CORAM DEO

CORAM DEO

Johny Laldinthar F.Tusing

5 May, 2019.

Coram Deo ti hi Latin ṭawnga inthawka laksuok a umzie chu 'Pathien chêngna ah/umna ah' ti a nih. Ei Bible inletna haia chun 'Lalpa hmaa' ti a ni deu vawng. Krista hnungzuitu hai chu Pathien hmai hmaa hringnun khaltu ei ni taa, Pathien thuneina hnuoia Pathien ropuina dinga hringnun hmangtu ding ei ni tah. 

Chuleiin a ditzawng ei thaw hin Lalpa a lawm awm deh. A thupêk sukpuitling dinga thâtak sanga, eiin hamru chang hin Lalpa lungni-zawngtak thawtu eini ti hi ei naa inri nawn pei raw seh. Lal David chun "...Israelhai chunga lal dinga mi ruottu LALPA hmaah i sawnnaw, LALPA hmaa chu lâm âwm hrim ka nih', hieng nêk hmanin inzapui la um ka tih, kei le kei khawm lân sit pei bawk ka ta..." Ekhai, eini hai khawm Krista zarah ei hamṭhatna hai hi tiem seng ruollo a nih. Pathien hmangaina leia Vân-khuoletui nina pêkin ei um a, ami'n tlanna leiin ei Suolhai thaibo in a um a Inpâk tlak Pathien le zui ding tak Lal a nih. Chu chau a ni naw unau, Lalpa zara hmutheia malsawmna ei dawnghai khawm ku hi a va tam ngei deh! Ama zârah ei chang le ei dawnghai hi tiem seng ruollo a nih.  Hmutheiloa malsawmna ami zârkhumna hai hi anthûkin a va'n sang de aw. Chuleiin, LALPA hmaa chun lâm awm hrim ei nih, LALPA chu inpâk awm hrim ei nih. Lalpa mi kona san ang taka a hnung ringum taka zui pei hi a lo ṭhatak a nih.

Davenport, IA, USA ah Harvest Bible Chapel ti lo ni hlak chu January 19, 2019 khan Coram Deo Bible Church tiin anthlâk a, hi Kohran thar hi Evangelical kohran a nih. A tlangpuiin hi Kohran a hin kartin mi 1600 vêl an inkhawm zie hlak niin an Senior Pastor Rob Willey chun a hril. Thilpêk a Kohran inṭhangduong tak an nih. Member 625 chau an ni lai khawm khan  thlakhat le a chenve sûngin dollar 1.6 million an thawsuok hlak niin an hril. Pathien umpuina le chêngna hmunah chun danglamna a um tei hlak. Coram Deo Bible Church mission puipatak chu Mat.28:19a " Chuongchun, fe unla, hnam tina mi inchûktir dâmin siem unla" ti hi a nih.

HCFP motto le a lo inang char a nih.

Pathien chengna ei ni ta leiin ei nuom thu thua hun hmang el ding ei ni ta naw, mana inchawk ei ni ta leiin ama ta ei nih , Pathien umna hmun chu hmun thienghlim le ama chengna tlak a ni tei hlak.

Pathien umna, Pathien chêngna, Pathien hmai hmaa ngei hringnun khaltu hai chu iengpo khawm thawhai sien, khawlai hmunah khawm umhai sien Pathien hmuntina umin a en tlat le a hmu zing a ni ti an hrietchieng hlak. An nun an fimkhur a, indik le fel takin an um hlak. Famkimlo na hmunah leng ei la ni a, rîtlonaa inngir ei ni bawka, suola insieng le bawsietna leia sie letder ei ni leiin famkim vawnga hringnun khal chu thil theilo hulhuol a nih. Anih! ei Pathien chun 'Mi fel chu vawi sari tlu sien khawm a thonâwk hlak sih a,' (Prov.24:16a). Pathien nau ni tahai chun an suksuolna, an bawsietna, an tlukna hmu in an thonawk tei hlak. An chau sawng ngai naw a, an boral sawng ngai bawk nawh. David ngei khawm a suksuol zie a hmuin Lalpa hmaa 'Ka rîtlonahai hi mi sâwpfaipêk var la, Ka suol hi mi sâwpfaipêk rawh. Ka bawsietnahai hi ka hriet ta sih a, Ka suol hi ka hmaah a um rawp hlak a nih...Husopin mi sukfai la, chuongchun, fai ka tih; Mi sâwpfai la, chuongchun, vûr nêkin vâr ka tih' (Psalm 51) tiin suol thupha chawiin Pathien hmaa an sukruoka; sawpfaina le sukthienghlimna chu Pathien kuomah chau a um ti a hrietchienga, Pathien chêngna tlaka nun hmang nawk dingin I mi sandam hlimna chu mi pe nâwk la, Tiawina thlarauin mi chel zing la tiin a ṭawngṭaia, Pathien umna taphawta indikna, felna, siemṭhatna le nun hadamna a um a ni ti a hrietchieng em leiin Pathien hmaa antuklut tawp a nih.

Pathien umna taphawta ei ti hin Pathien hmun tinah a um (Omnipresence) hril hnuol dinga hmun ṭhenkhat chaua a um tina ni loin Pathien chengna hmunbîk ei inkawktir a nih. Pathien chu iengkim hrie (omniscience) le hmuntin a um (omnipresence) ti hi thudik det taka um chu a nih. Ṭhenkhat in Pathien hmuntin ah a um ti ngaidan fîr tak an nei leiin iengkim hi Pathien a nih (Pantheism) a ansiem a. Inchûktirna danglam le indiknaw a suksuok.

Pathien nauhai nita hai chun Pathien chêngna tlakin an hringnun khaldik tlat an tum hlak. Pathien umna hmunah chun inhmangaina, zaidawtheina, lungmuongna, indikna, ringumna le felna bâwm sûnga khum khâwm angin khawvêl pêk theilo nun an nei hlak.

Coram Deo hringnun nei dingin Lalpa'n mawlsawm raw seh.