Hun Inchiknahai- The Sign of the Times

Hun Inchiknahai- The Sign of the Times (Mt.16:3)

(20 May, 2021, 3KM, Garampani, Assam Mission Field ah kan posting laia Article ka ziek a ni a, ṭhenkhat hi chu ṭhe khatnaa ziek um met met khawm a um. Ziek dân ang anga sie el a nih.)

Inzinmi ei ni chun lampuia inchikna(signs) pawimawzie hrie ngei ei tih. Khâwlaia um am ei ni â? Ei tumram tlungna dingin ieng chen am hmabâk a la um â? tihai hi awlsam takin ei hriet thei. Lamlien a Inchikna (sign) hai hi inzinmi le lampui hrawtuhai ta dinga, tluong le damtaka ei tumram tlung theina ding an nih.

Khawvêl ei khuol inzinna a khawm hin Inchikna (Sign) hi ei ngaipawimaw naw a ni chun la boral ngei ei tih. Pathienin lamțhuom tinah inchikna a mi siempêk a, chuong inchikna hmangin khawlaia um am ei ni â? Khawtienga fe am ei ni? Tihai hi chiengdawt in a mi hrilpêk.

Ei thuring Bible a hin chuong inchîknahai chu indikthlapin a tlunga, a la tlung pei ding khawm tamtak a um. Inchikna tamtak hmuthei le hriet theiin ei khawvêl hi a’nher peia, inher zing bawk a tih. Khawvêla thiltlunghai hin hun tâwp chu ei pan pei an tah ti a mi hril. Middle East ramah buoina dâm, Russia le Iran hmalâkna le hmasâwn dan dâm. Nuclear ramthuom siemsuokna, globalization, sietrup tlunghai (natural disaster), natna le hri inleng (pandemic-pestilence and plague) hai hi ei lampui hrawnaa inchikna (sign) hai hi ei nuna ieng thu’m a hril ve a? annawleh ei hmu țhel lem el am?

Țhalai tamtak le mimir khawmin hiengang tinzâwna thuhril le thuziekhaihai hi, nghawkum le ngaipeinawna dâm, a tlung ding rênga ngaiin ngaizamna ei nei pei tah.

School ah rawngbâwl kan ni leiin nitina kan sin pawimawtak chu School kai a nih. April, 30, 2021 khan Pawl 8 hnuoitieng po inchûkna hmun khâr dingin Assam sawrkâr in thusuok a siema, Class-8 hnuoitieng po chu châwl kan puong zui nghala. May 5, 2021 in inchûkna hmun po po khâr vawng dingin thusuok thar a hung siem nâwka, Class-IX & X khawm chu kan khâr ta peia. Lungril sâwl le intar taka kan umlai, lekhabu tiemna hun țhatak ka nei thei ding leiin ka lawm rûk hlê el. School a thawk chu mi hrietlo hin sâwl a um in, ei hunțha po po hi a mi lâkpêk vawng ti inla suol kher naw nih. Ei khawvêlin a hmasuon mêk le ei tawng mêk ngaituo in Apocalyptic & Prophetic lekhabuhai ka tablet(e-device) a ka lo lâkkhawmhai ka en a, Father of Modern Biblical Prophecy an ti hiel Dr. John F. Walvoord lekhabu dâm, Apocalyptic & Prophectic Scholar Dr. Mark Hitchcock le Dr. David Jeremiah-hai lekhabuhai chu tiem dingin kan sukthlûka. Ni thum lai ka tiem tlut tlut a, ka hlawkpui hlê. ‘Inchikna Lekhabu’ ti ang dâm hi hmarțawng ngeiin ziekin hrillâwknahai hi suizauin, mâwl tak siin ziek thei nisien âw ti dâm ka suongtuo vâwng vâwng el. Kei hlakin ka zuk thaw el thei si nawh.

Ei Lalpa Isu Krista khan inchikna kha a hril rawp hlak. Țumkhat chu inchikna le inzawmin Pharisaihai le Saddukaihai chun ama fiena dingin vâna inthawka inchikna anni in entir dingin an hni a, Isu’n inhmatuoin a kâwk el taa,  khawmuol inher dân hrietna tienga insângtak nei (meteorologists ang) nihai sienkhawm,  hun inchiknahai (the sign of the times) an hriet fie thei der naw thu a hril (cf. Mt.16:1-3). A vawikhat hungna a khan inchikna an hmu țhel duoi a, Messie a ni ti khawm hre theilo hielin an mit an sukdel a nih. Hi ang bawk hin, Isu hung nâwkna dinga inchikna hmu thei derlo le hre nuom derlo hi ei pung deu deu. Tulai khawm thiemna tieng insângtak, hrietna tienga khawm inthûktak nei, Bible ah inchikna ruok chu hre nuom derlo ei tam êm êm tah. Matthai 24:4-28 ei tiem chun Isu’n a hung nâwkna dinga inchikna hrilin chuong inchiknahai chu ei Bible hmangin ei kuomah thawn tlungin (telegraph) a um a, ei hriet nuom naw ruok chun ei mawphurna nîng a tih. Luka 21:25 a chun vânah inchiknahai (cosmic signs) chieng deuin a mi hril. Isu’n ama hnungzuituhai chuh chuong inchiknahai chu na sit tlat dingin a mi hril.

Hieng inchikna ei hmu le ei hriethai hin lampui intluonin mi țhuoi sien, kho panga mi peihmangtu ni naw sien, ei tumram tluong taka ei tlung theina dinga inchikna ni mawl raw se. Hieng inchikna le inzawm hin ei hriet tlat ding chu- (1) ințhinaa hmanglo ding, thiltlung taphawt (every event) hun tâwp ding anga hril vûm rak hin Bible hrillâwkna a hril nêp hlak, (2) Khawvêl chanchinhai sie chunghnung hmasa lovin, Pathien Thu a hmasataka sie ding. Bible in iengtin am inchikna a mi hrilâ, ngaiven hmasa phawt ding (țhenkhat in thiltlunghai hi Bible ah iengtin am an zieka ti sui ei tum lem hi ei thawsuol rawp hlak, Bible in iengtin am a mi hrila ti hi thaw dân indik a nih- Scripture First (3) Inchiknahai hi Isu hung nâwkna (Second Coming) hrilna a ni tlângpui. Isu hung nâwkna (return) a hnai ta chun Rapture chu tlung thei zing a ni tah.

Rapture hi iengtik hunah khawm tlung thei zing (imminent event) a ni zie ei hril nghek tah. A tlung ding a ni ti chu ei hriet, amiruokchu a hun ruok chu ei hriet nawh. Mitkhapkâr lova tlung thut ding a ni khawvêl hi a barakhai hlê in a chiâi hlê bawk ding a nih (cf. Jn.14:1-3; 1 Kor.15:51-53; 1 Thes.4:16-18). Ringtuhai ruok chu Lalpa tuok dingin vân boruoka lâktungin ei um ding a na, rinumna hun ei tuor ta naw ding a ni leiin hi Pathien sansuokna ropui a ni hrim a nih. Dama lo la um zing ringtuhai in rinumna (Tribulation) an’thawka sansuokna a ni ding a nih. Chu umzie chu Rinumna (Tribulation) tlung hma in Rapture hi a tlung ding a nih. Hi hi a ni Pre-Tribulation ei ti tak el chuh. Ei pawm dân khawm a nih. Rinumna hun hi kum sari sûng âwng a ta,  rinumna hun tâwp tieng chenve (kum thum le chenve) hi rinumna râpthlak (Great Tribulation) ti a nih (ref. Mt.24:21). Hi hun sâwtnawte sung hin Krista Kaltu (Antichrist) in thuneina kengkâwng a ta, khawvêl sawrkârna, sumdawngna, sakhuona hi a thuhnuoia sieng a ta, khawvêl pumpui hi ama thuneina hnuoia um in sukrimsietna, hremna le suknawmna nasatak tlung bawk a tih. Hi hunah hin inchikna sahrang nambar neihai chau naw chun tûkhawmin iengkhawm an inchâwkin an zawr thei naw ding a nih. Chu nambar chu za ruk sâwmruk paruk a nih (cf. Thup. 13:1-18).

Hun nuhnunga thiltlung dan ding:

Isu’n a mithienghlimhai a lâwr(Rapture) (1 Thes.4:13-18) zoa hin, Krista rorêlna țhungpha (The Judgment Seat of Christ-Ringtuhai rorêlna-2 Kor.5:9-10; 1 Kor.3:10-15) um a tih. Hi rorêlna hi Rapture zo, Rinumna hun sûng, kumsâng rorêl hmaa tlung ding a nih. Hi rorêlnaa hin ringtuhai ei thaw ang sengin rêl pêkin um ei tih. Rinumna zoa hin a mithienghlimhai leh Isu hi a hung ta ding (Second Coming of Christ- Thup.19:11-21; Mat.25:31-46) a nih. Rapture zoa hin Rinumna hun hi iengtik hun taka ințan diem ana? ti hi chieng dawtin hriet ni naw sienkhawm karkhat hnung amanih thlakhat, kumkhat amanih nêka tam hnunga tlung ding ni ngei a tih. Hi Rinumna Râpthlaktak zoa hin Armageddon (Megiddo tlanga indona- Thup.16:13-16) Indona râpthlaktak tlung a tih. Hi zoa hin Setan hne/tukdei in um a ta, Krista Lalram indin kum sâng lalram (Millenial Kingdom- Thup.20:1-8) um tâng a tih. Hi zoa hin  Lalțhungpha vâra inthawka rorêlna (Great White Throne Judgment-Ringlotuhai rorêlna- Thup.20:11-15) um a tih. Setan le a rawihai thiemchanglo hai popo chu meidil ah pei in um tâng an tih. Vân thar le Hnuoi thar (New Heaven and New Earth- Thup.21-22) umin Chatuon (Eternity) a ni ta ding a nih.

Rorêlna pahnihai a inthawka ei hriet ding- (1)  The Judgment Seat of Christ: Chatuon hun thlîr zinga Pathien ringumtaka zui ding ei nih, ei the ang pei ei sîk ding a nih (Gal.6:7), inhlêm lova Pathien mission a hin ei thaw fan fan ding a ni hrim a nih, chu thilțha thaw dinga siem a um ei ni leiin nghawk naw mei nih (Gal.6:9). (2) The Great White Throne Judgment: Hmatienga thil hung tlung ding hi hrezingin Simna lungril put-â Pathien pan-a, Chanchințha hi ring ding a nih (Mk.1:15); muongchang ta lo in hun țha sandamna hun hi bawpel lova Pathien zawng ding ei nih, chuongnaw chun thiemchang lovin chatuon meidil a pei in um ve hlau rawi ei tih. Isu Krista hung hun ding hi tûkhawmin ei hriet si nawh (Mt.24:36).