Krista Hmangaina zara Hnetu ei nih

Sunday Special Article

Johny Laldinthar F.Tusing

UBS, Pune 17^th  March, 2019.

Krista Hmangaina zara Hnetu ei nih

‌‌Krista hmangainaa inthawk chu tuin am mi ṭhêng a ta? Rinumnain amanih, lungngainain amanih, suknawmnatnain amanih, ṭâmin amanih, saruoknain amanih ṭiumin amanih, kâwlhnâmin amanih a mi ṭhe ding am a nih?...ṭhe lo e! chuong po poa chun, a mi hmangaitu lei chun ropuitaka hnetu ei nih.(Rom 8:35,37)

World Watch List, 2019 chun North Korea hi Kristien suknawmnattu laia a pakhatna in a sie. N.Korea hi kum 18 zet el a zâwnin hi ngirhmun hi a hau tah. Kum nga liem ta khan Suknawmnatna tawpkhawk (extreme status) list a N. Korea chau hi a ni hlaka tu ruok hin chu rambung 11zet in hi ngirhmun an hau der tah. N. Korea hi "A Land of Silence" ti hiel a ni bawk.

India ei chêngna ngei khawm hi 10na ei nih. May 2014 a inthawk BJP- Modi sawrkar a hung ngîr a inthawk nasatakin Hindu Agenda, Hindutva (Hindu Rashtra), One Nation-One Religion, Anti Conversion le dang danghai a hung fepui a inthawk hin, Kristien hai hnengde le hnawchepin ei um deu deu a.  Kristien schools, hospitals, orphanages and charities baka organisation tamtakin antuor a, a ṭhen khar le suktawp anṭul bawk. FCRA regulation hai khawm sukdanglam le khir taka fepui a hung ni ta pei a nih. Hieng anga Kristien dodaltu le Kaltu hi chu Bible tiem hlak le Pathien hmangaina intem ta hai chun uipui tuilien thlira thlir liem el ding chie an ta naw. An agenda hrie zing sia, la thlawp zingtu le zuitu, ṭhangpuitu ei ni chun Triko Paula in a hril Belial le thawhmun angkhat char (thuhmun) an nih. “Belial (Belier -Greek) le Krista khawmin ieng am inngeina an nei a? Annawleh, awinaw le awitu chun ieng am chan hmunkhat an nei a?” (II Kor.6:15)a tih. Awinawtu le Krista le chun ieng lei in am inrem an ti leh? “…sienkhom Krista ropuina Chanchin Ṭha êng chu an hmù thei nawna dingin tu lai khawvel pathien chun ringnawtuhai lungril mit a sukdel si a (II Kor.4:4). Hi taka Khawvel pathien(Belial) chun mi lungril a sukdel hlaka, inthimna chau a sukpung hlak si a (New American Commentary: 1999). Inthim Belial le Var Krista chu iengtik lai khawm an inngeiin an inrem ngai nawh. Hebrai ṭawnga laksuok Belial hi “hlutna neilo”, “sietna”, “Suol mi rilo” ti a nih. Ringnawhai leh rîngkol bât hmunkhat naw ro ti zing si a ei la sunzawm rawp diem amanih? Ringnawhai leh rîngkol bât hmunkhat chu sietna a nih. (Life Applicable Bible Commentary: 1999). Lo keinaah bawngchal le sabengtung hmang kop naw ro (Deut.22:4). Tukhawm hrietna dinga na nei chun hre raw se. (Mt.11:15)

N. Korea hi Kim Jong-Un, mi tawrawt takin a âwpde a nih. An sûnglekuo abikin a pa/pu hai chu pathien anga anbiek a nih. Kim sûngkuo nêka chunghnung lem; a bietu hrim hrim chu Ram hmelma a nih. Chuleiin, ringtuhai chu anthup thei dan takin Krista hnung ringumtaka zui siin an hringnun an khal a nih. Hienga dotu le hmelma lien le hrat umhai sienkhawm det takin Kristienna anṭhangin hma a sawn zing tho.

Ringtu tamtak el hai chun harsatna namenlo antuok a, ṭhenkhat chu an ringna leia rinum taka hrênbet le khum an nih. Ṭhenkhat an hringna hiel anchân mek bawk. A ram mipui hai hrim hrim an zalên naw lai zingin Kristien hai lem chu nasa nawk zuolin an inrum bîk zuol. Hieng sukrinumna le hnengdena karah hin Pathien bêl ngamtu, ṭan ngamtu anla um zing hin khawvêl mihai mak ti a tling a nih. N.Korea Kristien Refugee Mr.Chun in hieng hin a hril, "Hieng kan tuorna hai popo khêl tieng hin lawmna le hlimna thurûk kan nei tlat, Krista kan nei tlat a, kan lungril popo in Krista kan hmangaia, chu chu kan lâwmna a nih" a tih. Kristien an man le hriet taphawt chu ‘Sinthaw inkulna hmun’ (Labour camp) a anthak nghal pei a, suok angin sin anthawa, sukrinumin an um a, an nuom thua suok thei an ni naw a, ankhawp tawk f^k ding an hmu si naw leiin tamtak an thi pha a nih. Nikhat chu an tadingin zalenna kawt a la’n hawng ve ngei beisei in chu var chu an nghak el a nih.

Tirko Paula in Krista hmangaina a inthawk iengthil khawma a mi ṭhe thei naw- Rinumnain amanih, lungngainain amanih, suknawmnatnain amanih, ṭâmin amanih, saruoknain amanih ṭiumin amanih, kâwlhnâmin amanih...ṭhe lo e! chuong po poa chun, a mi hmangaitu lei chun ropuitaka hnetu ei nih. A ropui ngei deh. Anni hai rawi hi tulai khawvela chêngtu hai laia  sukdiktu an nih.

Ei nitin khawsakna a ei nun mi suklungzing hlaktu ṭamna, saruokna le pasietna hai lei dâm hin Krista hi zawr pal ei ti inlau a um deh. Ṭitna hmun, rinumna hmun le suorsietna hai lei hin Krista hi a hmêl sukhmelhem pal ei ti aw!!!. Thlêmna, nun chau le beidawng, bawrsawmna le harsatna thlîpui hran hran in a mi nuoi châng hin; a thlî mi fen-na tieng tieng mût leng le fen hmangin ei um el hlak am? Krista hmangaina chu inbel in, sukchang ruollo in sel takin ei intlansiekna lampui hi tlan pei ei tiu.

Eini rawh hi taksa khawsakna a khawm mi ban phâk lo hi ei tam, chuongzing lai chun suolna tieng ruok chu mî mi ban phâknaw ti thei khawpa ngirhmun cheltu ei nih. Ringtu-a insâl vawng si, sum tlâwmte leia mani hlutna le indikna chanvo hai khawm venghim zo lo, mani hringna hmangai inti si a, nun hadamna ding le hlimna ding zawng tum der si lo hi ei tam em em. Motor khal suol in sietna antlun, amiruokchu motor hrim hrim engine bo in a a hring theinaw. Hringnun khal suoltu chun sietna chau a hmabak, chu hringna chu Pathien ta a nih, motor engine a pawimaw hle laizingin, a khaltu(driver) in a nuom dan angin a khal hlak. A engine ṭha hlê sienkhawm a khaltu in a zir naw chun sietna a nih. Hringna mi petu Pathien hi a ropuiin a chunghnung hlê sienkhawm ei hringna chit; ei khal dan ruoka chu sie le ṭha neia siem ei ni angin a maw ei phur seng a nih. Chuleiin, Krista dit dan a hringnun hmang hi insir a um ngai naw a, ei mamaw tak chu Krista a nih.

Krista leia chân ngam le maksan ngam hringnun hrim hrim khawvel harsatna le rinumna in mi’n huol hlak sienkhawm, hlimna le lawmna thuruk khawvel pek theilo hringna ei nei leiin ei lawmna a famkim tlat. Hun harsat le rinum a khawm Krista hmangaina leiin danglamna nun ei nei hlak. Khawvel hmua rimsie le pasie, tuortu le mi vangduoi angin mi’n hmu hlak sienkhawm hnetu ropuitak eini thung.

Mihai Kristienna hi aman (value) ansang êm êm. Kristien ni leiin khuop in an um a, vuok in an um a, phiengṭam le dangchar in, mani sûnglekuo hai le inṭhe in, thi nghakin hun rinum takin an hringnun an hmang. Eini rawi chu hieng ang harsatna ei tuok naw ve naw leiin iengkim el hi a ni ding ang rengin ei ngaia. Ṭhanglak khawm ei tum hran nawh, ringtu inti siin Pathien ṭi na lungril in a mi ṭinsan a, Krista hmel hrim hrim hi ei sukhmelhem a ni deu tak. Sum hmuna ding a ni phawt chun Krista zamsan ngam, ei taksa inhawi tina ding a ni phawt chun Belial inrempui nuom ei ni deu tak in anlang.

Tiemtu dittak, Krista hmangaina leiin hun rinum le khir, thlemna hrâttak dam, sawiselna dam, deusawna dam, ṭumhnuoina dam, chânna dam, ṭamna, saruokna le pasietna hai dam ei lo hmasuon el rawi maw… ieng ang thlipui hung hrangin, mi nuoi hlak sienkhawm sukchang ruollo in a mi kotu tieng chu seltakin pan ṭal ṭal ei tiu. Ei mâksan le suoksan ram kha lungkham ni inla chu, kîr nawkna ding hun remchàng hmu ngei ei tih; sienkhom, ram tha nawk zuol, vâna um chu, ei ngâi lem leiin ei Pathien ni a’n zak naw a, ei ta dingin khawpui a lo buotsai tah a nih tih ti hrezingin Krista hmangaina zara hnetu ropuitak ni ngei dingin LALPA’N malsawm raw seh.

Hi Vedio hin N. Korea a Ringtuhai ngirhmun a sukchieng hlê.