Corona Virus hi Pathien hremna a ni am?
Thuhâwngna
Rawngbawltuhai hin nitin hun hmangdân ding Itinerary ziek a ni hlaka, vawisun (9th June, 2021) hi Bible, lekhabu tiemna nîa ka ziek a ni leiin ka hun ka hung hmang țangkai nâwk vat a nih.
Natna, hripui le ei hringnun
Ei hringnuna harsatna, tuorna le rimsîkna ei tuok chang hin mitin sungril a tawk tei hlak. Pathien mi hremna a ni el am? Pathien lungsenna a hung tla el am antah? Ti zawnahai hi hrilsuok ngai naw inla khawm ei lungrila ei vâwn zing hlak. Hripui nêlumlo zetin a mi nuoia, tukhâwm thlîrhranna nei loin a mi bei annaw am a nih!! Phillip Yancy in “Natna ei tuor lai Pathien khawlai am a um â? A lo ti kha lungrila a thar naw theinaw. Hi hripui hin rawngbawltu ditumtak tak țhahnemtak hringna a sûta, ținzai le inkiengzai a la rêl chuongnaw. Țhangtharhai lai hin ngaituona mak danglamtak a um chu, țawngțai khawm umzie a um nawh, ei țawngțai le țawngțai naw thuhmun char a nih, a tlung ding chu a tlung tho tina lungril hin bu a khuor nghet deu deu niin anlang. A pawi khawp el.
Sietna rûnpui a tlung hunah hin mihriem lungrila Pathien hremna nia ngaina hi hun liem taa khawm khan a lo um rawp hlak.
1. Spanish Flu 1918 kha Indopui Pakhatna leia Pathien hremna, neksawrna leia midang inawpdena; Pathien pawi tawk leia tlung niin tamtak chun an ngai.
2. 1987 lai khan AIDS Natna hi nuhmei pasal thila suolna leia Pathien hremna niin mi 100 a 43 hai chun an ngai.
3. Liberia ramah Ebola virus hung suok 2014-15 khan, Liberia kohranhai chun Pathienin a ram pumpui hremna dingin a hung tir niin an ngai. Liberian Council of Churches chun hienghin thusuok a siem hiel, “Liberia chungah Pathien a lungsen leiin hripui Ebola a hung tlung. Liberia mipuihai chu țawngțaia Pathien zawnga, fâkrukna, nuhmei pasal thilah suolna an’thawk thuphachawi ding le Simna neia Pathien ngaidamna hni dingin…” tiin.
4. Nikum Feb.26, 2020 nia Christian Post a Leonardo Blari chun hieng hin Corona hripui le inzawmin a lo ziek; “Corona hi mi nuoi tel that chimitna dingin thina vantirko Pathienin a hung tir a nih. Hi hripui hi Pathien hring hrelo Communist ram China Kristienhai suknawmnatu an’thawkin anțan. America ram khawm a suolna intlengfaina ding a nih. Pathien nghatsanna, indikna in hmun a chang tanaw leia thina vantirko in khawvel a dapsuok antah” tiin.
5. Israelhai inchûktirtu Rabbi pakhat chun “Israel ram chen hi hripui leiin a mi nuoi hi nei inang uol-âu taka lamhrawna dam ei nei leia Pathien lungsenna chawkthona a nih” tiin.
Hieng a chungah tlâwmte ei tarlanghai khi indik vieu dinga ngai thei vawng a nih. Pathien lungsenna/hremna leia tlung a nih am? ti hi andik thei a, andiknaw thei bawk. Corona Virus chungchanga khawm andik thei a, andiknaw thei bawk.
Corona Virus hripui leia ei hriet ding:
1. Natna, thina le sietrup tlunghai hi suol leia um a nih. Khawvêl inrûmna hi Adam le Evi bawsietna leia ințan a nih. Chu suol leiin khawvêl hi hrem (rorêlna) tlung a nih. Suol leiin Pathien thilsiem țha êm êm chu thilsiemhai inrûmna in anchang zo tah. Thilsiem po pohai chu tu chen hin inrûm le nauhasena tuorin an um tâwl ti ei hriet sih a (Rom 8:20-22)
Hi char hi a ni Max Lucado in “Loved by a Trusworthy God” a ziekna a, “Khawvêl le a sûnga umhai hi nuhmei inrai ang a ni taa, nauhase invawi mêk nei el dinga a hun tawp tieng na tuora inrûm inrûm el ta, chu lampuia um ei ni lein hun tam chu ei nei ta nawh” tiin a lo hril. Corona hripui hin chu inrûmna sukzuoltu chu a ni ngawt el.
2. Natna, hripui le sietna hai hi mimal le ram suksuolna leiin Bible ah a lo tlung hlak
(a) Abraham in a nuhmei Sarah himhim nuom luot leiin ka farnu tiin a thup leiin Pharao le a sûnghai chu hripui nasatak an tuor pha. (Gen.12:17)
(b) Pharoah le Aigupta mihai chun Pathien anhnawl leiin hripui nasatak an tuor (Exo. 7-12)
(c) Miriam le Aronin Mosie an hrilsiet leiin Miriam anphâr (Num. 12:1-12)
(d) Philistine mihai in Pathien bâwm ansukkhawlo leiin hripui maktak (țhenkhat lem chun buboni plague ang kha ni dingin anring) in a man tawla, an tuorna leia an khekri chun van khi a hang tlung hiel. (1 Sam. 5:12)
(e) Lal David suksuolna leiin Israel mipuihai lai hri Lalpa’n a tir (1 Chron.21:14)
Hrillâwkna tla tlung ding chu Inchikna Palina- Sakawr palina (fourth horseman) chunga chuong chu thina ning a ta, hnuoiah hmun lia țhea hmunkhat hi la fen hmang a tih (Thup. 6:6-8)
3. Corona Hripui hi Pathien Lungsenna bunthlâkna a ni ti tukhâwmin chiengdawtin ei hril thei nawh. Ieng lei? Pathienin a mi hrillang naw tlat leiin. Mi tû amanih in “a nih” ti chiengdawtin a hril thei chun Pathien thuruot inthupa a țhang ve tina ning a tih. Chuleiin, ei hriet tlat ding chu, “Pathienin a mi hrilhai uksak ei ta, puongsuok ding le hril dinga a mi tihai hril ei ta, Pathien a to a ni chun eini khawm to ve el ding ei nih. Corona Virus hi Pathienin a mi hrilna fie kawngin ei hriet si naw chun a ni le ani nawa hin ei to ve el ding a nih.”
Corona Virus hi Isu’n ieng tin am hril veng a tâ?
Țumkhat chu tuhai amanih chun Isu kuomah, inthawina thisen chu Galili mihai thisen leh Pilat in a chawkpawl thu an hrila. (Lk. 13:1) Galili khuolzinmihai (Galilean Pilgrims) hi Rom bawrsap Pilat in dodaltu le kaltu in a ngai an nih. Hi lei hin a sipaihai hmangin mi tamtak thatin chuonghai thisen le inthawina thisen chu chawkpawlin an hriet a nih. Isu hunah Juda țhuoituhai lungrila um tlat chu, “Mi țha chungah thilțha a tlunga, mi țhalo chungah thil țhalo a tlung hlak” ti hi a nih, Hi ngaidan char hi Johan 9: 1-2 a mitdelsaa pieng sukdam thu a khan hmu thei a nih. (cf.Job 4:7-8)
Isu Krista thlîrna tukver ruoka chun chuongchu a ni ve nawh. “Galili rama mihai chu, chuong ang thil an tuor lei chun Galili rama mi danghai popo nêkin suol bîkah in ngai am a nih? Ni lo e, nangni khawm in sim naw chun, chuong ang bawk chun bohmang vawng in tih.
Corona hripui leia thina tuokhai, natna tuortuhai hi an suksuol lei ning a tih? Ni lo e. Kent Hughes chun, “hieng ang ngaidan hi awmtak a ni, țhatna, nunchang chunghnunglem na hi ei himna dingin ei ngai hi indikin inlang sienkhawm a ni vawng kher nawh, mani chit in enfel lem ding ei nih” tiin a hril.
Galili mihai chungchang a hril zovin “Siloam in insângin mi 18 a delhlum khawm kha, Jeruselem ah um popo nêkin mi suol bîk ni dingin in ring am a nih? Ni lo e, nangni khawm in sim naw chun, chuong ang bawk chun bohmang vawng in tih.
Hi lei hin Corona Virus hripui dâm, thlipui tsunami amanih, lirhning le tuilet a tlung hunah hin Isu’n a mi hril ding chuh- SIMNA EI ȚUL ti hi a nih. Simna ei ti chu lungril putdan thlâkdanglam (gk- Metanoeo). Isu Krista hi Pathien naupa, ei suol intlanna dinga Sandamtu a nih ti ring nuomnaw an’thawk ringna lungril inthâkdanghlamna. Suol thaw an’thawka thaw talo dinga lungril inthlâkdanglna hi a nih ‘SIMNA’ ei ti tak chuh. Philip Henry chun, “Pulpit a thi ding ni lang khawm, simna thu hril puma thi ka nuom, Pulpit puotieng thi ding ni lang simna nun hmanga thi ka nuom ie” tiin a lo hril. Martin Luther in 95 Theses Wittenberg Cathedral ah a târ a khan a thesis hmasataka ziek chu “Ringtuhai popo lungril ding chu SIMNA a nih” tiin a ziek.
Isu Krista hin harsatna inthim samup ei tuok laia a hril ding nia ei hriet chuh- “Ka chungah in lungril pût dan hi thleng ro, hotu ropui (great teacher) el amanih reformer (siemțhatu) ang chau ni lovin In SANDMTU ka nih ti lungril input theina dingin sim ro, chuongang bawkin nitina in hun hmang dâna ka thu anga um dingin in lungril thlâkdanglam bawk ro”
Corona Virus le inzawma Pathien rorelna a ni am? Pathien lungsenna leia tlung a ni am? ti neka zawna pawimaw lem chu Pathien leh kan inzawm am? Pathien leh kan lêng hmunkhat am? ti hi ni mawl rawh seh.
Thukhârna
Corona hripui țibaiumtak hi ei thoharna dinga kona (wake-up call) lungril sungril chen suntlang thei khawpa inring nisien. Hi hripui hin Krista mi’n hnaitir mawl sien, Pathien lawmnaw zawng taphawt an’thawka ei insiekieng theina dinga mi keihartu rî (alarm) ni ngei sien. Hi hun hi ei tadinga hun țha Krista hung nâwk hunah eiin zozâp theina hun țha inchang mawl raw seh. Rorêlna Nî chu a hnai deu deu antah ti hi hripui hin a mi hril. Thlarau ram thlîrna an’thawkin, hi hripui hin hmatienga thiltlung ding hi mi’n hmufie tir sienm nuom a um hlê. Ei Lalpa tuok dingin inzo a hun tah. Hi hun țha hi bawpel lovin, hmang țangkai ngei ei tiu.
.jpg)
.jpg)
