêk

I ram hung tlung raw seh- ringum taka intuklutna

I ditzawng – inpumpêkna

Nitin kan fâkkhawp... – Pathiena innghatna

Kan suksuolhai mi ngaidam --- Suol sim

Thlemnaa chun mi ṭhuoilut naw – inngaitlawmna

Ramhai thilthawtheinahai ropuinahai – Hnena le Lawmna

Chatuona I ta – Beiseina

 

Umzie Hrilfiena

 

Kan PA vanah mi (Pa nina-Paternity)

Krista zarah Pathien sûngkuo a hung hai chauin Pathien chu Abba Pa ei ti thei. Amaa innghat tlattu hai tadingin Pathien chu PA (filial relationship) a nih. Isu Krista in Kross lera “Ka Pathien Ka Pathien” a ti naw chuh, a ṭawngṭaina hrim hrima PA ti hi a hmang hlak,. Pa hai chun ṭitna hmunah an mi thlamuon hlaka, beiseina mi petu, mi humhimtu le thangpuitu an nih. Lal ṭawngṭaina a PA ruok hi chu Vânah mi a nih, a va ropui deh! iengkim thawthei, iengkim hrie le hmuntina um a nih. Van chung sângtaka um rorêltu suisuokruollo (transcendent) a nih.  Ama chu iengkim neitu le a hnâr a nih (source of all resources). Pa tia kotu hai chun thuawina(obedience) neiin tiâwitakin anzui ding a nih. “Kan PA” tia ei ko hin Pathienin a na a hung sit a, a thilthawtheina le a vân malsawmna hawngin a nauhai a awplum hlak.

 

I Hming inza um raw seh(Pathien sie chunghnunglemna/ahmasatak sie-Priority)

Ei hringnun pumpuia Pathien hi a hmasataka sie ding ei nih. Ama chu inza, ṭi, chawimawi, inpâk le ngainaa lâwm ding ei nih. A hming inthieng (um tasa zing) ropuitak le danglam tak namdet in, a nauhai khawm inthieng ve ding ei ni zie a tarlang. Inza (hallowed) ti hi greek ṭawng ‘hagiazo’ anthawka laksuok ‘sukthienghlim’ tina anih. Pathien hming sam mei mei, sukpawrche amanih fiemthu thawnaa hmang dàm hi ṭi a um. “In var chu mi  mithmuah var raw se; chuongchun in thilthaw ṭhathai hmûng anta, in Pa vâna mi chawimawi an tih” (Mt.5:16)

 

I ram hung tlung raw se (Pathien Program)

Ringtuhai ei beiseitak chu Pathien Lalrama a rorêlna a nih. ‘I ram hung tlung raw se’ tia ei ṭawngṭai hin chatuona a rorêlna sukpuitlingna ding a nih. Kohran puipa Augustine of Hippo in City of God (Pathien ṭha ti dân âng taka khawpui um) a ti ang kha a nih. Ṭawngṭaina tamtakhai hi mimal tading (self-centered) a ni hlaka, Pathien Lalram tlungna dinga hnina chu a vang hlê. Lalram (basileia) hin ramri liendân a kâwk naw, hi nêk hmanin thuneina le inlalna a hril lem. Hi ṭawngṭaina hin Krista inlalna le thuneina a Lalram tlung ding a hril (‘hung tlung’- ‘erchomai’ hi aorist active imperative a ni a, ‘hung tlung vat ding’ hrilna tieng a kawk). Pathien Lalrama chun Ama le Ama chau chu thuneitu le Lal a nih. Hi khawvêl ei hmang mek (here and now kingdom) hri le hrai, suolna le inthimna in a mi chîm mêk a hin, ei lungrila Pathien thuneina le inlalna chang dinga hnina ṭawngṭaina a ni bawk. Pathien ditzâwng thawtuhai lungrila Pathien chu Lal a nih a, hlimna in ansip hlak.

 

Vânah I ditzawng thaw a ni angin, hnuoia khawm thaw ni raw se (Pathien Thiltum-Plan)

 

Khawvêla cheng ei la ni leiin Pathien ditzawng angtak thaw le zawm a ni nawh a sukchieng hlê. Pathien ditzawng thawtu vân mihai zierâng Lal David chun inpâkna hla'n a lo siem “A vântirkohai, a thu ngaia, a thu zâwma, hrâtnaa ropui hlakhai, LALPA chu inpâk ro” (Ps.103:20). Hnuoia khawm ama ditzawng thawa a um theina dingin theitawpin, lungril takin, titakzetin ei hni ding a nih. Pathien ditzawng ṭha le famkim a tlung theina dingin ei ngên rawp ding a nih. Inditna dam, chapona dam, indiknawna, hlêprukna, felnawna, rîtlona, pawrchena dang danghai bânsan a Pathien ditzawng thaw dinga insukhrat ding ei nih. Pathien thiltum chu Ama ditzawnga um, thaw le kalchawi a nih. Lal ṭawngṭai I hril an'thawk Pathien ditzawng thaw dingin thuthlukna I siem ta am? annawleh insam vêl mei mei?

 

Hnina ṭawngṭai Pathum danghai hi mimal tieng hrilna a nih; Ei nitin a ei taksa mamaw, lungril ngaituona, ei hringnun le hun liem ta hnung, thlarau hringnun le hmatieng a hril.

 

Nitin kan fâk khawpin bu mi pe la (damna dinga Pathien ruohmangna-Providence)

 

Hi hnina hin thil panga a fûnkhawm- fâk ding, petu, hnina, hnitu, le ahun. Mihriemhai damkhawsuokna dingin fâk ding ei mamaw, hi ding renga siem le induong ei nih. Sil le bil fâk le dawn hi ei pawimaw leiin a mi pe theitu kuomah hni ding ei nih. Malsawm tlâka taima ding khawm ei ni bawk. Nitin ei mamaw a ni leiin nitin ei damna dinga Pathien kuoma intluna ṭawngṭai rawp ding ei nih. Israelhai khawm manna le vamim in nitin a châwm an ni kha. Karkhat sung, thlakhat amanih kum khata ding a ni naw, nitina ding a nih, nitin Pathiena innghat a pawimaw zie ei hriet thei. Krista in kei hi hringna bei ka ni a ti hi nitina thlarau bu mi petu a nih.  Nitin hmuthei le hmutheiloa Vân Pathien malsawmna ei dawnghai hi a man a to ngei deh!

 

Kan chungah thil suksuoltuhai kan ngaidam angin nang khawmin kan thil suksuolhai mi ngaidam la (Pathien ngaidamna-Pardon)

 

Suksuoltu ti hi a ṭawngbul tieng chun ‘opheilema’-bat (Matthai) le ‘hamarta’ –suol (Luka 11:4a) ti a nih. Suol hin Pathien laka bat lientak a mi’n neitir a, chu batna lekha chu ei nuom el a thaibo theilo a nih.  Rom sawrkar hnuoia tâng inah um tâmtakhai chu bat neitu an nih. Bat neituhai chu tuorna tamtak an fe thleng hlak. Bat neitu ngâidamna chu lunginsietna le zangaina inthûktak suklangna a nih. Achung chara hi taksa mamaw hnina a nia, hi ruok hi chu thlarau tieng mamaw hrilna a nih. Mi suol felna hrim hrim neilo thiemnaw chang, Pathien lungsenna ei chungah bunthlâka um ding ‘batna lekha’ thaibo a ni theina dinga Pathien ngaidamna hnia Pathien le inlaichinna nei dinga hnina a nih. Pathien ngaidamna changhai chun midang ngaidamna nun an nei ding a ni bawk.

 

Suol dinga thlêmnaa chun mi ṭhuoilut naw la, mi suol laka chun mi sanhim lem rawh

(Pathien venghimna- Protection)

 

Pathien thienghlimna le ṭhatna in tukhawm suolnaa le thlêmnaa a thuoi ngai nawh. Pathien in tukhawm a thlêm ngai nawh (Jk.1:13). Hi thu hi Kohran puipa Chrysostom chu hieng hin a lo hrilfie- “Intlana umhai lungril inthuktaka suol le thlemnaa tluk inlauna le ṭitna anthawka sanhim le venghimna dinga hnina a nih” a tih. Hi ṭawngṭaina hin suol laka ei himna tak 'Pathien Thu' a ei intuklutna ding a ni ti a mi hril. I chungah thil ka suksuol nawna dingin I thu chu ka lungrilah kân khâwl khâwm a (Ps.119:11).

 

"Ramhai, thilthawtheinahai, ropuinahai, chatuona i ta a ni sih a," AMEN. (Pathien chunghnungna- Preeminence)

 

Doxology (Pathien chawimawina hla) hi original manuscript a chun a um ta nawh, Didakhe (Didache, AD 70-100 inkar vela ziek; Apostles hai thuziek ngeia ngai) an’thawka laksuok niin mithiemhai chun anhril. Ziek thenkhata chun a hnuoia footnotes in ansie ve thung. Hi doxology hi Lalpa ṭawngṭaina, a thu danghai le anmil thlâpa, a sukropui zuol hlê bâka Bible ziek danga hieng ang chawimawina thu hi ei hmu. Pathien chunghnungna, a ropuizie le chatuona lalram, thuneina, hnena, lawmna, beiseina le ropuina neitu a nina a namdet. Aw LALPA, ropuina dâm, thilthawtheina dâm, chawimawina dâm, hnena dâm, inlalna dâm I ta an na...(1Chron.29:11)

 

Tiemtu dittak, LALPA Ṭawngṭaina hi iengtin am I lo sui ve hlaka, Kohran thawdan a ni leia hril/insam vêl mei mei am ei ni? A umzie inthuk taka ngaituoin ûntak le inza taka hril ding ei ni ti hi hrie thar seng inla ei nuom hlê.