Rapture le Covid-19
Veng pan dinga kan hung thut, kan thiltuok hi Rapture intemlawk ang deu in ka ngai. Vawisuna (May 20) fe ding hi zani zantieng (May 19) 5pm khan info.(thu) kan dawng thuta a mi barakhai hlè. Inbuotsaina ṭha khawm kan nei hman ta nawh kan chiai nasa hlê. Thaw hmasa ding le thaw nuhnung ding khawm hrietthiem a harsa hlê. Sûngkuo (family) lem chu thaw ding sukfel ding a tama buoi namènlo in kan buoi.
Fe hun ding hriet annaw leiin tiin thlaihuon (kitchen garden) kan lo siem vea; kan anṭam, behna, hmarcha, zindîm, anphui, bachikhâwm hai ṭha êm êm in kan lo enkawl hman taa. Ekdur (bâwngêk) hai vurin anhung ṭha êm êm ṭan char tafan a um hun laitak ei ram tieng chuongkai dingin tawtawrawt a hung inri bur el ta chuh kan lung a ṭhawng hlê.
Kan thlai ṭha êm êm maksan a ṭula, kan umna qtr.maksan a hung ṭul tah. Lockdown leia nitin le zantin deu thawa kan inthlawppui kan Bible inchûkpuihai le ruolṭha tamtak kan maksan a hung ṭul el taa, hril a hai hlê.
Hi kan hung ding hin harsatna, rinumna tamtak kan hmasuon a nih.
Rinumna khèlah malsawmna hi a mi ṭhuoitu thahrui mi pêtu a nia. Lalpa'n ṭul a ti chu nî le thlahai chen khawm a mi kei ngir pèk ding a ni ti hi kan inghatna lungpui a nih.
Ei Lalpa Isu Krista hung nâwk phât chun khawvél buoi dàn ding zie lê inṭhena ràpthlak a tlung ding zie hi ei ngaituo ta hlak am? Ei thilṭha nei tamtak ei in le lohai maksan ṭul a ta; ei thisen inzawmpuihai ngei khawm maksan le inṭhe ṭul khawm um mei ei tih; a va rapthlák awm deh. Unau, i ring le i beisei nèkin Isu hung nawkna Rapture hi a râpthlak ding a nih. Inpei a hun tah, hun ṭha a liem hma hin.
Ama ringtu le sandamna indiktak neitu le chàngtuhai chuh vân sûom lai khin làktungin um antah. Krista le mithienghlim haiin 'WELCOME HOME' an mi lo ti ding a nih. Lawmman semna ropuitak um bawk a tih. Nghâkhla a va um ta ngei deh
Pathien Nî hung tlung ding hun chu ṭhahnemngaitakin beisei zing ro. (2 Pet.3:12a)
AMEN.
Johny Laldinthar F. Tusing,
C-12, 56, 12:00 AM,
Shramik Special Train,
May 21, 2020.
.jpg)
