Hun Inchiknahai hi- The Sign of the Times (Mt.16:3)
Inzinmi ei ni chun inchikna(signs) pawimawzie hrie ngei ei tih. Khâwlaia um am ei ni â? Ei tumram tlungna dingin ieng chen am hmabak a la um tihai hi awlsam takin ei hriet thei. Lamlien a Inchikna (signs) hai hi inzinmi le lampui hrawtuhai tadinga, tluong le damtaka ei tumram tlung theina ding an nih.
Khawvêla ei khuol inzinna a khawm hin Inchikna (Signs) hi ei ngaimaw naw a ni chun la boral ngei ei tih. Pathienin lamțhuom tinah inchikna a mi siempêk a, chuong inchikna hmangin khawlaia um am ei ni â? Khawtienga fe am ei ni? Tihai hi chiengdawt in a mi hrilpek.
Ei thuring Bible a hin chuong inchîknahai chu indikthlapin a tlunga, a la tlung pei ding ei hmuh. Inchikna tamtak hmuthei le hriet theiin ei khawvêl hi anherpeia, inherzing bawk a tih. Khawvêla thiltlunghai hin hun tawp chu ei pan pei antah ti a mi hril. Middle East ramah buoina dâm, Russia le Iran hmalakna le hmasâwn dan dâm. Nuclear ramthuom siemsuokna, globalization, sietrup tlunghai (natural disaster), natna le hri inleng (pandemic-pestilence and plague) hai hi ei lampui hrawnaa inchikna (signs) hai hin ei nuna ieng thu’m a hril â annawleh ei hmu țhel lem?
Țhalai tamtak le mimir khawmin hiengang inâwna thuhril le thuziekhaihai hi, nghawkum le ngaipeinawna dâm, a tlung ding renga ngaia ngaizamna ei nei pei tah. Ziektu tading khawma inphalam le inthlahrung um hiel khawp in ei um hlak. Lungrila mi turtu a um tlat leiin ka ziek ve chawt el a nih.
School ah rawngbawl kan ni leiin nitina kan sin pawimawtak chu School kai a nih. April, 30, 2021 khan Pawl 8 hnuoitieng po inchûkna hmun khâr dingin Assam sawrkar in thusuok a siema, Class-8 hnuoitieng po chu chawl kan puong zui nghala. May 5, 2021 in inchûkna hmun popo khâr vawng dingin thusuok thar a hung siem nâwka, Class-IX & X khawm chu kan khar ta peia. Lungril sâwl le intar taka kan umlai, lekhabu tiemna hun țhatak ka nei thei ding leiin ka lawm rûk hlê el. School a thawk chu mi hrietlo hin sawl a um in, ei hunțha popo hi a mi lâkpêk vawng ti inla suol kher naw nih. Ei khawvêlin a hmasuon mêk le ei tawng mêk ngaituo in Apocalyptic & Prophetic lekhabuhai ka tablet(e-device) a ka lo lâkkhawmhai ka en a, Father of Modern Biblical Prophecy anti hiel Dr. John F. Walvoord lekhabuhai dâm, Apocalyptic & Prophetic Scholar Dr. Mark Hitchcock le Dr. David Jeremiah-hai lekhabuhai chu tiem dingin kan sukthlûka. Ni thum lai ka tiem tlut tlut a, ka hlawkpui hlê. ‘Inchikna Lekhabu’ ti ang dâm hi hmarțawng ngeiin ziekin hrillâwknahai hi suizauin, mawl tak siin ziek thei nisien âw ti dâm ka suongtuo vawng vawng el. Kei hlakin ka zuk thaw-el thei si nawh.
Article seitak ziek hi tiem thafan a um ngainaw ti hrezingin, a țul a ni chun sunzawm pei dingin ziek ei tum lem ding a nih.
Ei Lalpa Isu Krista khan inchikna kha a hril rawp hlak. Țumkhat chu inchikna le inzawmin Pharisaihai le Saddukaihai chun ama fiena dingin vâna inthawka inchikna anni in entir dingin an hni a, Isu’n inhmatuoin a kawk el taa, khawmuol inher dân hrietna tienga insângtak nei (meteorologists ang) nihai sienkhawm hun inchiknahai (the sign of the times) an hriet fie thei der naw thu a hril (cf. Mt.16:1-3). A vawikhat hungna a khan inchikna anhmuțhel duoi a, Messie a ni ti khawm hre theilo hielin anmit an sukdel a nih. Hi ang bawk hin, Isu hung nawkna dinga -inchikna hmu thei derlo le hre nuom derlo hi ei pung deu deu. Tulai khawm thiemna tieng insângtak, hrietna tienga khawm inthûktak nei Bible ah inchikna ruok chu hre nuom derlo ei tam êm êm tah. Matthai 24:4-28 ei tiem chun Isu’n a hung nawkna dinga inchikna hrilin chuong inchiknahai chu ei Bible hmangin ei kuomah thawn tlungin (telegraph) a um a, ei hriet nuom naw ruok chun ei mawphurna ning a tih. Luka 21:25 a chun vânah inchikna (cosmic signs) hai chieng deuin a mi hril. Isu’n ama hnungzuituhai chuh chuong inchiknahai chu na sit tlat dingin a mi hril.
Hieng inchikna ei hmu le ei hriethai hin lampui intluonin mi țhuoi sien, kho panga mi keihemtu ni naw sien ei tumram tluong taka ei tlung theina dinga inchikna ni mawl raw seh. Hieng inchikna le inzawm hin ei hriet tlat ding chu- (1) ințhinaa hmanglo ding, thiltlung taphawt (every event) hun tawp ding anga hril vuom rak hin Bible hrillawkna a hril nep hlak, (2) Khawvêl chanchinhai sie chunghnung hmasa lo in Pathien Thu a hmasataka sie ding. Bible in ieng tin am inchikna ami hrilâ ngaiven hmasa phawt ding (țhenkhat in thiltlunghai hi Bible ah iengtin am anzieka ti sui ei tum lem hi ei thawsuol rawp hlak, Bible in iengtin am a mi hrila ti hi thawdan indik a nih- Scripture First (3) Inchiknahai hi Isu hung nawkna (Second Coming) hrilna a ni tlangpui.Isu hung nâwkna a hnai ta chun mithienghlim lawr (rapture) chu tlung thei zing a ni tah.
Mithienghlimlâwr (Rapture) hi iengtik hunah khawm tlung thei zing (imminent event) a nih. A tlung ding a ni ti chu ei hriet, amiruokchu a hun ruok chu ei hriet nawh. Mitkhapkara tlung thut ding a nih. Isu ringtuhai po vân boruoka lâkkai in um ei tih. Khawvêl chu a barakhai hlê in a chiai hlê bawk ding a nih (cf. Jn.14:1-3; 1 Kor.15:51-53; 1 Thes.4:16-18).
Mithienghlimlawr hi Pathien sansuokna rûnpui ( God’s Rescue Operation) ti thei ning a tih. Dam-â lo la umzing ringtuhai in rinumna (Tribulation) an’thawka sansuokna a ni ding a nih. Chu umzie chu Rinumna (Tribulation) tlung hma in Rapture hi a tlung ding a nih. Hi hi a ni Pre-Tribulation ei ti tak el chuh. Ei pawmdan khawm a nih. Rinumna hun hi kum sari sûng âw’ng a ta, rinumna tawp tieng chenve (kum thum le chenve) hi rinumna râpthlak ( Great Tribulation) ti a nih (ref. Mt.24:21). Hi hun sâwtnawte sung hin Krista Kaltu (Antichrist) in thuneina kengkaw’ng a ta, khawvêl sawrkarna, sumdawngna, sakhuona hi a thuhnuoia sie’ng a ta, khawvêl pumpui hi ama thuneina hnuoia umin sukrimsietna, hremna le suknawmna nasatak tlung bawk a tih. Hi hunah hin inchikna sahrang nambar neihai chau naw chun tûkhawmin iengkhawm an inchâwkin an zawr thei naw ding a nih. Chu nambar chu za ruk sâwmruk paruk a nih(cf. Thup. 13:1-18).
Ei hril nuomtak chu, Mithienghlimlawr (Rapture) le Isu hung nawkna (Second Coming or Return of Christ) hai hi hun dang ve ve an nih. Hi hun karah hin Rinumna (Tribulation-Dan.9:27; Thup.4-9) a tlung ding a nih.
Hun nuhnunga thiltlung dân ding:
Isu’n a mithienghlimhai a lawr( Rapture) (1 Thes.4:13-18) zoa hin, Krista rorêlna țhungpha ( The Judgment Seat of Christ-Ringtuhai rorêlna-2 Kor.5:9-10; 1 Kor.3:10-15) um a tih. Hi rorêlna hi Rapture zo, Rinumna hun sung, kum sang rorel hma chara tlung ding a nih. Hi rorêlna a hin ringtuhai ei thaw ang sengin rêl pêkin um ei tih. Rinumna zoa hin a mithienghlimhai leh Isu hi a hung tading (Second Coming of Christ- Thup.19:11-21; Mat.25:31-46) a nih. Rapture zoa hin Rinumna hun hi iengtik hun taka ințan diem ana? ti hi chieng dawtin hriet ni naw sienkhawm karkhat hnung, thlakhat, kumkhat amanih a neka tam hnunga tlung ding chu a nih. Hi Rinumna Râpthlaktak zoa hin Armageddon (Megiddo tlanga indona-Thup.16:13-16) Indona râpthlaktak tlung a tih. Hi zoa hin Setan hne/tukdei in um a ta, Krista lalram indin kum sang lalram ( Millenial Kingdom- Thup.20:1-8) um ta’ng a tih. Hi zoa hin Lalțhungpha vâra inthawka rorelna ( Great White Throne Judgment-Ringlotuhai rorêlna- Thup.20:11-15) um a tih. Setan le a rawihai thiemchanglo hai popo chu meidil ah pei in um tang an tih. Van thar le Hnuoi thar ( New Heaven and New Earth- Thup.21-22) umin Chatuon (Eternity) a ni ta ding a nih.
Rorêlna pahnihai a’nthawka ei hriet ding- (1) The Judgment Seat of Christ: Chatuon hun thlîr zinga Pathien ringumtaka zui ding ei nih, ei the ang pei ei sîk ding a nih (Gal.6:7), inhlem loa Pathien mission a hin ei thaw fan fan ding a nih, chu thilțha thaw dinga siema um ei ni leiin nghawk naw mei nih (Gal.6:9). (2) The Great White Throne Judgment: Hmatienga thil hung tlung ding hi hrezingin Simna lungril put â Pathien pan-a, Chanchințha hi ring ding a nih (Mk.1:15); muongchang ta lo in hun țha sandamna hun hi bawpel loa Pathien zawng ding ei nih, a hun ding tûkhawmin anhriet si nawh (Mt.24:36).
Natna-hripui (Plague and Pestilence) le Middle East buoina inchikna (sign) hai tlûrbing ei tah. Bible a Hrillâwknahai (Biblical Prophecy) thei ang anga hrilfie le suizau ei tum ding a nih.
(Sunzawmpei ding…)
Inchikna thiltlunghai hi hun nuhnunga thiltlung ding taktak a limthla le ei intemlawkna (foreshadow and foretaste) anni pei antah.
Johny Laldinthar F. Tusing
20 May, 2021, 3KM, Garampani, Assam.
.jpg)
.jpg)