Corona Virus le Eini Tieng

Corona Virus le Eini Tieng

Vengtienga mi ṭhenkhat khat ngaidan ei hang hmua a mak thei hlè. Maharashtra state ngirhmun le veng suok dàn ding ngaituo in imu-intuo a harsa hlè.  Bàwka kutsui meua ngaituona dang dang hung lût lai chun ziek nuom phèt lungrila a hung inlang ta rèk leiin inphalam takin phone ka hei hmet ṭan nawk taa.

Naftali Bennett, Minister of Defense, Israel a thuhrilna a thu laimutak chu kum upat tienghai bawisawm dàn ding a nih. Kum upa tienghai chu an taksa hratna (immune system) a lo hràt tawk tanaw leiin Corona Virus hi an thawhla a, chuleiin a hrana (isolated) in umtir a duot taka enkawl ding an nih tiin.

Khawvèla corona virus leia thina tuok fatality rate hi ei hang biechienga kum 80 chungtieng antam tak - 100 a 14.8 a nih. Natna hri invawi hai 21.9 % an thipei bawk. A dawta kum 70-79 inkar 8%; 60-69 (3.6%); 50-59 (1.3%); kum 49 hnuoitieng chu 1% pakhat khawm anla tling nawh. 

Italy ramah natna invawi ràwn hai laia khawm kum upat tienghai thina tuok antam tak niin anhril. Italy hi khawvèla tutaka anvawi thar le thina tuok tamna tak a ni tah. Article a ei ziek ta ang khan khawvel changkang èm èm developed country ni zing sienkhawm anvawi anpung èm èm a, thina tuok ansang bèk bèk tah. 

Thilmak tak el chu corona virus hri invawi thar tamna tak rambunghai hi developed country ram changkang èm èm le hausa anni deu vawng chuh (anvawi thar-new cases tamna tak andawt dàn in- Italy, USA, Spain, Germany, France, Switzerland, UK) khawvèl rambung GDP (hausakna) a khawm a top deu vawng an nih.

Eini lai a hung tlung phàt iem ei chang ding aw? Iengtin am sawmdawlna sin thaw ning ata? Medical facilities hai hi a ṭha hun tawk am? Ei khawvel chengna society le inenkawl dàn hi a himtawk am? Invengna kawnga le fimkhurna kawnga thuneitu haiin thawdàn ding protocol ansiem hai hin ei lungrila ei hmin tawk am?

Hieng thil hi inṭhina leia ei suksuok le pholang a ni nawh. Khawvèl mi chìmbuoitu hripui hi a nina le ngirhmun hi ursûntak le inthûktaka ngaituo ding a ni hrim.

Kohran laia hril chi a ni am a ni?  Ni eh a. Damna hi Bible in a ngaipawimawh. Krista neituhai chu thilthlàkdanglamtu le sukdanglamtu dinghai ei nih (to be agent of transformation). Se lût hnunga se dai kal chu favai laia inzun; vut laia vawi, an i ti ang chau a ni lawi si a.

Shalom.

( Johny L.F.Tusing, UBS Lockdown Self-Quarantine, Qtr.251,  22 March, 2020)