NUHAI NI ṬAWNGṬAINA
(Mother's Day Prayer)
Johny L.F.Tusing, UBS, Pune, 12 May.
Kan Lalpa le kan Pathien iengkim thawthei vawisun Ni pawimawitak el, kan hringnuna lampui ṭha mi kâwk hmutû, mi châwilientu le hmangainaâ mi ênkawltu Nûhai Ni hmang dinga hun ṭha mi pein, hieng zozai Nu i mi pek leiin lawmthu kan hril che.
Nuhai ṭhangloin hringnun hi ram ṭawl thlalêr ang a ni a, nuhai hin tuihnang anpai ṭeu leiin damna antling takzet. Insûng an awplum in an hmangaina hrilkawp hnaitak chu Krista mi hmangaina chau hi anih anti hi andik hlê. Vawisuna nuhai hi Lalpa malsawm la. An chunga nisa angin varin, rimtui a inchangin mihai tadinga malsawmna, insûnga tadinga lunghlu mantam tak ang ni zîng thei dingin Aw Lalpa a tharin mawlsawmin hratna-in inthuom thar seng dingin kan ngên che.
Nu ṭha in khawvêl a sukdanglam angin vawisun a nuhai hi nun hadamna, hlimna le lawmna chabi ni rawp dingin Lalpa ṭhangpui mawl rawh. Kan ram kan hnam lungmâwl hi beiseina khâmhrui anga mi mawrtu le mi siemtu anni ti hi nuhai hin hrie thar sengin, ṭhangla thar seng dingin ngaituona thar, huoisenna thar le tumruna thar inthuomin anni hai thlazâr hnuoia beiseina mi pholang pêk rawp dingin kan hni che.
Nuhai hi zirtirtu ṭhatak an ni leiin entawn tlâk, mizie nget le ringtlak, kan hringnun khaltu anni ti hi kan hriet thar sengna dingin mitin lungrila nuhai pawimawizie mi pê nawk la, nuhai mani mawphurna khawm dawnsak talo dâm, mani nina khawm hlên zo talo hai khawm an hlutna le pawimawina inhrie thar seng dingin hna hlui ṭawp ta hai hna thar le mawina in a thlâk hlak angin an hringna siemthar pêk seng dingin Lalpa sukhrat in an hmaṭhuoi thar seng rawh.
Mi tamtak thina leia an nuhai in an maksan hai kan ṭawngṭaipêk a, khawvêl inṭhena ram a hin kan ngai lungzuor haiin an mi fesan hin khawsawt leia mitthli kan hrûk chang bo naw nih. Sienkhawm an nuhai hmunruok hlusip la, an khawsawtna hnêmin Van khawpui thlir zinga, kan khuolzinna ram hlimtak le lungawi taka hringnun hmang lem thei dingin i thlarauin chênchil in hnêm rawp dingin kan hni che.
Aw Lalpa, Nuhai popo hi nangma hratnaa an mi chel a, an mi awplum zing theina ding le an ropui ang bawka mi ropui tamtak ansiem pei theina dingin vawisun Nuhai popo mawlsawm thar la, hi Ni hmangtuhai popo khawm nuhai hlutna le an inpumpêkna hrea chawimawi anphu a ni ti hi kan naa inri nawn rawp dingin kan Lalpa Isu Krista hming thienghlim hmingin kan hni che.
AMEN.
HAPPY MOTHER'S DAY, 2019.
.jpg)