Rawngbâwlna Hmun 3KM, Garampani, Assam Mission Field Kan Panna Lampu

Rawngbâwlna Hmun 3KM, Garampani, Assam Mission Field  Kan Panna Lampui

Covid-19 hripui inlêng lai nisienkhawm, Secretary Missions, Independent Church of India in kan rawngbâwlna ding tieng pan el ta dinga inhriettirna a mi pêk dungzuiin; Changer (October) tarik ni 4 Zân 8 vêl in Saikawt, Tuiṭhaphai suoksan in kan rawngbâwlna ding Carmel Standard School, 3KM, Garampani, Dima Hasao (Assam Mission Field) chu kan pan taa. Covid-19 boruok lum ṭhatlai a ni bawk leiin Check Post ṭhenkhat khat a harsatna kan tuok thei ding anga a’n lang leiin SP Office, Churachandpur a hai chen Addl.SP ka lo hang inhmupuia lekha pawimaw ka lo hang lâk dawk hrim a nih. Zânah suoka check post harsatna ding hmun haia zânah vêk tlan lut dingin kan in riruonga. 

Zân thlavai tak hnuoia chun kan sûngkuo mi 4 bâka driver 2; Zohminglien Zote @Zoa le Buonthangrum @Thangrum hai leh kan suok a, ruo a sur deu chap chap zinga. Kan hang tlân pei a, Bishnupur-Nungba By-pass Road a fe dingin kan insukhtluka. Ruo a sûr nasa hlé leiin lampui hmufie hlei theilo khawpin airawching a thaw a. By-pass lam lailungna lâitak Joujangtek phâk hma si lai chun mimkei (landslide) nasatak in, kan hmaa a hung bei ta thuta, tlangsîp tienga inthawka lung, pilchang le pilpawk intawl rì chu a râpthlák hlê; an ri deu hum hum a, ṭi um tak a ni ti hriet thei khawpin a hung in tawl thlaa, lung lien le chînhai chun lampui chen a hung deng tlung ta rum rum el a, kan khék tûor a, ruo a sûr nasa bawk, kan chiâi in kan phâwklêk nasa hlé. Kan nauhai pahni hlak an in bawr bawr a, kan keihar a, ruo a sûr nasa leiin motor kan back thei ta naw chun, a ṭul chun motor a inthawk tlânsuok (inchawmthlâk) el dingin tiin lungril kan nei a.

Kan Driver Zoa chun inhmawtakin hnungtieng a hei back tum nâwk a, vângnei in kan back thei a, a hei back ta char char a, ruobawhawk an ti ang chu kan sîra a hung inkhaw thla ta duoi duoi a. Mak danglam takin buoina um lovin hla fût a, a himna tâwka kan back tlung thei hnung chun chawmkhat kan nghâk a, second driver Thangrum chun torchlight chawiin fe thei ding ngirhmuna um kan ni am? tiin a va enkai a. Kan reng deu thaw in kan hu vâwnga, ruo a sûr nasa ém lei chun kan thuomhnaw, mattress hai khawm ruo in a denghu vawng. Fe el ding chun ṭium khawpin tlâng tienga mimkei ri chu a la nasa èl sih. Lungâwpinkaia beidâwng taka kan um lai chun, 'khawtienga in'thawk in am a mi ṭhangpuina ding hung tlung a ta? Ami ṭhangpuitu ding chu Lalpa, hnuoi le vân siemtu kuomah inthawkin hung tlung a tih' ti chau hi lungrila hung inlang chu a nih. 

Driver huoisen le thatho tak Pu Zohminglien @Zoa chun 'risk la tawp ei tah, tlân tawp el ei tih; ei suo ṭep ta leiin kîr nawk ding chun an khaw ta êm el' tiin kan motor chu hrâttakin accelerator a hei pék a. Tlâng tienga mimkei ri chu a la so deu chur chur a, lampuia chun lung lientak el feet 5 x 4 vêl a lien ding hi lampui lailung taka chun a lo ngir zur el a, thlangtieng râwl pil ko insâng a um bawk. Hraw tlang ding chun râwl tienga pil ko hrut naw chun motor chu an leng si nawh. Risk tak meu la in Zoa chun a hei baw phei el chu, ngaituona a fe hla hman hlê. Râwl tienga pil ko kha ruo sûr râwn leiin lo intawl sien chu râwla khan kan liem thla el ding chu a nih. Pathien vênghimna zár chauin kan hraw tlang thei ṭawk a; kan inthuok huoi el. 

Nungba phâk tâwm chun kan naunu chu an luok bawr bawr leiin kan la chawl hrie a, kan hung tlân peia, Pathien vênghimna zár chauin damtakin Hmarkhawlien chu Changer ni 5 zing 8:30 in kan tlunga. Youth Care Centre (Ṭhalai In): Discipleship Training Centre, Vocational Music Training Centre, Guest Room dinga Central Kristien Ṭhalai Pawl (CKṬP), ICI in Project a lo induonga chun kan châwl hadam a. A project sawrṭangkaitu kan ni phák hi kan lâwm hlê. Kan thuomhnaw po po chu a hu vawnga, motor a diesel stock dinga an sie khawm a lo leaked bawk leiin kan thuomhnawhai po po chu a rim a sie vâwnga, a rinum hlê.

Ṭhalai In a hin zîng bu fa in Umkiang, Meghalaya tieng pan ding in, Hmarkhawlien chu 10:45am in kan suoksan taa. Umkiang ah hin kan urênga upatak Pu Romeo L. F. Tusing hai nupa hi Umkiang PHC, Meghalaya ah Karuna Trust a sinthaw an ni leiin zantieng bu kan hnawt a. Uisa inhnik tak el an mi lo buotsaipèk a, kan lawmna an sâng hlê. Umkiang, Meghalaya a inthawk 5:50pm vèlin kan suok a. Lumshnong tlungin Khlehriat chu 8:25pm in kan tlunga. Pu Lalhmangai F. Tusing hai nupa in lampuia an mi lo chibai a, Pastor Lalfellien a lekha ding kan pèk zo in 8th Mile tlungin Saphai tieng kan tlan char char taa.

Saphai Check Post hi 11:06 in kan tlunga; an lo khâr phui map ta a, motor an'thawk kan ṭum a, an office hi a hang insâng met leiin duty hai inbiekpui dinga ka fe lai mèk chun, duty pa hung in, fel èm èm Rev. Lalremnghet Ṭhiek, Field Secretary in a lo biekfel tasa a ni bawk leiin kan motor number chu en fel nghâlin, lampui chu a hung hawnga, sâwt raklo kan tlán hnung chun Dima Hasao District, Assam zuk lutna ding tak Khandong Dam lai tak an lo khâr nâwka. Duty ding âwm hlak kan hmu naw. 'Hello Hello' tiin kan khék chûl chûl-a chu tûkhawmin an mi dawnsak naw leiin Driver Zoa leh kan pahniin gate chu hawngin kan hung tlân suoka, Dima Hasao chu kan lut chu a lo ni der el tah. Lockdown a inthawk hi lampui (Umrangso-Shillong road) hi kharkhipa um tah a ni leiin motor in an hraw ta naw hrim hrim a ni leiin Sai lampui ni âwmtak inbâk rem rum chu damte te’n kan hraw a, lampui in ṭhe a lo um a, kan Google map hlak network hrât naw leiin hmang hlei thei lovin kan um a. Lampui ni âwma kan ringna tieng chu pan chawta, lam indiknawna tieng a lo ni a, sienkhawm, Assam Mission Field ah missionary pahni Evan. Ebenezer Ralsun le Evan. Lalrosem Faihriem haiin bike in an mi hung tuoka, Lampui a intuok in 3KM, Garampani, Assam chu zàn dar 11:35 in damtakin kan tlung ta a.

Assam Mission Field ah ICI Missionaries le Pastor hai chun an milo nghàk ṭhup a. Hlim le lâwm takin an mi lo lâwmlut a. Pathien kuomah lawmthu hril a ṭawngṭaina Pastor Lalziding, Chairman, Assam Mission Field in a nei a, thingpui hlim tàkin kan dâwn tlânga, kan hlim tlâng hlé.

Kan lampui hraw a hin harsatna chu tuok siin, buoina rik taka sukbuoia um si lovin ṭhangpuitu pângngai Lalpa'n kan tumram a mi ṭhuoi tlung hi ropui kan tiin kan lawm hlé.

Soli Deo Gloria.

3KM, Garampani, Assam.

Changer 6, 2020.