Pathien Thienghlimna hi a mi'n ṭawmpui a, a mi'n hlán bawk a nih
Pathien Thienghlimna (Holiness) hi Pathien ziebîk (attribute) pawimaw èm em a nih. A ṭawngbul chun Qados (Hebrew) le Hagios (Greek) hai hin 'sukhran, sàttlak a um famkimna nei le ṭhahlierhlak (moral purity) hrilkawp ding um lo (above all)' a hrilna a nih. Pathien zie bîk tak Thienghlimna chu a mi'n ṭawmpui amanih a mi'n hlan zuk ti el chu andik theinaw báka a himaw bawk a nih.
Isai 6:3 ah 'Ân thieng ie, àn thieng ie, án thieng ie Pathien Ropui LALPA a ni' a ti hin Pathien nina a nawnin vél thum (three-fold formula) a hril hin thil uorna hrilna a hmang a ni leiin Pathien mizie a nina a sukchieng hle. Hi hin a thienghlimna danglam zie a tarlang bàka, a ṭhat famkim zie a namdet. Ṭhatna popo inṭanna le suokna a ni bawk.
Paul Tripp in 'Doctrine of Holiness' a hienghin a ziek, 'Pathien Thienghlimna hin iengtin am anlâng â ti le iem a thaw â ti a hrilna ni lovin a nina laimutak a hrilna a nih. Pathien Thienghlimna bo hin suol leia Pathien lungsenna a um theinaw, suol intlan dingin dem kailo Pathien naupa Isu Krista intlanna um naw nih, Thonawkna thua thiemchangna um bawk naw nih. Pathien thienghlimna bo hin Setan hneban thei ni naw nih, chun van thar le hnuoi thar beiseina um thei naw nih, Thienghlimna leia chatuona rorelna a um ding a ni leiin' tiin a hrilfie.
Pathien thienghlimna hin Pathien lunginsietna a mi'n hmufietir. Lungsinsietna leia Pathien kuom tieng fe thei in ei um a, pawm le thiemchang ei ni bawk. R. C. Sproul, American Presbyterian theologian chun 'The Holiness of God' a lekhabu a chun hieng hin a ziek, 'Pathien Thienghlimna hi chi hnia ṭhe thei a nih; Ama nina ziebîk hrilna: thil danghai popo laka a danglamna le a chunghnungna tieng hrilna hi pêksawng thei nina communicable attribute a ni nawh, a pakhat lem thienghlimna hrilna (purity) le indikna tieng ruok hi chu nitina ei ngaituo le ni tum a ṭhang ei khawna hi a kawk' tiin a hril.
Ei thu cheitak hi Holiness Movement le inzawma hi beipui hrilmawitu hai leia hung lut pei a ang ngei. Holiness Movement hi 1840 lai khan Phoebe Palmer a rawia harna runpui a tlung laia hlimna indiknaw hung rasuok pei a nih. Hi thlipui hin Pathien mizie ang Thienghlimna Famkim (perfect Holiness) le suol neilo hulhuol (perfect sinlessness) hai hi hnuoiah hin ei chang thei ti hin inchuktirna himlo tak a hung suok. Hi inchuktirna hi Pentecostalism le Charismatic group hai lai a zuolkai hlè. Hi inchuktirna hin Ringtuhai chu Thienghlimna suol nei talo ding hin Thlarau hin a mi chârnel (sealed) ei ni leiin hi hi Thlarau Malsawmna Pahnina (Second Blessing of Spirit) an tih. Hi movement a hin Methodist, Nazarene, Wesleyan, Salvation Army hai lai a hluor bìk.
Ron Rodhes in Understanding, 'History, Beliefs and Differences' a ziek a khan, apostle hai lai pakhat khawmin Pathien thienghlimna ang chie perfect holiness le entire sanctification hi chang thei dingin an in hril nawh' a tih. Isai 42:8 a lem chun, "Ka ropuina hi midang kuomah pe naw ningah" a ti tawp el. Hieng ang inchûktirna hi kum zabi 3na laia inchûktirna indiklo (heresy) ṭiumtak Gnosticism (gnosis-hrietna) an'thawka inṭan vawng niin anlang.
Hi lei hin Holiness Movement thlipui leia ei ram chen mi kângkai a ni el am ti hi ka ring dan deu a nih.
Inthiengna, inthieng dinga hrilna (Heb.12:14; 2Kor.7:1) ti le Nangni in inthieng ding a ni kei kan thieng sih a (1 Pet.1:16) hai hin khawvel mi hai anga um loa danglamna nei ding le ṭhethlak ei nina (separated) tieng âwnin ringtu hringnun (christian practical living) nei dinga theinghlim tumna (pursuit of holiness) tieng le R. C. Sproul in a pahnina a hrilna niin anlang. Pathien (ama) mizie tak (attributes) moral purity (perfection, excellence above all) hrilna tieng ni loin. Chuleiin, Pathien in a thienghlimna an mi'n ṭawmpui ti le A Thienghlimna a mi'n hlan ti hin Pathien thienghlimna famkim(perfect holiness of God) chu a ni thei nawh. Pathien Thienghlimna leia lunginsietna chang leh thiemchang ei nih, Krista zarah fel a ami ruothai leh sukthienghlim ei nih lem.
Johny Laldinthar F. Tusing
23 July, 2020,
Saikawt, Tuiṭhaphai.
.jpg)
.jpg)