Rawngbawlna Hmun 3KM, Garampani kan panna lampui

Changer tarik nî 4 Zân 8 vêl in Saikawt, Tuiṭhaphai suoksan in kan rawngbawlna ding Carmel English School, 3KM, Garampani, Dima Hasao chu kan pan ṭan taa. Covid-19 boruok lum ṭhatlai a ni bawk leiin Check Post ṭhenkhat khat â harsatna kan tuok thei ding anga anlang leiin SP Office, Churachandpur a hai chen Addl.SP ka lo hang inhmupui hrim a nih. Zanah suoka check post harsatna ding hmun haia zanah vêk tlan lut dingin kan in riruonga. 

Zân thlavai tak hnuoia chun kan sûngkuo mi 4 bâka driver 2; Zohminglien Zote @Zoa le Buonthangrum @Thangrum hai leh kan suok a, ruo a sur deu chap chap zinga. Kan hung tlân pei a, Bishnupur-Nungba By-pass Road a fe dingin kan insukhtluka. Ruo a sûr nasa hlé leiin lampui hmufie hlei theilo khawpin ruo-a-ching a. By-pass lam lailungna lâitak Joujangtek phâk hma si lai chun mimkei (landslide) in kan hmaa a hung bei ta thuta, tlangsîp tienga inthawka lung, pilchang le pilpawk intawl rì chu a râpthlák hlê; anri hum hum a, ṭi um tak a ni ti hriet thei khawpin a hung intawl thlaa, lung len le chînhai chun lampui chen a hung deng tlung ta chum chum el a, kan khék tûor a, ruo a sûr nasa el sih a kan chiâi in kan phâwklêk nasa hlé. Kan nauhai pahni hlak an in thlawr thlawr a, kan keihar, ruo a sur nasa leiin motor kan back thei tanaw chun a ṭul chun motor an'thawk tlânsuok el di'n tiin. 

Kan Driver Zoa chun inhmawtakin hnungtieng a back ta char char a ruobawhawk anti ang chu kan sîr a a hung inkhaw thla ta duoi duoi a. Mak danglam takin buoina um lovin hla fût a him tawka kan back tlung thei hnung chun chawmkhat kan nghâk a, second driver Thangrum chun torchlight chawiin fe thei ding ngirhmuna um kan ni am? tiin a va enkai a. Kan reng deu thaw in kan hu vawnga, ruo a sur nasa ém lei chun kan thuomhnaw, mattress hai khawm ruo in a denghu vawng. Fe el ding chun ṭium khawpa tlâng tieng mimkei ri chu a la nasa èl sih. Lungâwpinkaia beidâwng taka kan um lai chun, 'khawtienga in'thawk in am a mi ṭhangpuina ding hung tlung a ta? Ami ṭhangpuitu ding chu Lalpa, hnuoi le vân siemtu kuomah inthawkin hung tlung a tih' ti chau hi lungrila hung inlang chu a nih. 

Driver huoisen le thatho tak Pu Zohminglien @Zoa chun 'risk la tawp ei tah tlan tawp el ei tih; ei suo ṭep ta leiin kîr nawk ding chun ankhaw ta êm el' tiin kan motor chu hrâttakin accelerator a hei pék a. Tlâng tienga mimkei ri chu a la so deu chur chur a, lampuia chun lung lientak el feet 5 x 4 vêla lien ding hi lampui lailung tak chun a lo ngir zur el a, thlangtieng rawl pil ko insang a um bawk. Baw tlang ding chun rawl tienga pil ko hrut naw chun motor chu anleng si nawh. Risk tak meu la in Zoa chun a hei bei phei el chu ngaituona a fe hla hman hlê. Rawl tienga pil ko kha ruosur râwn leiin lo intawl sien chu râwla khan kan liem thla el ding chu a nih.  Pathien vênghimna zár chauin kan hraw tlang thei ṭawk; kan inthuok huou el. 

Nungba phâk tawm chun kan naunu chu anluok bawr bawr leiin kan la chawl hrie a, kan hung tlân peia,  Pathien vênghimna zár chauin damtakin Hmarkhawlien chu changer ni 5 zing 8:30 in kan tlunga. Youth Care Centre (Ṭhalai In): Discipleship Training Centre, Vocational Music Training Centre, Guest Room dinga Central Kristien Ṭhalai Pawl (CKṬP), ICI in Project a lo induonga chun kan chawl hadam a. A project sawrṭangkaitunkan ni phák hi kan lawm lê.

Ṭhalai In a hin zîng bu fa in Umkiang, Meghalaya tieng 10:45am in kan suoksan nâwka. Umkiang a hin ka U Romeo L. F. Tusing hai nupa hi Umkiang PHC ah Karuna Trust a sinthaw an ni leiin zantieng bu kan hnawt a. Uisa inhnik tak el an mi lo buotsaipèk a, kan lawmna ansang hlê. 

Umkiang, Meghalaya a inthawk 5:50pm vèlin kan suok a. Lumshnong tlungin Thleriat chu 8:25pm in kan tlunga. Pu Lalhmangai F. Tusing hai nupa in lampuia an mi lo chibai a, pastor Lalfellien a lekha ding kan pèk zo in 8th Mile tlungin Saphai tieng kan tlan char char taa.

Saphai Check Post hi 11:06 in kan tlunga; anlo kharphui map ta a, motor an'thawk kan ṭum a, an office hi a hang insâng met leiin duty hai inbiekpui dinga kan fe lai mèk chun duty pa hung in Rev. Lalremnghet in a lo biekfel tasa a ni bawk leiin kan motor number chu enfel nghalin lampui chu a hung hawnga, sâwt raklo kan tlán hnung chun Dima Hasao Dist., Assam zuk lutna ding tak Khandong Dam lai tak anlo khar nawka. Duty ding awm hlak kan hmu naw. 'Hello Hello' tiin kan khék chûl chûl-a chu tûkhawmin an mi dawnsak naw leiin Driver Zoa leh kan pahniin gate chu hawngin kan hung tlân suoka, Dima Hasao chu kan lut chu a lo ni der el tah. Lockdown an'thawk hi lampui hi kharkhip a um ta lê motor in a hraw talo hrim hrim a ni leiin Sai lampui ni awmtak inbâk remrum chu damte'n kan hraw a, lampui inṭhe a lo um a kan Google map hlak network hrâtnaw leiin hmang hleithei lo in kan um a. Lampui ni âwma kan ringna tieng chu pan chawtin kan fe ta khawng khawng a; Assam Mission Field ah missionary pahni Ebenezer Ralsun le Lalrosem Faihriem haiin bike in an mi hung tuoka, Lampui a inhmuiin 3km, Garampani, Assam chu zàn dar 11:35 in damtakin kan tlung tah.

Assam Mission Field ah ICI Missionaries le Pastor hai chun an milo nghàk ṭhup a. Hlim le lawm takin an mi lo lâwmlut. Pathien kuomah lawmthu hrila ṭawngṭaina neiin thingpui hlim tàkin kan dawn tlanga kan hlim tlang hlé. Kan lampui hraw a hin harsatna chu tuok siin buoina taluo le sukbuoia um si lovin ṭhangpuitu pângngai Lalpa'n kan tumram a mi ṭhuoi tlung hi ropui kan tiin kan lawm hlé.

Soli Deo Gloria.

3KM, Garampani, Assam.

Changer 6, 2020.