Lunglei CCM Inkhawmpui Lian-a Tlâwmngaihna Leh Mikhual Chhawnna Ropui

CCM Inkhawmpui Lian avangin Lunglei-ah ka kal ve a. 

[Read here in English:]

My Lunglei Hospitality Story - When Tlawmngaihna Became Theology: How My Host Showed Me Tlâwmngaihna & Hospitality During CCM Inkhawmpui Lian

Pu Buanga thlan lung chungchang London Archive aṭanga ka thuziak hlutsaktu an tam a, ka lawm takzet a ni. Tunah, Pu Buanga thlan lung chanchin ni lovin, Lungleia mikhual chhawnna ka dawn ropui zia leh Mizo Tlâwmngaihna hlu ropui tak mai; CCM Inkhawmpui Lian dawltu Kohhran BCM Venglai, Lunglei Kohhran te chanchin ka ziak ve dawn a ni.

CCM Inkhawmpui Lian chhung khan mikhual chhawnna sang ber kan dawng a. Ka thlenna chu BCM Venglai Kohhran mi, Pu HS Liantluanga te chhungkua an ni. Pu Tluanga kan ti mai ṭhin a, a nupui Pi Hriati nen an fel êm êm a, an fate Remi, Mawii leh Mala te nen chhungkaw hlim tak an ni. Malsawmtluanga (Mala) hi RIMS (Regional institute of Medical Sciences), Imphal ah MBBS zirin Internship ti lai a ni e.

Inkhawmpui Lian hi Aizawl ah te, Shillong, Haflong ah te ka chhim ve tawh ṭhin, mahse Lunglei Inkhawmpui hi a danglam hliah hliah. Lunglei kan chhuah hma khan ka nupui chu a kawng aṭanga a ke chhuk zawnga na ut ut, sciatica ang deuh hian a na a. Ṭhutna-ah rei a ṭhu thei lo va, inchhung chet vel pawh a ti hleithei lo. Kan fate Churachandpur lamah an awm avangin a mah chauhvin inah ka hnutchhiah a, ṭawngṭaina nen thla-in Lunglei lam chu phur takin kan pan ta zâwk a ni.

Chhim lam Mizoram ka kal vawikhatna tur a ni bawk nen, ka phur zual sauh. Khual thar kan ni bawk si, biak pawh kan zak a, engmah kan sawi ngam lo a ni deu ber. Mahse Lunglei Kohhrante kha an bengvarin an fel êm êm mai.

Kan thlenna tûr in neihtu Pu Tluanga khan SP office kawta mi’n lo dawng sawng a. Hlim takin min welcome hlawm a. An mut pindan tha ber min kian nghal a. Pindan dang ni lovin, an mut pindan ngei mai. "He hi in khum a ni tawh, hetah hian nuam deuhin mu rawh u," tiin min ti a. An fate chu an nu leh pa te pindan lamah an insawn phei ta a.

Ei leh inah pawh kan hnianghnar hle mai. Inkhawmpui Lian-ah hian chhungkua ṭha tak Pathianin min pe a, kan lawm hlê. Pi Hriati leh an fanu Remi chuan sa tuihnai takte, mizo chaw lum, dal leh bai tui tak tak min siam sak ṭhin a. Tumahin ti turin kan ti lo, an thinlunga hmangaihna avanga ti mai an ni.

An hmangaihna lan tir dan kha a tak a ni. Hmangaihna chu ṭawngka chauh ni lovin, thiltih a ni tih an lantir a ni. Thlengtu Kohhran BCM Venglai Kohhran inbuatsaihna kha a ropui takzet.

Department hrang hrang an siam a. Naupang Pawl KNP te chuan 'Hallelujah Chorus' an rawn sa a, an aw mawi leh thianghlim tak mai khan mipui thinlung a hneh hle. Ushering Team te kha an fel lutuk, thlawhnaa thawktu flight attendant ang mai an ni. An hmel hlim, an polite, ṭhutna an rem fel dan zawng zawng kha a mawiin a fel fai em em a ni. Chaw ei buatsaihna lam leh fai vawnna lam pawh an thawk ṭha hle, an thianghlimin an fai êm êm a ni.

Heng zawng zawng ka thlir hian ka zir chhuah chu hei hi a ni: Mikhual chhawnna leh Tlâwmngaihna hi thil hrang pahnih ni lovin, thil pakhat an ni.

Sap ṭawng Hospitality chu Greek ṭawngin "philoxenia" an ti a, mikhual hmangaihna tihna a ni. Tlâwmngaihna erawh hi chu Sap tawngin a lehlin zawh rual loh, Mizo nunphung thuk tak a ni. Rev. Dr. Vanlalchhuanawma phei chuan a hnai ber chu 'altruism' a ni a ti a, mahse chu pawh chuan a phak lo a ti. Ka hmuh dan chuan: Mikhual chhawnna chu mikhual chunga i thil tih a ni a, Tlâwmngaihna chu engmah beisei lova i tih chhan thinlung a ni.

CCM Inkhawmpui Lian dawltu kohhran chuan pahnih kha an ti kawp vek a ni. Dil lova min tih sakna leh lawmman beisei lova min tih sakna kha Tlawmngaihna dik tak a ni.Bible-ah Hebrai 13:2-ah "Mikhualte chunga hmangaihna lantir chu theihnghilh suh u, chutiang tiin thenkhat chuan vantirhkohte an lo mikhual tawh si a," tih a ni a. Rom 12:13-ah pawh "Mi thianghlimte retheihna tuar chu chhawmdawlin awm ula; mikhualte chungah hmangaihna lantir ula," a ti bawk. Kan pi leh pu te chuan Bible an chhiar hma daih khan Hebrai 13:2 hi an lo zawm tawh a ni. Mizo nunphunga chuan mikhual i nih chuan mikhual mai i ni lo, chhungkua i ni nghal mai a ni. Pu Buanga pawh khan he mikhual chhawnna ngei hi a dawng a, a pe let ve leh a. Chuvangin kum 100 hnuah pawh a thlan lung chanchin kan la hre reng a ni.

Tunah khawpui lianah chuan he tlawmngaihna hi kan hloh lek lek ta. Inkhawmpui mikhual tan hotel kan ngai ta, catering kan hmang ta. Mikhual chhawnna chu pawisaa lei theih a ni ta. Mahse Lunglei CCM Inkhawmpui Lian-ah khan a tak tak, a original ngei mai ka hmu let leh a ni.Mi hausa tak an ni lo, mahse an thil neih tha ber

Ka zir chhuah chu: Dalit Theology chuan hliam tuar te chunga mikhual chhawnna min zirtir a, Tribal Theology erawh chuan kan pipu te atanga chhawm nun, khawtlanga nung tlan leh hmangaihna hmanga inchenna min zirtir a ni. Lunglei-ah Pu Buanga chanchin zir turin ka va kal a, mahse ka haw lamah chuan chanchin ropui zawk — Mizo mikhual chhawnna nung reng chanchin ka hawn ta zawk a ni.

Ka nupui sciatica na pawh a la dam chiang lo va, mahse Pu Tluanga te chhungkua hmangaihna diktak avangin rilru a la peng lo reng reng . Hmangaihna a tam po leh natna a kiam thin, tih ka hria. BCM Venglai Kohhran leh ka mikhualtu chhungkua (host family) te, he thu hi in lo chhiar a nih chuan: “Ka lawm em em e. In tlawmngaihna leh in mikhual chhawnna hi ka theihnghilh ngai lo vang.”

Nangni chhiartute pawh, Inkhawmpui Lian-a hetiang mikhual chhawnna hi in dawng ve tawh em? In lo ti ve tawh em?

In thawnthu kha comment lamah min lo hrilh ve teh u. 

In thawnthu te nen Part 3 ah ka rawn ziak leh ang chu maw!!