ISU KRISTA HUNG NÂWKNA

Pastor Johny Laldinthar F Tusing,

Published in KRISTIEN MEGAZINE | Vol. LXVII No.06, THLAHMUR (July) 2024 Issue.

Ei thupui hi hmatienga tlung ding hrillâwkna pawimâw tak a nih. Tuta ṭum hin point a ṭheṭhawp chuong lovin ei pholang thla puot el ding a nih.

Mi tamtak in hrillâwkna thu hi suizau taluo amanih hril râwn taluo lo dinga inchuktirna hi a lo um rawp hlak. Tamtak chun Chanchintha (gospel) hi ei tinzâwn tak ding le ei buoipui tak ding niin an ngaia, chun, nitin ringna kalchawina tieng hi ei buoipui tak ding niin ngaidân nghettak an nei bawk. An’dikna chin um sienkhawm Bible a hin hrillâwkna a tam el si a. Bible pumpui Genesis a inthawka Thupuongsuo bu 66 hi Pathien Thu, Pathien inthuokkhum le inkhel theilo Pathien Thlarau inthienga pêk a ni ti le thuneitu insângtak a nih tia pawmtu hai tading chun hrillâwkna thuhai hi fekân/bawkân el ding chu a ni nawh.

Isu Hung nâwkna ding thua thiltlung dân ding le a hun thua (event & timeline) hieng Rapture, Rinumna hun, Kum sâng rorêl hai hi Evangelical kohran sûnga ngei  khawm ngaidan ankal nasa hlê, ei kâwl le kienga um Kohran puitak pakhat khawm hin ‘Thupêng Dang Dangte’ ti huongsûnga an sie el hi a mak hlê.

Hun Tâwp inchûkna (Eschatology) hi ziek ding tamtak a um a, suizauna le Theologianhai tukver an’thawka hrilzau ding a tam hlê. Kohran dang dang ngaidân/pawmdân inpelsawn tamna pâwltak chu Eschatology hi a nih.  Rapture le a bêbâwm lem hi chu Article a inzo el thei ding ziezâng a ni nawh. Chu tieng chu ei tinzawn tum a ni naw bâka September Beiruol hunah dingin hei sie ṭha lem ei tih.

Bible inchûktu le Pastor ni bawk pakhat chun ‘hrillâwkna thu hrim hrim hin mi lungril a sukchiâi in mi a sukbuoi hlak leiin mi tamtak hringnun a tawkbuoi hlak bawk leiin a hril ngai naw thu a hrila’, an hotupa (professor) chun ‘ekhai chuonga i ti chun, mî sukbuoi theitu ding Bible a hin a tam hle ding a ni chuh” a ti pek. A hril umzie chu, hrillâwkna thu hi Bible in a hrilrâwn el sia, chuonga buoina ding a ni chun buoina ding a tam hlê ding a ni tiin a dawnlêt a nih.

J Barton chun, “Thuthluing Hlui a 1239 hrillâwkna a um a, Thuthlung Thar a 578 um in a rengin 1817 hrillâwkna thu ziekin a um a. Bible a 31, 102 châng umhai laia 8352 zet el hrillâwkna a nih” a tih (Barton:1973). Isu Krista ngeiin a hung nawkna ding thu hi vawi 21 a hrillang. Thuthlung Hluia a hung nâwkna ding hi vawi 1527 thu a hril anga ngai a nih. Bible a Isu Krista hung vawikhatna thu vawikhat a hrilna pei hin a hung nâwkna ding hi vawi 8 a hrilna ang tluk a nih (Hitchcock:2012). Hi lei hin Isu Krista hung nâwkna ding hi a pawimaw hle hrietthei a nih.

Thuthlung Hlui a bu 39 laia 17 nêka tlawmlo hin Isu Krista hung nâwkna thu an hrillang a, vawi 1527 (OT) a hin Isu hung Nâwkna ding thu hi hrillang in  a um.  Thuthlung Thar by 27 laia 23 hin a hrillang bawk. Thuthlung Thar hin Bung 10 sûnga Bung 7 pei hin a hril anga ngai a ni a, châng (verse) 30 a pakhat pei (1:30) hin Isu hung nawkna hi an puongsuok ang a nih. Isu Krista Hung Nâwk ding leia infuina thu hi vawi 50 a um bawk a nih. (MacArthur:1981).

Bible a hin Isu Krista Hung nâwkna a pawimaw zie chu a chungah ei tarlang anthawkin hrietfie thei a nih. Bible in a ngaipawmaw êm êm hi Kohran khawm in a ngaipawmaw a tul hlê. Bible bu hmasâtak Genesis a Enok ngei khawm khan a lo hrillâwk hieu a nih, “Enok, Adama inthawka pasarina chun a  hrillawk a, ‘ngai ta u’, Lalpa chu a mi inthieng sîng khathai leh a hung: mi po po chunga rorêl ding le…” (Juda 1:14-15f).

Daniel ngeiin Hun Nuhnung a thitlung dinghai a hrillâwkna a tam êm êm a, chuhai laia Isu Krista Hung nâwk ngei ding thu hieng hin a lo hmu, “Mi pakhat mihriem naupa ni âwm tak vân sûmhai le um a hung a, Ama hmaa chun an hung ṭhuoi a. Chun, ama chu mi po po le hnam po po le ṭawng tinrêngin, A rawng an bawl theina dingin a kuomah chun Rorêlna dâm, ropouina dâm, lalram dâm an pêk a, a Lalram chu chatuon lalram bo ta ngailo ding le A ram suksieta um ta ngailo ding chu a nih” tiin. Ei Lalpa Isu Krista ngeiin Olive a Thuhrilna (Olivet Discourse) a chieng êm êm in a lo hrillawk. “kâwl saktieng a hung inlep a, thlangtieng chen khawmin ân lang hlak. Mihriem Naupa hung nâwkna chu chuong ang chu a ni ding a ni si a…. chu pha chun Mihriem Naupa inchikna chu vânah inlang a ta, chun, hnuoia um chi tinin an âwmhai chum an ta, Mihriem Naupa hi thilthawtheina le ropuina nasatak leh vân sûm chunga hung hmûng an tih” a tih.

Ei Lalpa Isu Krista hung hmasak khan chu inrieng taka hung in Mary le Josef bâka ran inah umhai bâk khan chu anhriet naw. A hung nâwk hunah ruok chun mitin in khawvêl pumpui huop in a ropuina hmu tâng anta, a thilthawtheina suklangin um a ta, a Lalram in tawpintai nei ta naw nih.

Isu hung nâwkna inchîkna tamtak um laia pakhat chu Nungchang inhmangna/hmawnna (Moral Decay) hi a nih. Mat.24:37, “Chun, Noa damlai ang bawk khan Mihriem Naupa hung nâwkna chu nîng a tih” a tih. Gen. 6:5 a chun Mihriem rîtlona ei hmu, “Chun, LALPA chun hnuoia hin mihriem suolzie chu nasatak a nih ti le, a lungril ngaituonahai hrim hrim chu suol ruok a nih ti a lo hriet a..” tiin mihriem suolzie le mihriem ngaituona hrim hrim khawm suol a ni leia Pathien lungsenna tlungin tuilêt nasatak a tlunga sukbohmangin an um hiel. Noa hai sûng ang bawkin Kohranhai chu sanhim/sansuok nîng an tih. Ama ringtu dama lo la um zinghai hi boruokah Lalpa tuok dingin sûm laiahai khin zuk lâkin (Rapture) um ei tih. Hi lei hin Rapture hi Pathien Sansuokna Ropui (God’s Rescue Mission) an tih.

2 Tim.3:1-5 a hun nuhnunga nunchang ding a lo hrillâwk hi a tlung indik ta zing el. Nungchang inhmangna le hmawnna hi hmuthei le hriet theiin hnaitea ei banphak tah. Tirko Paula chun, “Mani inhmangaitu dâm, tangka ngainatu dâm, intivei dâm, chapo dâm, Pathien hrilsetu dâm, nu le pa thuawinaw dâm, lâwm nachang hre naw dâm, inthiengnaw dâm, hmangaina insiengpui nei naw dâm, mi nunrâwng dâm, hêktu dâm, insûm thei naw dâm, mi ṭium dâm, ṭhat nuom der lo dâm, vervêk dâm, thuhnung dâwn naw dâm, innghaihlu dâm, Pathien hmangai nêka mâni lâwmna chau hmangai lemtu dâm, Pathien ngaisak hawina nei anta nisienlakhawm, a thilthawtheina chu awi naw ni hai” a ti  nunchang a hrilhai hi ei umna le insûnga chen a hluor tah. Miss Mizoram 2014 Sawmi Chhakchhuak in Pathien a hrilsietna, intivei le chapo taka Kristien sakhuo a hrilsietna (Isu Krista kha Kraws a khengbet a ni nawh, Christ Consciuosness-12D Frequency Level Consciousness ti thu dâm, Essential Mechanic inchûktir dinga hung ti dâm,  Bible hi Communism le thuhmun an nih ti dâm, suol a insieng a hrilsietna dâm),  nu le pa thu awi nuom der loa tangka ngaina leia inzawr ang hiela nun khawhlona a nei dâm, insûmna le intiemna nei der loa nuhmei pasal inpâwlna a tlanginsampui dân dâm (Sex hi Sacred Energy Xchange a tih), a thil hril dân hrima Pathien Thu hrie le ngaisak hawina tak nei si ṭhat nuom der lo vervêkna dâm, thuhnung dâwn loa anngaihlutna dâm hi Biblea a lo inziek vâwng tasa a nih.

Manipur buoina le inzawma hmangaina insiengpui nei naw ni âwmtaka nunrâwng taka hringna inlâkpêkna dâm, India lem hi chu inhêkna a bit a ni deu tak tah. Nei inang inneina, nau sukthlâkna, nupa inṭhena, inruithei sal a intângna, hurna, milim biekna, satan biekna le a dang dang a hluor ta êm êm.

Hun ler tienga um chu ei ni tah. Entlangna (telescope) hrâttak ang el in, Bible hrillâwkna hi hmufie theiin a um zing tah. Isu Krista chu lal a ni a, thilsiemhai po po chungah rorêl ding a ni zie hi a la tlung ngei ding a nih. Pathien lekhabu inthieng ziektuhai in Pathien mihai, Krista ringtuhai anlo inbuotsai lâwk a hieng thu hi hriet naw an nuom naw leiin, a thutaka fel takin a mi lo hrillâwk pei hieu a nih.

Krista in “Kei Alpha le Omega, a Hmasatak le a Nuhnungtak, a Bul le a Tâwp ka nih” (Thup.22:13) a ti angin ama ngei chu tâwpna intluntu nîng a ta, chu hun chu a hung nâwk hunah a famkimin sukdik a tih. A Hung Nâwk pha chun Lala ṭhungin ama ngei chu rorêltu nîng a ta, ‘Lalhai Lal Hotuhai Hotu’ niin chatuonin rorêl tang a tih.

Isu Krista hi a hung nâwk ngei ding a ni ti hi eini Ringtuhai Beiseina Hring (Living Hope) a nih. A hung hmapo chu kîr rêl lovin, ringnaa mi huoisen lo fe tahai anga ei nitin nun (hun hmangdân) hi fîmkhur taka kalchawia fe diem diem a, inhlem lovin tiemchin tieng pan ṭal ṭal dinghai ei nih. NT Wright chun, “Hmatieng (future) ei umna ding thlîr zingin ei vawisûn hun (present) hi ei hmang ngei ding a nih” (Wright: 2014) a ti angin Isu Hun Nâwkna thlîr zinga nun ei khal nuom a um. A hung inlang nâwkna (appearing) beiseituhai po po chun felna lallukhum ei la chang ding a nih. Satan le a thilthawtheina Krista kaltu (Antichrist) dânbawsiepa (lawlessness) chu Krista Hung nâwk pha chun chatuonin hneban in a um ta ding a nih.

AMEN.