1. Khawvela thi taphawt hai hi Pathien iruot an ni am?
2. Politic le gospel hi an aihal am?
1. Pathien hi iengkim thawthei, chunghnungtak (Sovereign- supreme, superior, above) iengkim siemtu le indintu a nih. Thina chena thuneitu a nih. Ama remruotna loin thil a tlung theinaw. A lo tlung ni tasien Pathien mizie (attributes) a kal ning a tih. Ei hringna chunga thuneitu a ni zie chu Job 14:1-5 mihriem derdepzie hrilna hin a sukchieng. A nihai le thla nizát hi chen ama biruot le a kuomah um a thu ei hmuh. Tirko Paula in Areopagia (Areopagus) hma bulah a thuhril a khan 'Ama ngei chu iengkim kuomah hringnahai, inthuoknahai, le thil popo petu chu a ni lem... an tadingin hun bihai a ruota' ti ei hmuh. Psalm 139 'Iengkim hretu Pathien Inpàkna' a hin a sukfie zuol,Ka dam sung hun dinga ruot chu, I lekhabuah a chuong vawng' ti a nih. Hringna suktawi le keisei a khawm Bible a hmu ding tamtak a um. Lal Hezekia, Daniel le dang danghai.
Amiruokchu Mihriemhai hi robot anga siem ei ni nawh, ditthlang theina free will pèkin ei uma; hi ditthlangna hmangin Pathien remruot khèltienga hmangtu hringna le thina ruok chu Pathien remruot ti thei ni naw nih. Chuleiin thil popo hi Pathien intlungtir vàwnga ngai ding annaw (does not means that God deterministically cause everythings). Khawl (machine) siemtu engineer in a khawl sukhringna ding le a sinthawna dingin a thilsiem chu a sukhring thei ngeia sienkhawm a khawl kha a rèngin a thuhnuoia a sie vawng tina annaw. Theological tension a um thei leiin fîmkhur taka sui a ṭha.
Randy Alcorns lekhabu Heaven ti le Systematic Theology lekhabuhai tiem a ṭha awm.
2. Politics hi eini rawi thlîrna tukver le khawvél insawrkarna ṭhenkhat enin ei ngai suol vawng nisien a ang. A ṭobul hi 'poli-tika, polites, politikos' 'khawpui inrèlbawl amani inenkawlna' ti thei ning a tih. Bible a Sawrkar (politics) le inzuola thuziek pawimawtak pakhat chu Rom 13 na hi a nih. Tirko Paula hi anti-politics a ni nawh (Paul and Politics: Ekklesia, Israel, Imperium...By Richard A. Horsley) le NT Scholar N. T. Wright khawmin Roman le Greek sawrkar politics kha 'the eagle has landed to propagate the gospel' a lo tih. Theologian ropui Wayne Grudem in 'Politics according to the Bible' a ziek a lem khan chu a ṭhalang hlak Politics leia America ram ropui a ni dàn, Pathien hmangruo a ni dân a zieklang nghe nghe. Iengangin Politics hi lo ṭha sienkhawm Sandamna (salvation) a mi pèk thei chuongnaw ti ruok chu ei hriet a ṭha awm.
Amiruokchu Politics hi hmangsuol thei a ni tlat. Sakhuona le Politics keikawp lem chu minority hai tadinga thawhla umtak a nih. Ei Kohran sûnga Krista hming leia martyr chang hmasatak Sambaru kha politics indiknaw a rasuok a ni ngei el. 'BJP le Lotus Pâr' seitak ka zieka a khan ka suklang hrim.
Politics hi amaa hin suol a um nawh. Hmangsuol thei ruok chu a nih. Kohrana politics ei tihai hi Politics indiktak 'politikos, polites' ei hrilpa hi a ni phàkin ka hrietnaw. A tlűkpui thumal keikawp thei ding a ni leia ei ti el niin ka hmuh. Kohrana politics ei ti hi chu inerna le thunei nuom leia politics a bebawm ve el a nih.
Hieng thupui pahnihai hi pawimaw tak el a nia, sienkhawm fumfe taka a hrilfiena ruok chu whatsapp message zuk inzo el thei ding chie ni naw nih.
.jpg)