A lum naw tuna'm ting a ta?

A lum naw tuna'm ting a ta?

Johny Laldinthar F.Tusing

Pune, 28th April, 2019.

Tarik 27 April, 2019 chu a lum ngei el ie. Lum leia ka intheinaw ka hriet sun a la nih. Zingkar (28 April) dar 0600 charin current anla hung off nawk nghal el chu a rinum hlê. A lum êm leiin internet a ka zuk ena, Indian EXPRESS hai chun "Pune recorded the hottest April day in 36 years on Friday, as mercury soared to 42.6 degrees Celsius. According to the records maintained by India Meteorological Department (IMD), Pune, the last time day temperatures came so close was in 1983, when they were recorded at 42.5 degrees Celsius" chieng tawkin anlo ziek kuou el.

Keini neka lum lem khawm anlo la um ta pei "the second hottest city in the country, after Khargone (46.5 degrees) in West Madhya Pradesh, was Akola (46.4 degrees) in Vidarbha region."

Heatwave condition hi 29 April chen a la aw ding niin IMD hai chun an hrila, 28 April sûn changlai taka a lum dân ding chu 43/44 degrees niin anla zieklang ta deu deu. A lum naw tuna'm ting a ta? Ei nuom thu ni loin ei taksa inthlepna hmun hmuna ruotui angin thlan a luong a ni deu tak. Lum leia thlan suok leiin bedsheet a hnawng vawng thei ti inla ka uor taluo el diem.

Khawvêl ei chengna hi hieng anga lum-le-sat anthlâk danglam pei chun tuta inthawk kum 10 hnunga chau khawm ngaituo a va um ngei deh. Krista nei nawtu hai tading lem chun khawvêl hmang sâwt deu deu anta a lum deu deu ding a na, nakie lem chu World Meteorological Organization (WMO) le India Meteorological Department (IMD) haiin lumdan inkhina θερμος(thermos-lum) le μέτρον (metron-inkhi) inkawp thermometer hmanga Anders Celsius (1701-1744) in Celsius scale, Gabriel Fahrenheit (1686-1736) in Fahrenheit scale le William Thomson (Lord Kelvin) (1824-1907) in Kelvin scale ansiem/hmusuok hai anga thermograph hi hmang ruol ni ta naw nih. Chu pha chun iem chang anti aw? A lum naw tuna'm ting ata? ti dâm ka ngaituo neu neu a.

Meidil hi a lum naw tuna'm ting a ta? Isai 47:14 chun "...meiin kâng a tih; meichawk thilthawtheinaa inthawk chun insanhim naw ni hai a; insuklumna ding meihawl ang khawm ni naw nih a, awi ding mei ang khawm ni bawk naw ni" a lum awm ngawt el. Lalpa hung nawk pha chun vawisuna lum ei i ti hi chu neptak ning a tih 2 Peter 3:10 " Nisienlakhawm, Lalpa ni chu inru angin hung tlung ngei a tih; chu nia chun vânhai chu nasataka inriin bohmang a ta, thil bulhai chu meia emhmangin um tâng a ta, hnuoi le a sûnga sinthaw(iengkim thawa um) umhai hi kâng hmang a tih".

Lum chau ni lo in rinumna rapthlak tak antuor sa ding a nih.Mat.13:50 chun "...rawtuina meia chun pei an ta; chutaka chun ṭap le harawt chu um a tih" a tih.

Khawvêl lum a inthawk khawm ku hin inchûk ding ABC chu a lo um ngawt el. Sentence, Grammar, Comprehension le subject dang Physics (Newton's Law of Motion, Theory of Relativity, etc) Maths(algebra, trigonometry, calculus, etc) hai thiemnaw khawma a ABC chau ei hriet khawma damna hmuna khawp niin anlang. Hrezing sia awinawtu le nghatsantu chu a chung a pik hlê ding a nih.

Vawisun nia ei khawvêl lum le sat ei chai hai hi nakie chu tienami ngainuom um tak a la ni ding a nih. Mîn khawvêl hi a pumin nei sien, ama hringna chân si sienla, a ta dingin ieng am ṭhahnem a ta? Annawleh, mîn a hringna sikin ieng am pêng a ta? (Mat.16:26). Khawvêl a hin sum le pai, inhawina, neinungna, inlalna, thuneina, hmingthangna hnawtin nei khawm ni inla Krista ei nei si naw chun thlaraua pasie mi lungsietum ei nih. 'A lum naw' tukhawma anti ta nawna khawvel a hin nei ding tak nei si loin Khawvêl le a sunga inhawina le a chekawi hai chau a hin hnienghnar hlur pal ei ti aw. Juda Iskariot in a Lal, inchuktirtu le apu(master) ngei khawm tangka tlawmte in a zawr a, Dema khawma khawvêl a ngaina leiin Krista a maksan. Khawvêl sietak le lumna in a vawrtawp a hnai deu deu huna hin Krista hi ei zawr, inphatsan le maksan in ei um di'm amanih?

A lum naw tuna'm ting a ta? A la lum pei ding a nih.