Hun Tawp Hrillâwkna
Johny L.F.Tusing, 7 July, 2021.
Hun tâwp hrillâwkna hi lientak a nih a, hi hrillâwkna laia pakhat chu Israel hrillâwkna hi a nih.
Pathien le Abraham khan Thuthlung (Covenant) ropuitak an neia, hrillâwkna le inzawmin pangâ zet a ṭhe thei a nih, chuhai lai Reciprocal Covenant (Inbâttuo/inlettuo Thuthlung) hi pakhat a nih. Hi le inzawma ziek ding tamtak a um a, point pakhat chau hei suklang ei tih.
Israel hnam le ram ṭhangpuitu le humhimtu an dingchang zat zat a, dolêttu le suksie tuma beituhai hneban in an um zat zat. Pathien Thuthlung a ni tlat leiin.
"malsâwmpêktu che taphawt chu malsâwm ka ta, ṭawngsie inphurtu che chu ṭawngsie inphur ka tih"
(ix.) Israel in Thlaphur ni 14, 1948 a zalênna a hmu khan Palestina le Muslim ramhai in anpawmpui naw a, thethlâk tumin anbeihrawn char char a nih. 1967 khan United Arab Republic (UAR) ṭhangruolpawl indinin Jordan, Syria le Palestina ṭhangruolin Israel kha hmar, sim le saktieng an'thawkin an bei ta chiem el a, Israel sipai thahratna a zuk hneban el ruol a ni nawh. Arab sipaihai kha mi 5, 47, 000 chuong anni lai Israel ruok chun 75, 000 chau a nei. Arab sipai khan indona tanks 2504 le indona vuongna 957 lai a nei a, Israel ruok chun tanks 800 le indona vuongna 250 chau a nei ve thung. 1967 thlado ni 5-10 inkar khan inhmatuo in an indo el taa, Israelhai mi 983 in anthi phaa, Arab rambung tieng ruok chu mi 18, 200 chuong an thi a nih. Hi Indona hi Ni ruk indo (Six-Day War) tia khawvêl hrietlar a nih. Israel hai chun mak danglam takin hnena changin ram iemanizat anlak belsaa, an thuhnuoia a um pha bawk. Hi Indona hi khawvêl chanchina theinghil ni um ta nawh ni.
Israel Prime Minister hlui Benjamin Netanyahu in 2015, Changer thla 1 nî-a United Nations General Assembly a thuhrilna a nei kha vawisun chena mi lungrila thu a la hril. Hi a thuhrilna hin Juda mipuihai danglam taka humhima an um dân a nih-
“Juda mihai sukmit tumtu hi suon(generation) tin deu thaw in an um hlak. Babylon le Rom lalram anthawkin suksie letder tumin an mi bei chiem a, Pogroms(Russia- Czars) dam Holocaust(Hitler- Nazi) dam tuorin, harsatna rûnpui kan fe thleng hlak; Israelhai tuor ang hi tu hnam khawmin anla tuor ve nawh. Sienkhawm Israel mipuihai hi danglam taka humhim anni hlaka, humhim ni pei bawk an tih. Rambung ṭhenkhat le ṭhuoitu maktak tak mi bei tumtuhai hung suok hlak hai hin hi hi hrezing ro: “Vawisûn hin Israel ram aiawin hi lai hin ka ngîr a, hi ram hi kum 67 chaua upa nisienkhawm hi ram le mipuihai hi kum 4000 chuong chanchin ropuitak nei kan nih. Babylon le Rom lalram ropui angin inlanghai sienkhawm hi rambung inkhawmna hin anṭhang ve ta nawh, hnebân theilo lalram anga inlanghai kha hmu ding an um ta naw a, tienami ang chauin an inchang tah. Israel ram le mipuihai ruok chu hringzing a ta, damzing bawk a tih"
A dang khawm hi blog a hin kapkai pei dinga ei riruong a nih.
.jpg)