Corona leh 3KM, Assam Mission Field

Corona le Keini

May 22, 2023 Inrinni khan Assam Mission Field, Mission Compound ah umhai po RAT test kan nei a, mi 3 kan positive el taa, kan chiai hlê. 

A positive lai hin kan hotupa Rev. Lalramnghet Ṭhiek, F/S Assam Mission Field hi a thawhla bík taka, an khul nasa el chau ni lovin, a âwm nâ a ti leiin ṭithawng um deuin kan hriet a, chun Doctor hai thurawn angin Umrangso Community Health Centre ah Oxymeter hmanga Oxygen level en dingin thurawn an siema. 

Kan umna (posting) hmun hi Health Care Facilities a chu kan chau in kan la hnufuol hlé. Amiruokchu Dr. Mercy Keivom, Hmar nunghàk ngei enkawlna hnuoia um a ni leiin kan thla a muongin, kan sawr êm êm. 

Kan hotupa ngirhmun hi a derthawng deuin kan hriet leiin an in (chengna) bulah, a ngirhmun ngaichang malamin rawngbawltuhai leh kan um khawma, ankhul rî hai chun na a ver hlé el. Chun sunah khawm khan a tha kha a zawi ngawi ngawi ta hrim a na, a âwm (chest) hi na a ti bawk leiin Dr. Mercy hai le inrâwnin Umrangso tieng fepui el nisien kan ti a. Sienkhawm a fe dân ding thua harsatna namenlo kan tuoka, Ambulance hlak um lo, midang tûkhawm a fe thei ding le fe nuom ding an um ta si nawha. A fe pui thei ding chu kei chau ka ni ta leiin kan Warden-pa School-a thawk Sir Thienneithang (TK) chu ka va pan chawta, thil umdan hrilfie in zanril ding anta leiin makhata fe el a remchang tanaw leiin Umrangso chen chau ding a ni bawka PPE ngaituo'ng ei ta, fe pawi i ti naw chun ei va fe el ding? tiin ka ngêna, ama hi phingpui infûklo tulai inenkawl lai tak nisienkhawm hotupa ngirhmun hrethiempui in 'a pawimaw èm leiin va feng ei ta ne'l' a ti a. PPE chu Dr. Mercy ka hrila, Mr. Siam Sing Timung, S.I., Garampani Outpost IC chu ka hei phone a PPE an nei thei ding thu a mi hrila, Dr. Mercy le anlo inbiek bawk leh pahni mi ngaituo pèk dingin ka ngena, full set in 2 a rawihai a hung inthaktir a.

PPE kan hei inbel taa, figure le chu anmil naw hlè. Ditthlang thei a ni si naw, kan hmu ang ang chu kan inbel a. Rev. Lalramnghet-in Car thar thla liem ta lai khan a lo làk zo deu chau a ni bawka ama car chun Umrangso chuh 10:25 pm chun kan pan taa. 11:20 vèlin kan tlunga, tûkhawm anlo um naw a, Dr. Mercy kan phone a Dr. Bhusal, MO, Umrangso CHC a hei call nghala mins.25 hnung vèlin nurse le doctor an hunga, an awi a sàwt hlè. 12:30 am vèlin Oxymeter kan test phàk chau a, 88 reading a nih. A hmel an hang en a, a chau a ni ti an hriet thei, a Oxygen level hlak anhnuoi bawk, a zân a zânah Haflong fepui dingin an mi ti ta thut el a. Keini hlak Umrangso chen chau dinga insiem, wallet le thuomhnaw iengkhawm chawi umlo. Ambulance mi ngaituo pèk dingin theitawpin ka ngieta, driving licence khawm ka chawi naw thu le sum chengkhat khwm kan chawinaw thu kan zawta. Doctorpa chun, 'Lekha ziek ka ta License ṭul naw ni, sum khawm a ṭul naw, damna indit chun Haflong fe nghal ro' a ti hmuk el ta a.

Ambulance hlak Haflong ah pakhat chau a um an tia, a hung thlàk hun sung ding le Ambulance sukfel hun sung an hnu el thei ding niin anhriet leiin lekha an mi ziek pèka cham le cham lovin Haflong fe dingin an mi tia, ka staff pa Sir TK chu thil umdan ka hrila, fe naw thei nisien chu kan ti hlè, sienkhawm kan chan in a zir ngang naw leiin iengpo khawm nisien Haflong chu pan chawt el ei tiu kan tia. 

Umrangso ah oxygen bûr khat ankawl umsun chu phal rak nawhai sienkhawm lama kan hmang dingin an mi pèk a, motor a oxygen bûr chu kan sie a, Rev. Lalramnghet chu lam intluon in, a hnara inbukin Haflong chu kan pan ta khawng khawng a.

Zing 1:25 vèlin Umrangso chu suoksan in Haflong kan pan taa. Darkar 4 hnungin ka imu a hung suok ta hlé el a, a changchun imuhai in motor chu ka khal a ni deu tak. Ṭumkhat lem chu ka inlusu leiin lamthlanga kan tlàn thla vanga Pu Ramnghet in 'sirpa ekhai....' a hung ti hman hiel. Kan chawla sawtnawtie ka mit insìm in, ka la'n recharge hiel. Hieng hin ṭum 5 deu thaw ka uma, dama Haflong kan tlung thei kha kan lawm hlé.

Zan khâwvarin motor khalin zingkar (May 23, 2023) 6:45 am vel khan Haflong kan tlung a. Haflong Civil Hospital Covid Care Centre a fe in thaw ding ṭulhai kan sukfel a. Kan PPE hai khawm a dehawnna hmunah kan sukriral a. Oxymeter khawm test ṭha nawkin 94 a lo kai hiel tah. Kan lawm kher el. Kan motor khawm Sodium hypochlorite hmangin kan thei ang angin kan senitize a. Tuhin Covid Care Centre ah Rev. Lalramnghet hi enkawl mèk a nih. Ṭawngṭaipui a ṭul hlè, a nuhmei Pi Mary khawm positive niin inah in enkawl a nih. An nauhai 2 (Phoebe le Joseph) tading khawmin ṭawngṭaipui anṭul hlè.

Thingpui- breakfast neiin 3KM, Grampani via Umrangso chu kan hung pan nawk taa. Zanah in derlo a motor khal ka ni leiin thawsuol inlauna in ka sip a, fîmkhur takin kan hung tlàn peia, lampui kawlah dawrhai popo anhawng an um der naw, rapture ang elin a re ṭhup el. Lam â vèl thum chawlin kan hadama imu kan that peia. Ka warden pa le hin lampui khawm hre mumal lo kan ni a, mi indawn fàwmin Umrangso tlungin kan staff (school) Miss Mercy in fàk ding lo buotsai in khawp takin kan fàka 3KM, Garampani chu Pathien vengna le ṭhuoina zarin  tluong takin kan tlunga. Kan lawm bèk bèk. (Khaw hnuna kan hriet dan chun Miss Mercy hi an khuoah an lo Quarantine ve a ni awm. Keini leiin harsatna a lo tuok rawn ngei el. Pawi kan ti hle)

Insung khawm lűt ta loin tuola insilin ka thuomhnawhai chu ka sawpfaia, Hostel Room pakhatah in Quarantine ṭha in kan hriet leiin  Isolation room ah ni iemanizat la um hrie dingin room chu ka pan ta lem a nih. 

Pu Rev. Lalramnghet hi a serious hle leiin Guwahati tieng refer in an uma, Ambulance in an fepuia. Covid Care Centre ah ICU ah an sie hiel a nih. An rooma ama ruola an enkawl tamtakin Covid an thipuia. Chanchin kan hei hriet chun mi a ṭhawngin mi a sukchiai zuol hle. Ei ziek hun sung chena hin a ngirhmun a la derthawng hle. Tawngtaipui a tul takzet el. A nuhmei leh a nauhai beidawng dan ding le lungngaia an inrum dan ding ei suongtuoin lungsiet an um takzet. 

Inchikna(sign) ei i tawng mèk hai hi ngaitha chie an ni ta nawh. A taka tlung, mita hmutu le a takrama paltu eini pei tah. Ieng thil am ei tuok ding tûkhawmin ei hriet si nawh a. Lalpa chau hi ei inghatna kulpui le ei beiseina a nih.